REVIEW: Zogam Salpha - The Unsung Martyr

[A documentary on the life of Raja Goukhothang]

OVERVIEW

Produced and distributed by SSPP JHQ Delhi

Directed by Paukhenkhup Guite

Cast: Vungzakap/ Nangthanlian/ Paukhenkhup/ Ginlalmuan

Watch the trailer here

Ka taksa a sisan lum a luan sungteng, Zosuan te’ pankhawmna kalh in ka khuttal ka liik ngeikei hial diing.... Tua saang in sih ka teelzaw

Raja Goukhothang

Guunlui tui tawpkang zoudiing hial a tam a sepaih te toh Meitei Leeng Chandrakirti Zosuan te hih chihmit sawm in hong kisa. Mahleh, Ukpipa Goukhothang, a mite hondam diing in hongding khia. Hondam mai hilou in simlei khangthu a honkheng hihhet hi.

Khoveel taangthu minthang taktak te mahbang in Zogam Salpha - The Unsung Martyr ngei leeng khawnbawl upa leh Leeng te’ kimuhkhawmna mun ah hong kipan khia hi. Ahia, hiai peen taangthu maimai ahikei. A hin sungteng gam-le-nam adia nnaseem, vaihawm siam, haangsan, mi thupi, agam adia a hinna hial ana pia, Ukpipa Goukhothang’ tanchin lemchiin kibawl ahi hi. Bangdiing a SSPP Delhi in hiaibang lawmlawm a lungkhoih, lemchiin hon pokhia ahi ua? Innpipa Goukhothang, tung suunni’ tapa, apa Mangsum, leh ata Sumkam, amau te’ thupidaan te phat seenglouh ahihlai un, lemchiin hong kiheekkhia in kipahna saang in dahna a hontun zaw. Entu te thangpai velvul in hon nuse theimawk hi.

1857 kum ahi. Apa Mangsum (Nangthanlian) apan thuneihna a hon luahtouh khit in Ukpipa Goukhothang (Vungzakap) in buaina a hontuak hi. Sukte vaihawm te innpipa’ kiang ah hongtai ua, Meitei leengpan agam uh sim ahihdaan geen in panpihna honngeen uhi. Ukpipa’n leng a sanggam te awlmoh in, amau te panpih di’n hongkuan khia hi. Huchiin, Thangmual dung ah nasatak in Leengpa Chandrakirti toh hong kidou ua, vualtung tuanna thupitak honngah hi. Hiai in Chandrakirti tung ah zahlaakna zumhuai takmai tun a, Ukpipa Goukhothang leh Zosuan te’ tung ah phuba hon laaksawm tinten hi.

Abul ah kiiknawn le, Ukpipa Goukhothang ahihleh Guite Kual leh a nuai a gam omteng a vaihawm lian, haangsan mahmah a minthang ahi.

Huchia Meitei leengpa Zogam lei apan a hawlkiik nung un Leengpa Chandrakirti in thupha hongtawi hi. Lemna mah pibawl gige ahihman in Ukpipa’n leeng na saang a; tua diing in Saiha paak leh sum-eng kuang te Leengpa Chandrakirti kiang a pe diing in Lhunvum, Khodang hausa, sawl hi. Himahleh, Lhunvum in a pekei. Huchia gaalmuang tak a mipi te a hong omlai un, 1873 in Mangkang gamkeek te Zogam simdiing in Chin-Lushai-Eksipison minvuah in hongkuan uhi. Ukpipa leeng hong kisa khia a, gam endiing in a sepaih muan te toh hong kithawi khia uh. Leengpa Chandrakirti ngeei toh maitang a kimu in chibai buukna nei uhi. Huchiin, a vaihawmna gamlei zuan in lungnuam tak in hongkiik ta hi.

Himahleh, malam a lemna bawlkhin a ana kingaihsutna peen a vuakmai a hongsuak ta. A kigin louhlai tak un meitei te’n Ukpipa honman maimah ta uhi. Theihlouh kaal a nunglam a kipan tem a dawt in a om hi. Huchiin Ukpipa ganhing bangmai a nungleh heen a om in, siik khainiang in khih ua, Moirang zaang lam ah hon tonpih uhi. Hiai lampi bel tuni tan in Zosuan te a di’n lungziinna lampi ahi tou denta. A kipeek a, a heenkol suutdiing mi a omkei. A kikou a, a aw zadiing mi omkei. A thangpaihna aw te lamtawn in a thawnsuak a, a samkhiat thumal te tuni tan in Meitei te khomin hong hitou den hi : Phubala, Keinou, Oinam, Nambul, Utlou.

Taan innsung ah Ukpi Maang hongtaang ta a, Meitei Leengpa’n Sukte te doupih a, amah khahkhe di’n zol mahleh a utkei. Agam leh a mite zuak saang in sihna a teelzaw. Huchiin, vaan ah meipi te hong kizial khawm in thakhat in mial in nii a hontuam khum a, khua a hongmial hi. Ukpipa’n a kha a khahkhe ta. Ukpipa’ tapa, Sumkam (Paukhenkhup) , apa’ phuba ladiing in hongkuan a, Meitei gam lianpi va keek hi. Meitei Leeng toh Treaty of Sanjenthong kai in Moirang tan ah gamgi vakhung hi.

Ahi, hiai lemchiin in entu te’ sinlai, teipi bang in a honvut hi. JNU gamkuam a mual-leguam, kohawm te a etlawm a, chiingtu te bang a siamthei mahmah uhi. A vanzat te uh leeng a Zo mahmah. Adiak in, Vungzakap pen Ukpipa mah di’n chinpeen hi. Taksa lian, leh thuneih meel mahmah in a pumpi sawi thei hi. Hiaibang lemchiin i lak a om ngeilou, amasa peen ahi a, i hunlui hausa takmai hon lakkhia hi. 300 movie zaw i phaakna’ng uh a gamla lai. Mahleh, Raja Goukhothang pen Spartan Kumpi Leonidas toh a tehtheih veve hi. Taang a pan a Meitei te’n Zosuan te hih chimit sawm a pan ana la gige uh ahihdaan i theihchiang in a thangpaih huai mahmah. Khasiat leeng a huai. Khanglou ta ni.

R E V I E W S

Zogam Salpha film ka na en a, lungkhoih huai ka sa. A tawmpen a khangthak te i hunlui tangthu uh theihnopna leh lungluutna honpiak ngei ka lamen.

Thangkhanlal Ngaite

Pu Raja Goukhothang pen Red Indian Apache warrior te’ chief te mah abang a, western cowboy film bang dektak. Tulai Zogam economic, social dinmun toh kituak english film hong kibawl pahdiing abang.

Khatchin Langel

Zogam Salpha in Zosuan te lak ah halhthakna thupitak hontun ta heen!

Paukhenkhup Guite, Director

Sansi toh leisa gamlei, khangthak te’n bang i loh a! Gamgi keeklou a simthu & sesum lel toh giabang zuundiing a zaw Pu Goukhothang’ sisan paammaih lawveh aw.

Lun Thawmte, Editor, Siamsin Bulletin