Ka lawm iit

Nitaak ann nekhin, ka room ah Avril Lavigne laa “Innocence” ngai hialhial kawm in ka om a. Damsung hinkhua, nisim hun zatdaan leh nunlui te khawng sial a ka om laitak in ka fawn a hongging a. A nambar kipatna ahihleh ka lamet ngei hetlouhna mun khat ana ahi hi. India gamsung chu ahi ngei a, himahleh koi zawntak hi a, bang service hi ahia, chih ka thei ngeikei.

Ka pik-ap a, “Hello,” ka chi a, a hondawng a. Ka min a honlou a. A aw ka zaakngei ahikei.
“Oh-oh, oh-oh keivoi!” a honchi a.

Ka theikhe zou himhim kei.

“Oh-oh chih chu?”

“Thei nawnlou mo? Aw, PL ka hi.”

PL. Ka bil hongpuak hlek in ka thei hial a, ka deekmul bang kaang sungsung hileh kilawm ka sa.

“PL mo nang? A chimawk! Bangzdaan e? Koi apan?”

“Hi, PL. Tua Hyderabad a om keivoi.”

Amah ahihleh ka neu lai a kipan ka lawmhoih gige, ka lawmhoih peenpeen, leh hiai khoveel a lawmhoih ka neihsun ahi. Oh-oh chia kisaap ana chiingtou den ka hi uhi. Ka kimuhlouhna uh kum sawm bang chingthei ta ana himawk a. Geen dipeen leeng theilou in, ka khawl dedu maimah uhi. Ka daituak ua, thakhat in, “Damzeel maw?” bang a kizawn in ka chikhe tuak kha zezeen uhi.

Geendi chu a vaang ngotmai. Ka tanchin uh ka kizaak tuah louhna uh a sawtta a, ka tungthu uh bangmah le kitheimeel nawnlou a om ka hi maimah uhi. Thil ki dong lehang leeng, i theihdia kilawm zeenpi theilou a ana omkhaak di bang leh, zumhuai thei dinmun ahihkhaak di bang kiveen siam mahmah ngaimawk abang.

“A nuamzeel maw?” “Banghih sek?” “Nang tua banghih ta?”

Ka khua uh, July 7, 1997 a a kaat nung in amau a innkuan un mundang ah honpeem san ua, huainung ka kithuzaak kha nawn himhim kei uhi. Muntuam tuak ah mahni lamtuam chiat zui in ka pai ta ua. Huchi bang a lam ka na pailai un, tutkhawl zual a hunlui te ngaihtuah kiikzekna diing beek hun ana neilou tel ka hi diing uam, chih khawng ngaihtuah in ka ki mohsa sim hi.

Ka neu lai uh, ka kho theihma uh chilaini, apan lawmhoih ka na hitou den uhi. Ziingkaal thouphet bang, inn ah ka na kitawn tuah ua, gamlak ah thaang khawng kam in, sava khawng ka na bengkhawm zeel uhi. Skul kai chiang in leeng ka kitawn ua, pawl kibang in tutna khat ah ka tukhawm ua, suunkhawl chiang in, ka skul huangsung ua mawlbawk biuhbeuh om hiveen, tuatung khawng ah lawmdang te toh ka na kimawl khawm nainai zeel uhi. Skul kaitawp chiang in hawmwork hihdiing omleh hih in, tuate ka hihzoh chiang un, ka inn gei ua mawltual lai khawng ah football bang, kideente bang, thengh te bang, giitphiik bang, milawngpi bang, leh peekluum khawng ka kimawl zeel uhi. Nitaak khomui zuul chiang bang in konglai ah meitual seem in, a kiimveel ah ka na diang kheukhou theizeel uhi.

Kiginni khawng chiang in gam ka vaak ua, theipi khawng vil in, kangtalai sing di peuh ka saat uhi. Ahihkei leh, ka khokhang ua Paldai lui khawng ah, ka va kileuh zeel ua, pailam chiang vahaibuan khawng inn ah ka tawi niainuai zeel ua. Nipi ni ziingkaal chiang in, ka khua ua tanchinbu, tuailai pawlte’ bawl khawng hawm khawm in, sande skul kaitawp chiang in, a khenchiang in, video khawng ka va ensek uhi.

Huchih hunlai khawng in khoveel lungziinna te phawkpha lou in koumau in nuamsa tak in vaankholai ah, bangmah theilou in ka na om ua, nuam leeng ka na sabok uhi. Himahleh, 1997 Tualgaal in hiaibang a neulai nopna teeng a hon balsialnuai sak ta. Inn te a kaangtum a, mi te a si ua, innkuan-kuan in gaalmuanna gam zuan in a pai noinoi maita ua. Hichibang in, kou leeng ka lawmhoih toh ka kaal ua lawmtaakna gui kizan, bohtah sak in ka om ta uhi. Tuni tan kipeh nawnlou in.

Aman ahihleh sepna ana neita a, zi leeng a neita.

A sepna neih ka kipahpih mahmah a, himahleh zi ana neihpeen in neuchik ka lung a a hon sun abang. Ziakbel, ka neulai un, simthu khat ka na chiam uhi. “I hong khanglet chiah, zi i neihdi chiah, daan a, a-lawm a pangtuak di aw…” Hiai ahihleh ka naupang ngaihtuahna uapan hongpiang khia ahi hi. Ama’ lawm in ka na pang theikei. Tulai daan a ana neihtaak ziak in.

Himahleh, kum sawm vingveng, ki thuza lou a ka na omnung un, tu in ka hong kithuzaak nawn ua, ka kaal ua lawmtaakna gui peen ka hon zopnawn takman un ka kipaak peetmah hi. Mahleh, nidang bel a bang nawnkei diing. Naupang hai bang in kholak khawng ah ka nuipuak lualua thei nawnkei diing uh. Mual a nitum kuan a, tung leengthe te a khuan ziaiziai lai khawng bang un, kidelh te kimawl in ka hai taitai thei nawnkei diing uh. Guamkuak khawng ah siiksia bang ka zongkhawm nawn theikei diing uh. Lui khawng ah vuaktang in ka kileuh pangpang thei nawnkei diing ua… Tuabang seenlai hunnuam te ka vuiliam mai uh a ngaita.

Neulai lawm hilou a piching lawm ka hong hihtaak man un.