Delhi Siamsin Khawmpi : Mimal Muhdaan

Lawmpa, Sang Valte in a heina Tokyo khopi apan Delhi Siamsin Conference nuamtak a zatzoh ahihtaak thu, Zogamonline discussion forum a geen a a om in, hiaithu hongelh hi. Ka lung a khoih mahmah.

[ Q U O T E ]
"Singdang gamlei ah sawlbang hei in, ka pianna gamlei gaal in don veeng. A mual in hal, tuisuah-giat in hal, hizong ka lunglai ah daibang thaam - ka pianna Zogam lei.

Ka laizom siamsin zata-te nunnop zailaa sak, nuihchiam leel leh simthu leel zatam te ngai in huibang mau veeng... Maimit in ka mulou in, ka bil in ka zalou zong, thukizakna tuamtuam tungtawn a ka zaak te'n ka lung taisak hina maizeen e... Tua pupa laa leh gamngaih laa sakna leh nunnuam a leenkhawmna mun ah kei zong khaubang chiahnuam hina ing e...

Ka pianna gam kisia in, lungziinna in a dimzong, Zosuan zatam kawlgam-vaigam ah sawlbang heite'n, haanchiam in siambang sin a, tuunnu Zogam ngilhlouh chih simthu ka zaak chian', ka bil a di'n ging kilawm hina tel e... a zak nuam hina tel e...

"Khangthakte khanglou ta, maloubang panta uh lungdam huai... machiang suan diing, tolh lou ding, tolh kiklou diing!!"
[ U N Q U O T E ]

Ke’n leeng hiai khawmpi ka siimna a kipan mimal’ muhdaan khenkhat ka neihte k’on gelhtei ringot deh!

RAISINA MUAL a kipan phavaang huih hongnung hiauhiau te’n Delhi siamsin te, a bukna kawm chiat uah hon zeelsuak a, kumkhat a dia khatvei kipolhkhawmna hun omsun, SSPP khawmpi, a gim a honglaang haat panpan ta. Huchiin, theihlouh kaal in sports hun a hongtung a, nuamtak in a kizang bei a, lametna liantak toh i na ngaak, conference hun a hongtung zomtou a, tomchik sungbeek i matkhawl theih ma in a hon luanliam san manzeel hi.

Tu in keimah in tutkhawl deeduu in ka ngaihtuah kiik a, ka mitkha ah a honglang dundun hi. Khat khit khat. A baanbaan in. Tua hunnuam te.

Innlam ka omlai a kipan Delhi SSPP conference hi video a etnuam ka na sathei peetmah a, vaisai tute ka na ngaisaang ngoihngoih mai hi. Khanglui vai leh khangthak vai tonkhawm sak helhel gige hi’n a kilang. Adiak in, gam-le-nam dinmun hileh, siamsinna lam toh kisai hileh, thu kigeen leh kinialna te bang mimal tak in ka na phattuam pih thei mahmah.

Awle, a sakmin thang Yamuna luigaal a kipan October 14, 2006 ziingni hongsuak khia in bangchi daan hiam khat a siamsin te’ khoveel ah kikhenna hontun di’n lametna liantak ka na neimawk hi. Kei leeng tua diing in nasatak in ka na kisakhawl hi. A ziing a ka kisil zohkuan sim in phone a hongging a, kawtsim niuniau in ka va saang hi.

Heutupa Thangkhanlal Ngaihte ana hi hi. Tu ma a gamgi kuamlak a Kawl sepaih te’ mat, unau mi 21 te’ tanchin hondong a, ka theih daandaan in ka kikum uhi. "Abang! Conference hun kuankuan a hiaithu!" ka chi lungsim hi. A manmoh simziak in hunsawt ka lakei uh.

Huchiin, amun ka va tungngeei a, a kongtual a taanzau in a nuam mahmah hi. Auditorium kong ah mun lian huntawk, loupa hing dim mitmet in om a, alai a suangtung lak a kipan tui a luang ziahziah hi. Tuukthei-taithei tuamtuam a kipan mipi te kikum khe sauhsauh in a sunglam a kizuan nainai hi. Lia-le-taang fel taktak te’n tutna diing mun a honkawk muh ua, huchiin hiai hunnuam ka honzang panta. Mipi leeng a kitam mahmah.

Kong polam noptuk in a sungleeng ana nuam mahmah hi. Huihvot in honzaap helhel a, thawmging luandaan a chiang a, ngaih a nuam mahmah a, mei vaakdaan in i omdaan a sunuam tuam a, dohkaang tung a screen liantak a lim tuamtuam hong kilang leplep zeel te’n mit a taisak tuan mahmah hi.

Huchiin, ahidiing bangtak in hun kizang tou ziahziah hi.

Hiai kipolhkhawmna hun a a mimal tak a "thupi diak" ka na sak, bangzah hiam te geen uthuai ka sa.

Khatna ah, laa kisa te leh tumging te. Geelkhawl ahihbang in hiai khawmpi ah a tamzaw te i Zo laa ahi. Tumging tumsiam tak te’n mawitak in honzuut ua, i suan mahmah zai oihsiam te’n gamngaih laa hon awi diaidiai ua, dohkaang tung apan Zokuam gamlim, mual-le-taang, sing-le-lou, Zodawn vaangkhua tultak, keu bimbem te khawng hong kilang dundun a, meivaak hongmial sim diidee a… I pumpi, i lungsim leh i kha te ngaihsutna leh veina thazung a lawn in a ki om hi. Chihuum bang a thou sungsung hial. Pastor Khamkhanchin (Delhi EBCC) in hichiin geen hi: "Khopi changkaang tak leh mun nuamtak a conference zang himahle hang, nop i sakdiing bangtak a nuam kisakhin lou hi’n ka thei. Zuunlouh Zogam tulpaan’ kai, chia laa i sakkhiat ngoihngoih te ka zaak chiang in khasiat huai ka sa."

Nihna ah, lapau-lavui geen kidemna. A mangthang kuankuan, Vai gam a khangkhia a, i minam’ khangthu, tawndaan, ngeina leh pau-le-haam te bang a theihdiing zah ua theipha nawnlou, naupang neu chikchik te’n i lapau-lavui te hongeen khiat kaukau chiang un, pahtaakna toh kiphawksuah thakna lungsim toh, mipi te’n dingkhe zeen in khut kibet khum zuazua hi. Dai dide a limtak a ngaikhia a, ana tu ngiungeu hunkhop leeng a ki om. Kei leeng tua te’ lak ah ka tel hi. Aw, ipau-ihaam gil hinah e! Mawi hinah e! Hausa hinah e!

Leh, atawpna di’n, Heutupa Thangkhanlal Ngaihte leh Lamkhanpiang – mimal tak in, leh pawlpi’ sik in. Heutupa Lal in hun honlaa a, Shri Oscar Fernandes, Hon’ble Minister kiang ah memorandum piakna nei hi. A thutuun ahihleh May 6, 2006 ni a Singngat gam leh Kawl gam kikhenna mun a singsaat mat a om Zomi 21 te’ dinmun ngaihtuahsak dia ngetna ahi. Tua mi 20 (naupang kum 6 mi peen khahkhiat hita) te kum 12-15 veel mattaang dia thutan khum a om ahi uhi.

SSPP vaisai te leh heutute’ thilhih pahtaak huai ka sa mahmah. SSPP conference a hiaibang thil a hon puakkhiat uh thupi peetmah hi. Ka ngaihtuah a, tukum SSPP Delhi’ thuluu, "Building Relationships" ahihlam ka theikhe thakthak hi. Hiai in gah thupi tak a hon suangkhiat ka lamen. Ei-le-ei kaal ah.

Huchiin, lamzang tak a hun zatzoh ahih in innlam zuan in kipai ta hi. Ka tuanna bus uah mi a tam mahmah mai. Mi kheempeuh in nuam kisa chiat hi’n ka thei. Houlimna te leeng conference thu ngen ahi lailai hi. Lawmvual lungtuak te nuihchiam leel in a nuikhawm laihlaih ua, annbang ki-it, lianu-taangpa bangzah hiam te leeng kikhelah tak in a tukhawm tittet ua, tua te ka et veelveel chiang in ka lungsim ah thawmhauna tak khat a hongdawn khe mawk hi.


© vaphualization october 18, 2006