Angel Tongsuah Kilawm - Chingmuankim Shoute

"Meelmuh chiilpan lunglai kuai..." leh "Nihgeel itna zalai a lawibang thangsa..." chi a neem tak a honsak hialhial ka zaak tuung a kipan, a aw in hon bumhai zou hial hi'n ka thei. Ka bil a a aw neem ka zaak in ka lu-uum sungteng hon zeelsuak a. Ka kam leh muuk te'n ka omna peuh ah, hunteng phial in, a laa sak te a sa hauhau den hi. Zawitak in hon awi diaidiai a, mun khenkhat ah hon heekkawi ngaat zeel a, a saanna mun te ah leeng zohthoh takmai in, a aw neemna bei tuanlou in, leh a luandaan ngeingei a luang in sathei hi.

Amah ahihleh kuadang hilou in, Zomi te' Angel chihtheih phial diing a laa siam, i suan mahmah leh i kisaktheih pih mahmah uh, Chingmuankim Shoute ahi. Atom in, Kimneu. A aw a zaaknuam a, kia geenlouh, a meel leh a duang mahmah in mi tampi a zoukhin hi. A meelhoihna leh a laa siamna te hong kigawm sawnsawn chiang in, ngaikhe tu te a omthei nawn mangkei uh.

2000 kum a Rayburn College Freshers Meet, YPA Hall, New Lamka a ka neihlai ua, "You're still the one" a honsa tatak bangzaw aw, hundang a mipi te kichiak vengvung himahleh, huai laa honsak pat toh kituak in dai khipkhep hial in kingai hi. Shania Twain chiahchiah himai. College leh function neu tuamtuam a sasek himahleh, laa siam a hong minthan khiatna ahihleh S Pauginmuan toh "Siallouh Vangngaih - II" album a laa nalh taktak bangzah hiam a honsak khiat apan ahi hi.

Kimneu ahihleh Lamka Tung mi ahi a, tulel in, Bangalore khopi ah omlel hi. Amah ahihleh a neu a kipan laa lungluut mi ana hi a, himahleh huailou leeng thildang tampi siam anei hi. Hun awl a laibu simsim khawng nuam a sakzawng ahi. Tuni tan in album khat bawlta a, tukum December a innlam a paichiang in album dangkhat bawlsawm nawn hi. Ahihtheih leh.

Kimneu in “Siallouh Vangngaih – II” ah laa thum sa kha hi. Tua te ahihleh Nihgel Itna, Meelmuh Chiilpan leh Hon Heisan Ke’n ahi. 2000 kum ahi. Nihgel Itna leh Hon Heisan Ke’n peen S Pauginmuan toh a sakkhawm uh ahi a, Melmuh Chiilpan peen amah a a sakdeuh ahi. Laa thu te a gilthei a, a kaih te leeng a thu toh a kituak a, a changkaang mahmah. A hiauhiau lampang ngen ahi. A kaih mawitak mai, aw nalh zawseem in honzeem zomah a. Hiai laa thumte’n Lamka huihkhua leh Zodawn a mualte nasatak in a thawnsuak a, mi te’n, a diak in khangthak te’n, a paakta mahmah mai uhi. “Ehe, hiai ah khangthak te’ lametna subuching tu nungak khat a hongpiang khe ta vele maw” a chihial uhi. Innchih ah hiai laa te a kikhah zou den a, Zodawn ah leeng AIR Paite Program tungtawn in a kikhah gige a, tunitan in Seppatnni a “Laa Tualleng Teelna Hun” ah hiai laa thum te’n mun a luahzou den lai uhi.

Kum 2000 lakveel mah in Kimneu’ laa dangkhat a hongluun mahmah nawn hi. Huaibel Lungdeih Ngaih ahi. LT Paite toh a sakkhawm uh ahi a, hiai laa ngei leeng, eimi laa naraan te toh kibang lou in chituamna mahmah a honnei hi. A kaih in bil a hiippah a, a sa te’ aw a kituak mahmah a, adiak in, Kimneu’ aw hoihdaan hiai laa in, athak in, a hon taaklang hi. A laa zawichik in a hong kipan diaidiai a, a hong kalsaang tou deuhdeuh a, siamtak in a hon awi hialhial mai hi. Kimneu’ single dangkhat ahihleh "Tunnu Zogam – III" album a phamta Sir Funny’ phuah, Nampi Lungphawng ahi. Hiai laa ahihleh gam ngaihlaa thuuktak mai ahi a, laa ngaih mahmah khat ahinawn.

Huchiin, amasa peen di’n Kimneu in 2005 kum in a album masapen “Hong len gige'n” a hon bawlkhia hi. Hiai ahihleh a nu-le-pa, Dr Thangminlian and Chiingouman te’n a bawlkhiat sak uh ahi. Pathian laa ngen ahi a, laa thu te a hoihthei a, tumging leh a aw te kituak tak a repkhawm ahihziak mah in a ngaih a nuamthei mahmah hi. Laa te ahihleh Pu V Paukhansiam in a phuahdeuh vek ahi a, himahleh laa khat, Vanglai Ni peen Rev Rouding Pulamte’ gelh ahi hi. Hongleen gige'n chih laa in mi tampi te' lng kuaizou hi. A tamzaw Roulngul Recording Studio a kikhum ahi a, laa dang nih te ahileh Lengtong a khum ahi.

Kimneu in hiai “Hong len gige’n” album a vek in video in bawl hi. “Hiai Gospel Video CD hih a la-thu hi'n a lim-te hitaleh, eimi a lak a ahoih leh changkang pawltak ahi,” chiin Siamsinpawlpi.org in gelh hi. Ahinamah a, hiai video te hih, a et a nuambiik mahmah, adang te toh teh in, chihdiing ahi.

A khenchiang in Kimneu aw’, Sarah McLachlan' aw toh a tehkaak theih hi. A aw neem daan uh. A siam daan uh. Leh, bil a dia ngaihkhiat a hahdam daante. Mahleh, ahitak in, ama’ aw zaw, midang kuamah toh tehkaak theih ahikei. Chituam liuliau-na tak khat anei. Huaimah lah a siamna ahingaal a. A minthanna tak kha.

Khenkhat te' laa te, nihvei-thumvei i ngaihkhit nung chiang in kingai peih nawnlou simmai hi. Mahleh, Kimneu' laa te leh a aw mahmah zaw, ngaihchim theihlouh, Zo huihkhii siang honglaang hiauhiau mah bang eive.

H O U L I M N A

Mimal taangthu
1.Min: Chingmuankim Shoute

2.Pianni: March 5(Pisces)
3.Pianna veng/khua: Lamka
4.Tulel a omna: Bangalore
5.Nu-leh-pa’ min: Dr Thangminlian and Chiingouman
6.Siamsinna munte: Master in Human Resource Management - Christ College, Bangalore; BA - Jyoti Nivas, Banaglore; X toh XII – Rayburn College, Lamka
7.Tulel in bang na seem: TLI Software - Quality Screener
8.Na hobbies: Cooking and Reading
10.Cooking. Hmm… nuam e. Ahihleh tulai tak in bang na sim: Danielle Steel’ a, No Greater Love
11.Na hobbies cooking leh reading na chi a. Ahihleh music la: Oh, huaichu hi e, zenzen. Theihsiam sa a koih i hihchu.
12.Na hun awl in bang na hihsek: Movie, Reading
13.Music instrument bangbang na khoihthei: Maracas
[Guiter tumthei lou maw? Chimawk! Ahihleh laa timing na bohsiam thei ngeileh! (Hahaha)]
14.Laa siam/music tumsiam khoveel ah kua na ngaisaang: Shania Twain, Whitney Houston, Celine Dion, ABBA
15.Music genre bangte na ngaina: pop, sentimental, country, rock, 80s
16.Ei Zomi laa siam/tumging siam kua na ngaisaang: Thangboi Mangte, Mimin Baite, Benjamin, Pauginmuan, S.Chingnu, Lianlunching
17.Eimi laa nalh na sakpeen khat: Tamlua…
18.Ngaihzawng na nei hia:…(???)

Thukhotaang
1. Lamka leh i Zogam ah eimi laa te khawng saang in Mizo te laa khawng a kithangzaw a, a tom in geenle, Mizo imperialism khat ahimai a, a culture uh honzuak naak mahmah mai uh. Ei lam laa te’n phazou lou lua i bang na sa hia?
Alaa kaih te uh nalh zo deuh ziak… Ei a te le amau a sang a nalhzaw le omtham..

2.Bangchi’n i music dinmun i khangsak thei dia? Banglam a panlaak kisam nasa?
Mipi support poimoh pen hi'n ka thei. Album i bawlchiang un lei siausiau in, copy sawn ahihkeileh kikhelh chih te tawmdeuh leh.

3.Mabaan ah bang plan na nei?
Ka thilhih khempeuh ah kuhkal tak leh lohchin ka sawm.

4. Music album na bawlkhiat leh laa nana sakkhiat taak te apan in bang zilkhiat thak na nei? Na album na khawng hoihthou in na thei hia? Mipi te’ response bang hi’n na mu?
Ka lungkim mahmah chihdi ahi. Tha tampi piakngai ahih lam ka phawk a, mipi te, lawm leh vual, nu leh pa, leh tanau-laina te'n a hon support mahmah uh.

5. Laa a laapau thuuklua zat leh zatlouh, ahihkeh kholak pau zat tungtaang ah geen na nei hia?
Laa pau hi in, kholak pau zang lele, athu alaa ahoih naak leh phamoh kei. I geennop, i saknop a ngaikhe tu te'n ana zaakkhaak poimoh pen h'in ka thei.

6. Ahihleh zawl laa leh Pathian laa sak tungtaang la?
A hoih vek, poi kasa kei. Zawll aa hi in Pathian laa hileh itna laa ngen ahi.

D I S C O G R A P H Y
Hong len gige'n
Shoute's Production 2005 (Cassettes & VCDs)
Music by S Gouhau & Thangpi
Recorded at Roulnguls & Lengtonghoih Rec. Studio
Video Camera: Lala Hauzel
Video Director: V Paukhansiam
Produced by Mr & Mrs Dr Thangminlian Shoute
(1000 copies sold over Zogam)

S I N G L E S
1. Nihgel Itna (S Pauginmuan) \ Siallouh Vangngaih II (2000) \ Emty Shoute' phuah
2. Melmuh Chiilpan (S Pauginmuan) \ Siallouh Vangngaih II (2000) \ Singthianmuan' phuah
3. Hon Heisan Ke'n (S Pauginmuan) \ Siallouh Vangngaih II (2000)
4. Lungdeih Ngaih (LT Paite) \ Lungdeih Ngaih (2000) \ LT Paite' phuah
5. Nampi Lungphawng \ Tunnu Zogam III \ Sir Funny' phuah

Hong len gige'n apan
(laa min leh aphuahtu)
1. Hong len gige'n \ V Paukhansiam
2. Hong kai sak aw \ V Paukhansiam
3. Siangthou Toupa \ V Paukhansiam
4. Khuamial gamte \ V Paukhansiam
5.Hong kem in Pa aw \ V Paukhansiam
6.Nuamsa tate \ V Paukhansiam
7.Vanglai ni \ Rev Rouding Pudaite
8.Muanna suangpi \ V Paukhansiam
9.Kong phat hi \ V Paukhansiam
10.Khamuan Pa \ V Paukhansiam
11.Nuam den ta ding \ V Paukhansiam

Hiai Gospel Video CD hih a la-thu hi'n a lim-te hitaleh, eimi a lak a ahoih leh changkang pawltak ahi hi. Huaiziak in, entu leh ngaikhe tu-te'n hiai album leisak chiat leng, chi'n i ki ngen hi. Lamka ah Laizoms dawr leh cassette zuakna munte ah amuh theih ding. Heutu-nu Lia Chingmuankim Shoute kiang ah leng amuh theih ding.
Siamsinpawlpi.org

© [ v a p h u a l i z a t i o n ]

S Pauginmuan: Khangthak te' kinepna

A min a zaakmai un leeng nungaak nou tampi te a liingzou uh. Nungak piching deuh te lah ana nui hiau zeel ua. Lamka khangthak te' lak a min laklak a min kikhawng tam peen leh pai peen Pauginmuan ahimai hi. Ahia, a "min" hia, a "aw," ahihkeileh a "meel," chih theihlouh diing khop hial in Lamka khopi, Zodawn, leh khoveel mun tuamtuam a om Zomi te' huihkhua a zeelsuak zou hi.

Pauginmuan ahihleh tulai deuhmai, khangthak laasiam i lak a i suan mahmah khat ahi. A music video Tulvuah (2002) leh Sakmeel Etlawm (2006) te'n a dinmun saangtak in a vawktou a, niamkiak sawmlou in a kal saang touzeel lai hi.


Kum 10 veel paita in i music dinmun a khing mahmah, a chihtheih. 1970s country leh 1980s rock music te' influence-na nuai ah i musician te a om ua; 1990s bullam a kipan in country music paidaan zui a laa gelh, laa kaihbawl, i laasiam te'n i music khoveel a honluah uhi. Huai hunlai a i laa kaih leh a paidaan te, khangthak, MTV khawng enen te'n ngaihtaak a sa mangkei uh. Khoveel kihei zeel in music genre chi tuamtuam a a hon heekkhia a, huchiin, khangthak te' laa deihzawng leh huai hunlai a i laa paidaan te uh kaal ah guam zapi a kikhung hi.

Huchih hunlai in, ziing daitui in a taak, louhing selthak bangmai in S Pauginmun a hong dawnkhia hi. Amasa peen diing in, aman eilak a a omngei nailou, sentimental rock leh pop rock tawndaan a hon poluut hi. Atung a igeen "kigam laatna guam" a hon zomkhawm a, khoveel polam leh hunthak toh kimil deuhmai in laakaih a honbawl a, music leeng kituak takmai in a hon remkhawm hi. Huchiin, i music khangthu ah bung thak khat a hong kipan ngaalmai.

Eimi laa paidaan, huaibeel, “chaang 1 na ah vual 4, a zoh a thunon, azoh, chaang 2, vual 4 mah, azoh a thunon, huchia lead solo, azoh a thunon, huchia bei” chih daandeuh ngen a pai peen Pauginmuan in a album masa, “Siallouh Vangngaih Vol I,” 1999 kum a hon honkhiat in a kipan a hong kikheng hi. Hiai album a hong chituam a, a changkaang mahmah. Laa kaih te leeng eimi laa kaih naraan te daan hilou in, tumlam gam te khawng toh a hong kizawitawn mahmah mai. Hiai album ah I simthu chiam, Nang ngai in, leh Aw Thelina, chih te a thangdiak hi. A aw toh a kaih kituak di’n a bawlsiam a, music zawi tak leh nalh takmai in a zeem a, hiai album tungtawn in Pauginmuan in, i Zo music hunlui a kipan hunthak ah kal a hon suankhiat pih ta hi.

Pauginmuan chituam na mahmah khat ahihleh a sanggampa, Pauthianlal toh a kibang mahmah ua, a lungluutna uh kibang in a thilhih kheempeuh uah kiton in a pai helhel uhi. Ahi a, mite’n amau unau a theihna uh ahihleh a meel hoihna uh ahi peenmai.

Huchiin, a kumnawn 2000 in “Siallouh Vangngaih Vol” II a hon bawlzom nawn hi. Hiai album ah, Kimneu Shoute in laa bangzah hiam a va sakha a, tuaziak mah in a pai peetmah hi. Nihgel Itna leh Sian in Siam Hen in michih lung lawngkha ahingei dia, kam nei ta phot in sa souhsouh mai hileh a kilawm hial hi. Adiak in, Kimneu toh kituaktak mai a a kidawn hialhial na uh, Nihgel Itna bang.

2001 kum in a thumveina di’n “Tulliim” hon pawkhe nawn a, hiaileeng ama a te bang in a honglaar mahmah nawn hi. Hiai album a laa teng lak ah Tulvuah a thangdiak hi. Music neem takmai a luang hanhan, aw thuum hanhan sim tak a awi hiauhiau, hih haanhaan, sa heuhheuh, a thu chiik mahmah, thuuk mahmah… Tuni tan in hiai laa ka ngaihkiik chiang in ka chi huum a thouzou lailai. A video thak, Sakmeel Etlawm, Azahhuai Thangboi Mangte’ saksa a hon remix thak peen bang, kaal teng phial in Lamka a cable te ah deih a teel om gige zou hi. Eimi, mp3 ngaihtheihna tawikha te’ fawn ah leeng hiai laa a om teitei. Tulai a laa luunpeen leeng ahibok. Trahtrah mai. Khangthak te’ ngaihkhiat utzawng a thei mahmah hi.

Ataangpi in laa kaih te amah toh a naupa, S Pauthianlal in bawldeuh ua, music mah leeng amau unau in a tum ua, a khente Heutupa Gouhau leh TG Lian te’n a bawlsak uhi. Thu te ahihleh atamzaw Emty Shoute leh Angmalas te’ gelh ahi. Tuni tan in a laa teng lak ah video hiaiteng bawl ta hi: I Simthu Chiam, Nang Ngai In, Aw Thelina, Tulvuah, Phualva Dungsuun (feat. Biaksang), Tung Solkha, leh Sakmel Etlawm. Amah hi a sapian a fuh a, chimai ni, a hampha a, i chidia, huaimai hilou in lemchiin daan a siam mahmah zomah laitei a. Camera maituah in, zeitak mai in a honsa a, a hong kiheek ngaingiai zeel a, tamtak te’n a video kia le a kinaamtaakpih thei hial uh.

Ama’ album 3 teng baan ah Pauginmuan in “Dual Ballads,” “ZAA - Semkhawmni Vol I, ” chih te leh adangdang ah mi tuamtuam toh laa ana sakha ta hi. A album bawlsa te cassette in Lamka a Laizoms Musika leh Zasang Recoring Studio ah chik laipeuh in muhtheih diing.

Aman a geendaan in a neu apan music ana lungluut chi a, a album bawlsa teng leeng summeet bawlna lam hilou a lungluut paipihna lam hizaw in geen. Huaiziak tak in, a hun paisa te a etkiik chiang in kisiik luatna diing neilou hi. Himahleh, a laa khumsa te deihbang a sound quality a hoih zohlouh ziak in puahphat lunggulh mahmah hi. Tulel in aman album thak bawlsawm in kisa lellel a, tukum sung a bawlkhiat zoh kineem hi. Ngaaklah huai hitaveen!

I gamlei lam chiteng a tuantual in a om a, thilhihna kheempeuh ah avan leh asum diing kiningching lou in i omlai ua, hiaikawm a kipan hong khangkhia S Pauginmuan in, a laa te – a thu, a kaih, a tumging, a lepkhawm daan chiteng – tungtawn in i music dinmun a hon tawisaang a, namdang te’ lak a phoukhiat saam kisuanlah huai hetlou di’n hon pawkhia a, khanglui-khangthak vai kiton helhel a paipih in, i tumging leh zailaa te khangthu ah ama’ a di’n mun kiptak mai a hon khuatkhia hi.

H O U L I M N A
Mimal taangthu

1. Min: S Pauginmuan

2. Pianni: December 11 (Sagittarius)

3. Pianna mun: Zogam, Lamka

4. Tua na omna mun: Zogam, Lamka

5. Nu-leh-pa’ min: Lolia, S. Khamkhomang

6. Siamsinna munte: BCA(2002-2004) BDPS, Shillong; XI - XII Rayburn College, Lamka; Class A-X, CTHS, Lamka

7. Tulel a zil/sep: Tulel in Computer Works lam ka buaipih deuh

8. Na hobbies: Batminton kimawl, Snooker/pool kimawl, Music bawl leh laa sak

9. Na hun awl in bang na hihsek: Hun awl in Music ngaih leh laa sak, TV et, baanah neektheih neekkawma tut maimai khawng ka hihzeel

10. Music bangchi daan a ana lungluut kha, bangchik apat: Ka pa’n ka neulai un Guiter leh Keyboard tumdaan honhilh a, huai apan in tutan music sal ah ka na taang den. A khonung in hiai saltsanna apan tatkhiak honsawm mahle uh kuama'n hontan khezou nawnkei uh. Still then, I have survived mentally,physically and emotionally due to music.

11. Music instrument bangbang na khoihthei: Guiter, Keyboard leh Drum te ka khoihthei deuh

12. Laa siam/music tumsiam khoveel ah kua na ngaisaang peen: Eric Clapton, Bryan Adams, Lucky Ali leh a dangdang

13. Music genre tuamtuam ah bangchidaan te na ngaina: Sentimental, Country leh Rock ka ngaina deuh a, hilehle a taangpi in music teng ka ngaithei

14. Ei Zomi laa siam/tumging siam kua na ngaisaang peen: S.Chingnu ,Gouhau

15. Eimi laa nalh na sakpeen khat: Leitheih Zontheih Hilou - Paunou16. Ngaihzawng na nei hia: Nei ve thou e… (Assssaaa!)

Thukhotaang
1. Lamka leh i Zogam ah eimi laa te khawng saang in Mizo te laa khawng a kithangzaw a, a tom in geenle, Mizo imperialism khat ahimai a, a culture uh honzuak naak mahmah mai uh.

Ei lam laa te’n phazou lou lua i bang na sa hia? Hi, pha zoulou lua kasa. Laa lam kialou ah leeng magazine lam hi’n line dangdang ah leeng, kuapeuh khanloh hun mahmah ta hin ka thei.

2. Bangchi’n i music dinmun i khangsak thei dia? Banglam a panlaak kisam nasa?

Kipahtawi daan leh kitawisaang daan siam i poimoh mahmah un kathei. I laa sasiam neihsun te’n haksa tak a honbawl khiak uh album te teisawn tawmtawm lou in ahi didaan tak leh phatuamngai tak in leisak siausiau theizeel le kipanpih tuahna khatleeng hi di’n ka gingta. Huaibaan ah, i media lam un leeng ei lam laa mah a nalh peen hi in hikei taleh leeng uang bawl le. A thulam gelhsiam ten music magazine bang bawl theile achih huai. Ahihtheih naikei lehleeng tua i magazine neihlel te tungtawn in laa/music lam uang bawl deuh in kihaanthawn daan siam le music lam ah khangtouhna om thei di'n ka gingta.

3. Mabaan ah bang tup deuh na nei?

Mabaan ah music line lam mah ah pai katum. Ahihtheih leh music studio bang bawl ka lungluut.

4. Music album na bawlkhiat leh laa nana sakkhiat taak te apan in bang zilkhiat thak na nei? Na album na khawng hoihthou in na thei hia?

Mipi te’ response bang hi’n na mu?Sum dawnna dan a profit lam et in, album bawl a phattuamna tuta dih in ka thei kei. Lunglutna a lianzou khop a i na bawlzeel chihthu hiveen. Ahi a, mihon thei zaw punbeh deuh uh.

Ka album anei zaw koikoi hiam ah om zeuhzeuh sam uh. Hilehle a sumlam kimu hoih hia chihbel ka theikei. Mipi te' response ahihleh honphat a hunkhop a omlai un i nunglam ah hongeen sia hunkhop a na omzeel ua.

Lungluutna bawlkhiak/hihkhiak chu bangteng hileh lungkim huai in nuam veve!

5. Khenkhat te’n i laapau a mang kuankuan te kepbit hoih ahi, a chi ua, khenkhat te’n lah tulai vai deuh a laa kaih(tune) i bawlchiang in lapau thuuk lawte a kilawm kei, a chizeel ua. Hiai tungtaang ah bang a na ngaihdaan?

I laapau uh kepbit ahoih kasa. Laa kichi, athu ahoih ziak a nalh i sak a om a, akaih nalh i sakziak a athu hoih lotel kei lehleeng nalh i sak a om a, a kaih toh a laapau zat a kituak ziak hiam in leeng laa khenkhat nalh i sak a om. Huaiziak in, a laa bawltu’n a repsiam naak leh kilawmlou ka sakluat a omkei.

6. Zawllaa leh Pathian laa sak tungtaang bang a na ngaihdaan?

Honbawl tu phatna leh ngaihna Pathian laa ahihleh a sa thei teng in chihtakna toh i sak di mah ahi. Zawllaa ahihleh mihing leh mihing kaal ki-iitna/ngaihna laa lel zaw ahi. Himahleh ,iittheihna leh ngaihtheihna mihing kia lou, ganhing tanpha in leeng a nei chih i thei. Iittheihna leh ngaihtheihna nei ngeei dia Pathian bawl i hihna uah, laa a va sakkhiak bang a siatna a om a?

Khoveel a piangkhia mihing te hiai iittheihna leh ngaihtheihna buaipih khalou leh neilou a om din ka gingta kei (a om khaak leh leeng bawlkhelh hiam mi banglou hiam hi'n teh!) Athu gelhsiam te’n athu in agelh ua, a geen siamt'en agern ua, achiing thei te’n a action in a lakkhia ua, a laa a sathei ten laa in honsa ua, chiin dan tuamtuam in hiai iitna/ngaihna pen i lang sakzeel uh.

Khotaang leh saptuam lam daan in tehkhin ta le. YPA lam a phatuamngai mahmah saptuam lam ah leeng a phattuam ngaihna a suah theih leh, bang a se dia… maw? Ahi a, amun leh ahun tuamtuak a nei uh chihthu ahi. Bangteng hileh zawllaa sak ah siatna a om kei. A satu te ah kinga peen hi'n ka thei.

D I S C O G R A P H Y

1. Siallouh vangngaih I ( 1999) / Produced by Chongbiak / ZRS Rec. Studio

2. Siallouh Vangngaih II (2000) / Produced by ZRS / ZRS Rec. Studio

3. Tulliim ( 2001) / Produced by Nu Ngaizavung / Roulngul Rec.Studio

S I N G L E S

1. Phualva Dungsuun (with Biaksang) / ZAA - Semkhawmni I

2. Nihgel Itna (with Kimneu Shoute) / Siallouh Vangngaih II

3. Sian In Siam Hen (with Kimneu Shoute) Album / Siallouh Vangngaih II

4. Ngaih lah ngai veng (with Nengzachin) / ZAA

5. Sul Honghei In (with Mimin Baite) / Dual Ballads

6. Tung Solkha

7. Sakmeel Etlawm

[A laa sakte paakta a, kupnop nei hiam, thuzaak nuam ut himhim a omleh, sona_pgm@yahoo.com tungtawn in leh +919856406331 ah chiklai peuh in a houpih theih gige diing]

Ka pa’n ka neulai un Guiter leh Keyboard tumdaan honhilh a, huai apan in tutan music sal ah ka na taang den. A khonung in hiai saltsanna apan tatkhiak honsawm mahle uh kuama'n hontan khezou nawnkei uh. Still then, I have survived mentally,physically and emotionally due to music.

S . P A U G I N M U A N

[© vaphualization / laaksawn phallouh]