Story of an NE girl

I am an avid reader of MetroNow* and I am all for its innovative way of bringing us HOT NEWS. This letter is in reference to your cover story ('Girl Power') on Thursday. Here's my opinion and I hope it gets acknowledged.

I want to tell you a story. I want you to listen to me. And I want you to listen to yourselves.

This is a story about a girl student from the North-east full of hopes and dreams, walking towards her college one fine day. I want you to visualise this girl. She's dressed in a cool t-shirt and jeans, and like any other students, carries a bag full of books and notes.

Suddenly, someone along the roadside cries out, "Oye, Chinky!" She turns to see some young fellas... laughing at her, mocking her, teasing her, ridiculing her, passing derogatory comments - racial and lewd.

It was all way too painful for her. Silent tears begin to flow down her cheeks. They don't seem to care. They continue to make fun of her sexuality and ethnicity. They make fun of her not just because she's a woman, but because she looks so different. Then, comes the police, oh, the big, caring Delhi Police! They simply ask her to follow a proper dress code. That way she wouldn't face such attacks anymore, they say.

Can you see her? Her tear-ridden face spewing with innocence, being subjected to racial, ethnic, religious, and gender prejudices. Can you see her? I want you to picture that girl. Now imagine she's a “a native northern Indian girl”.

by Lunte Samte

aka vaphualization

[Letter to Editor, MetroNow, page 31, Sept 21, 2007 issue]

*The Times Group & HT Media Ltd. joint venture, Delhi

Angel Tongsuah Kilawm - Chingmuankim Shoute

"Meelmuh chiilpan lunglai kuai..." leh "Nihgeel itna zalai a lawibang thangsa..." chi a neem tak a honsak hialhial ka zaak tuung a kipan, a aw in hon bumhai zou hial hi'n ka thei. Ka bil a a aw neem ka zaak in ka lu-uum sungteng hon zeelsuak a. Ka kam leh muuk te'n ka omna peuh ah, hunteng phial in, a laa sak te a sa hauhau den hi. Zawitak in hon awi diaidiai a, mun khenkhat ah hon heekkawi ngaat zeel a, a saanna mun te ah leeng zohthoh takmai in, a aw neemna bei tuanlou in, leh a luandaan ngeingei a luang in sathei hi.

Amah ahihleh kuadang hilou in, Zomi te' Angel chihtheih phial diing a laa siam, i suan mahmah leh i kisaktheih pih mahmah uh, Chingmuankim Shoute ahi. Atom in, Kimneu. A aw a zaaknuam a, kia geenlouh, a meel leh a duang mahmah in mi tampi a zoukhin hi. A meelhoihna leh a laa siamna te hong kigawm sawnsawn chiang in, ngaikhe tu te a omthei nawn mangkei uh.

2000 kum a Rayburn College Freshers Meet, YPA Hall, New Lamka a ka neihlai ua, "You're still the one" a honsa tatak bangzaw aw, hundang a mipi te kichiak vengvung himahleh, huai laa honsak pat toh kituak in dai khipkhep hial in kingai hi. Shania Twain chiahchiah himai. College leh function neu tuamtuam a sasek himahleh, laa siam a hong minthan khiatna ahihleh S Pauginmuan toh "Siallouh Vangngaih - II" album a laa nalh taktak bangzah hiam a honsak khiat apan ahi hi.

Kimneu ahihleh Lamka Tung mi ahi a, tulel in, Bangalore khopi ah omlel hi. Amah ahihleh a neu a kipan laa lungluut mi ana hi a, himahleh huailou leeng thildang tampi siam anei hi. Hun awl a laibu simsim khawng nuam a sakzawng ahi. Tuni tan in album khat bawlta a, tukum December a innlam a paichiang in album dangkhat bawlsawm nawn hi. Ahihtheih leh.

Kimneu in “Siallouh Vangngaih – II” ah laa thum sa kha hi. Tua te ahihleh Nihgel Itna, Meelmuh Chiilpan leh Hon Heisan Ke’n ahi. 2000 kum ahi. Nihgel Itna leh Hon Heisan Ke’n peen S Pauginmuan toh a sakkhawm uh ahi a, Melmuh Chiilpan peen amah a a sakdeuh ahi. Laa thu te a gilthei a, a kaih te leeng a thu toh a kituak a, a changkaang mahmah. A hiauhiau lampang ngen ahi. A kaih mawitak mai, aw nalh zawseem in honzeem zomah a. Hiai laa thumte’n Lamka huihkhua leh Zodawn a mualte nasatak in a thawnsuak a, mi te’n, a diak in khangthak te’n, a paakta mahmah mai uhi. “Ehe, hiai ah khangthak te’ lametna subuching tu nungak khat a hongpiang khe ta vele maw” a chihial uhi. Innchih ah hiai laa te a kikhah zou den a, Zodawn ah leeng AIR Paite Program tungtawn in a kikhah gige a, tunitan in Seppatnni a “Laa Tualleng Teelna Hun” ah hiai laa thum te’n mun a luahzou den lai uhi.

Kum 2000 lakveel mah in Kimneu’ laa dangkhat a hongluun mahmah nawn hi. Huaibel Lungdeih Ngaih ahi. LT Paite toh a sakkhawm uh ahi a, hiai laa ngei leeng, eimi laa naraan te toh kibang lou in chituamna mahmah a honnei hi. A kaih in bil a hiippah a, a sa te’ aw a kituak mahmah a, adiak in, Kimneu’ aw hoihdaan hiai laa in, athak in, a hon taaklang hi. A laa zawichik in a hong kipan diaidiai a, a hong kalsaang tou deuhdeuh a, siamtak in a hon awi hialhial mai hi. Kimneu’ single dangkhat ahihleh "Tunnu Zogam – III" album a phamta Sir Funny’ phuah, Nampi Lungphawng ahi. Hiai laa ahihleh gam ngaihlaa thuuktak mai ahi a, laa ngaih mahmah khat ahinawn.

Huchiin, amasa peen di’n Kimneu in 2005 kum in a album masapen “Hong len gige'n” a hon bawlkhia hi. Hiai ahihleh a nu-le-pa, Dr Thangminlian and Chiingouman te’n a bawlkhiat sak uh ahi. Pathian laa ngen ahi a, laa thu te a hoihthei a, tumging leh a aw te kituak tak a repkhawm ahihziak mah in a ngaih a nuamthei mahmah hi. Laa te ahihleh Pu V Paukhansiam in a phuahdeuh vek ahi a, himahleh laa khat, Vanglai Ni peen Rev Rouding Pulamte’ gelh ahi hi. Hongleen gige'n chih laa in mi tampi te' lng kuaizou hi. A tamzaw Roulngul Recording Studio a kikhum ahi a, laa dang nih te ahileh Lengtong a khum ahi.

Kimneu in hiai “Hong len gige’n” album a vek in video in bawl hi. “Hiai Gospel Video CD hih a la-thu hi'n a lim-te hitaleh, eimi a lak a ahoih leh changkang pawltak ahi,” chiin Siamsinpawlpi.org in gelh hi. Ahinamah a, hiai video te hih, a et a nuambiik mahmah, adang te toh teh in, chihdiing ahi.

A khenchiang in Kimneu aw’, Sarah McLachlan' aw toh a tehkaak theih hi. A aw neem daan uh. A siam daan uh. Leh, bil a dia ngaihkhiat a hahdam daante. Mahleh, ahitak in, ama’ aw zaw, midang kuamah toh tehkaak theih ahikei. Chituam liuliau-na tak khat anei. Huaimah lah a siamna ahingaal a. A minthanna tak kha.

Khenkhat te' laa te, nihvei-thumvei i ngaihkhit nung chiang in kingai peih nawnlou simmai hi. Mahleh, Kimneu' laa te leh a aw mahmah zaw, ngaihchim theihlouh, Zo huihkhii siang honglaang hiauhiau mah bang eive.

H O U L I M N A

Mimal taangthu
1.Min: Chingmuankim Shoute

2.Pianni: March 5(Pisces)
3.Pianna veng/khua: Lamka
4.Tulel a omna: Bangalore
5.Nu-leh-pa’ min: Dr Thangminlian and Chiingouman
6.Siamsinna munte: Master in Human Resource Management - Christ College, Bangalore; BA - Jyoti Nivas, Banaglore; X toh XII – Rayburn College, Lamka
7.Tulel in bang na seem: TLI Software - Quality Screener
8.Na hobbies: Cooking and Reading
10.Cooking. Hmm… nuam e. Ahihleh tulai tak in bang na sim: Danielle Steel’ a, No Greater Love
11.Na hobbies cooking leh reading na chi a. Ahihleh music la: Oh, huaichu hi e, zenzen. Theihsiam sa a koih i hihchu.
12.Na hun awl in bang na hihsek: Movie, Reading
13.Music instrument bangbang na khoihthei: Maracas
[Guiter tumthei lou maw? Chimawk! Ahihleh laa timing na bohsiam thei ngeileh! (Hahaha)]
14.Laa siam/music tumsiam khoveel ah kua na ngaisaang: Shania Twain, Whitney Houston, Celine Dion, ABBA
15.Music genre bangte na ngaina: pop, sentimental, country, rock, 80s
16.Ei Zomi laa siam/tumging siam kua na ngaisaang: Thangboi Mangte, Mimin Baite, Benjamin, Pauginmuan, S.Chingnu, Lianlunching
17.Eimi laa nalh na sakpeen khat: Tamlua…
18.Ngaihzawng na nei hia:…(???)

Thukhotaang
1. Lamka leh i Zogam ah eimi laa te khawng saang in Mizo te laa khawng a kithangzaw a, a tom in geenle, Mizo imperialism khat ahimai a, a culture uh honzuak naak mahmah mai uh. Ei lam laa te’n phazou lou lua i bang na sa hia?
Alaa kaih te uh nalh zo deuh ziak… Ei a te le amau a sang a nalhzaw le omtham..

2.Bangchi’n i music dinmun i khangsak thei dia? Banglam a panlaak kisam nasa?
Mipi support poimoh pen hi'n ka thei. Album i bawlchiang un lei siausiau in, copy sawn ahihkeileh kikhelh chih te tawmdeuh leh.

3.Mabaan ah bang plan na nei?
Ka thilhih khempeuh ah kuhkal tak leh lohchin ka sawm.

4. Music album na bawlkhiat leh laa nana sakkhiat taak te apan in bang zilkhiat thak na nei? Na album na khawng hoihthou in na thei hia? Mipi te’ response bang hi’n na mu?
Ka lungkim mahmah chihdi ahi. Tha tampi piakngai ahih lam ka phawk a, mipi te, lawm leh vual, nu leh pa, leh tanau-laina te'n a hon support mahmah uh.

5. Laa a laapau thuuklua zat leh zatlouh, ahihkeh kholak pau zat tungtaang ah geen na nei hia?
Laa pau hi in, kholak pau zang lele, athu alaa ahoih naak leh phamoh kei. I geennop, i saknop a ngaikhe tu te'n ana zaakkhaak poimoh pen h'in ka thei.

6. Ahihleh zawl laa leh Pathian laa sak tungtaang la?
A hoih vek, poi kasa kei. Zawll aa hi in Pathian laa hileh itna laa ngen ahi.

D I S C O G R A P H Y
Hong len gige'n
Shoute's Production 2005 (Cassettes & VCDs)
Music by S Gouhau & Thangpi
Recorded at Roulnguls & Lengtonghoih Rec. Studio
Video Camera: Lala Hauzel
Video Director: V Paukhansiam
Produced by Mr & Mrs Dr Thangminlian Shoute
(1000 copies sold over Zogam)

S I N G L E S
1. Nihgel Itna (S Pauginmuan) \ Siallouh Vangngaih II (2000) \ Emty Shoute' phuah
2. Melmuh Chiilpan (S Pauginmuan) \ Siallouh Vangngaih II (2000) \ Singthianmuan' phuah
3. Hon Heisan Ke'n (S Pauginmuan) \ Siallouh Vangngaih II (2000)
4. Lungdeih Ngaih (LT Paite) \ Lungdeih Ngaih (2000) \ LT Paite' phuah
5. Nampi Lungphawng \ Tunnu Zogam III \ Sir Funny' phuah

Hong len gige'n apan
(laa min leh aphuahtu)
1. Hong len gige'n \ V Paukhansiam
2. Hong kai sak aw \ V Paukhansiam
3. Siangthou Toupa \ V Paukhansiam
4. Khuamial gamte \ V Paukhansiam
5.Hong kem in Pa aw \ V Paukhansiam
6.Nuamsa tate \ V Paukhansiam
7.Vanglai ni \ Rev Rouding Pudaite
8.Muanna suangpi \ V Paukhansiam
9.Kong phat hi \ V Paukhansiam
10.Khamuan Pa \ V Paukhansiam
11.Nuam den ta ding \ V Paukhansiam

Hiai Gospel Video CD hih a la-thu hi'n a lim-te hitaleh, eimi a lak a ahoih leh changkang pawltak ahi hi. Huaiziak in, entu leh ngaikhe tu-te'n hiai album leisak chiat leng, chi'n i ki ngen hi. Lamka ah Laizoms dawr leh cassette zuakna munte ah amuh theih ding. Heutu-nu Lia Chingmuankim Shoute kiang ah leng amuh theih ding.
Siamsinpawlpi.org

© [ v a p h u a l i z a t i o n ]

S Pauginmuan: Khangthak te' kinepna

A min a zaakmai un leeng nungaak nou tampi te a liingzou uh. Nungak piching deuh te lah ana nui hiau zeel ua. Lamka khangthak te' lak a min laklak a min kikhawng tam peen leh pai peen Pauginmuan ahimai hi. Ahia, a "min" hia, a "aw," ahihkeileh a "meel," chih theihlouh diing khop hial in Lamka khopi, Zodawn, leh khoveel mun tuamtuam a om Zomi te' huihkhua a zeelsuak zou hi.

Pauginmuan ahihleh tulai deuhmai, khangthak laasiam i lak a i suan mahmah khat ahi. A music video Tulvuah (2002) leh Sakmeel Etlawm (2006) te'n a dinmun saangtak in a vawktou a, niamkiak sawmlou in a kal saang touzeel lai hi.


Kum 10 veel paita in i music dinmun a khing mahmah, a chihtheih. 1970s country leh 1980s rock music te' influence-na nuai ah i musician te a om ua; 1990s bullam a kipan in country music paidaan zui a laa gelh, laa kaihbawl, i laasiam te'n i music khoveel a honluah uhi. Huai hunlai a i laa kaih leh a paidaan te, khangthak, MTV khawng enen te'n ngaihtaak a sa mangkei uh. Khoveel kihei zeel in music genre chi tuamtuam a a hon heekkhia a, huchiin, khangthak te' laa deihzawng leh huai hunlai a i laa paidaan te uh kaal ah guam zapi a kikhung hi.

Huchih hunlai in, ziing daitui in a taak, louhing selthak bangmai in S Pauginmun a hong dawnkhia hi. Amasa peen diing in, aman eilak a a omngei nailou, sentimental rock leh pop rock tawndaan a hon poluut hi. Atung a igeen "kigam laatna guam" a hon zomkhawm a, khoveel polam leh hunthak toh kimil deuhmai in laakaih a honbawl a, music leeng kituak takmai in a hon remkhawm hi. Huchiin, i music khangthu ah bung thak khat a hong kipan ngaalmai.

Eimi laa paidaan, huaibeel, “chaang 1 na ah vual 4, a zoh a thunon, azoh, chaang 2, vual 4 mah, azoh a thunon, huchia lead solo, azoh a thunon, huchia bei” chih daandeuh ngen a pai peen Pauginmuan in a album masa, “Siallouh Vangngaih Vol I,” 1999 kum a hon honkhiat in a kipan a hong kikheng hi. Hiai album a hong chituam a, a changkaang mahmah. Laa kaih te leeng eimi laa kaih naraan te daan hilou in, tumlam gam te khawng toh a hong kizawitawn mahmah mai. Hiai album ah I simthu chiam, Nang ngai in, leh Aw Thelina, chih te a thangdiak hi. A aw toh a kaih kituak di’n a bawlsiam a, music zawi tak leh nalh takmai in a zeem a, hiai album tungtawn in Pauginmuan in, i Zo music hunlui a kipan hunthak ah kal a hon suankhiat pih ta hi.

Pauginmuan chituam na mahmah khat ahihleh a sanggampa, Pauthianlal toh a kibang mahmah ua, a lungluutna uh kibang in a thilhih kheempeuh uah kiton in a pai helhel uhi. Ahi a, mite’n amau unau a theihna uh ahihleh a meel hoihna uh ahi peenmai.

Huchiin, a kumnawn 2000 in “Siallouh Vangngaih Vol” II a hon bawlzom nawn hi. Hiai album ah, Kimneu Shoute in laa bangzah hiam a va sakha a, tuaziak mah in a pai peetmah hi. Nihgel Itna leh Sian in Siam Hen in michih lung lawngkha ahingei dia, kam nei ta phot in sa souhsouh mai hileh a kilawm hial hi. Adiak in, Kimneu toh kituaktak mai a a kidawn hialhial na uh, Nihgel Itna bang.

2001 kum in a thumveina di’n “Tulliim” hon pawkhe nawn a, hiaileeng ama a te bang in a honglaar mahmah nawn hi. Hiai album a laa teng lak ah Tulvuah a thangdiak hi. Music neem takmai a luang hanhan, aw thuum hanhan sim tak a awi hiauhiau, hih haanhaan, sa heuhheuh, a thu chiik mahmah, thuuk mahmah… Tuni tan in hiai laa ka ngaihkiik chiang in ka chi huum a thouzou lailai. A video thak, Sakmeel Etlawm, Azahhuai Thangboi Mangte’ saksa a hon remix thak peen bang, kaal teng phial in Lamka a cable te ah deih a teel om gige zou hi. Eimi, mp3 ngaihtheihna tawikha te’ fawn ah leeng hiai laa a om teitei. Tulai a laa luunpeen leeng ahibok. Trahtrah mai. Khangthak te’ ngaihkhiat utzawng a thei mahmah hi.

Ataangpi in laa kaih te amah toh a naupa, S Pauthianlal in bawldeuh ua, music mah leeng amau unau in a tum ua, a khente Heutupa Gouhau leh TG Lian te’n a bawlsak uhi. Thu te ahihleh atamzaw Emty Shoute leh Angmalas te’ gelh ahi. Tuni tan in a laa teng lak ah video hiaiteng bawl ta hi: I Simthu Chiam, Nang Ngai In, Aw Thelina, Tulvuah, Phualva Dungsuun (feat. Biaksang), Tung Solkha, leh Sakmel Etlawm. Amah hi a sapian a fuh a, chimai ni, a hampha a, i chidia, huaimai hilou in lemchiin daan a siam mahmah zomah laitei a. Camera maituah in, zeitak mai in a honsa a, a hong kiheek ngaingiai zeel a, tamtak te’n a video kia le a kinaamtaakpih thei hial uh.

Ama’ album 3 teng baan ah Pauginmuan in “Dual Ballads,” “ZAA - Semkhawmni Vol I, ” chih te leh adangdang ah mi tuamtuam toh laa ana sakha ta hi. A album bawlsa te cassette in Lamka a Laizoms Musika leh Zasang Recoring Studio ah chik laipeuh in muhtheih diing.

Aman a geendaan in a neu apan music ana lungluut chi a, a album bawlsa teng leeng summeet bawlna lam hilou a lungluut paipihna lam hizaw in geen. Huaiziak tak in, a hun paisa te a etkiik chiang in kisiik luatna diing neilou hi. Himahleh, a laa khumsa te deihbang a sound quality a hoih zohlouh ziak in puahphat lunggulh mahmah hi. Tulel in aman album thak bawlsawm in kisa lellel a, tukum sung a bawlkhiat zoh kineem hi. Ngaaklah huai hitaveen!

I gamlei lam chiteng a tuantual in a om a, thilhihna kheempeuh ah avan leh asum diing kiningching lou in i omlai ua, hiaikawm a kipan hong khangkhia S Pauginmuan in, a laa te – a thu, a kaih, a tumging, a lepkhawm daan chiteng – tungtawn in i music dinmun a hon tawisaang a, namdang te’ lak a phoukhiat saam kisuanlah huai hetlou di’n hon pawkhia a, khanglui-khangthak vai kiton helhel a paipih in, i tumging leh zailaa te khangthu ah ama’ a di’n mun kiptak mai a hon khuatkhia hi.

H O U L I M N A
Mimal taangthu

1. Min: S Pauginmuan

2. Pianni: December 11 (Sagittarius)

3. Pianna mun: Zogam, Lamka

4. Tua na omna mun: Zogam, Lamka

5. Nu-leh-pa’ min: Lolia, S. Khamkhomang

6. Siamsinna munte: BCA(2002-2004) BDPS, Shillong; XI - XII Rayburn College, Lamka; Class A-X, CTHS, Lamka

7. Tulel a zil/sep: Tulel in Computer Works lam ka buaipih deuh

8. Na hobbies: Batminton kimawl, Snooker/pool kimawl, Music bawl leh laa sak

9. Na hun awl in bang na hihsek: Hun awl in Music ngaih leh laa sak, TV et, baanah neektheih neekkawma tut maimai khawng ka hihzeel

10. Music bangchi daan a ana lungluut kha, bangchik apat: Ka pa’n ka neulai un Guiter leh Keyboard tumdaan honhilh a, huai apan in tutan music sal ah ka na taang den. A khonung in hiai saltsanna apan tatkhiak honsawm mahle uh kuama'n hontan khezou nawnkei uh. Still then, I have survived mentally,physically and emotionally due to music.

11. Music instrument bangbang na khoihthei: Guiter, Keyboard leh Drum te ka khoihthei deuh

12. Laa siam/music tumsiam khoveel ah kua na ngaisaang peen: Eric Clapton, Bryan Adams, Lucky Ali leh a dangdang

13. Music genre tuamtuam ah bangchidaan te na ngaina: Sentimental, Country leh Rock ka ngaina deuh a, hilehle a taangpi in music teng ka ngaithei

14. Ei Zomi laa siam/tumging siam kua na ngaisaang peen: S.Chingnu ,Gouhau

15. Eimi laa nalh na sakpeen khat: Leitheih Zontheih Hilou - Paunou16. Ngaihzawng na nei hia: Nei ve thou e… (Assssaaa!)

Thukhotaang
1. Lamka leh i Zogam ah eimi laa te khawng saang in Mizo te laa khawng a kithangzaw a, a tom in geenle, Mizo imperialism khat ahimai a, a culture uh honzuak naak mahmah mai uh.

Ei lam laa te’n phazou lou lua i bang na sa hia? Hi, pha zoulou lua kasa. Laa lam kialou ah leeng magazine lam hi’n line dangdang ah leeng, kuapeuh khanloh hun mahmah ta hin ka thei.

2. Bangchi’n i music dinmun i khangsak thei dia? Banglam a panlaak kisam nasa?

Kipahtawi daan leh kitawisaang daan siam i poimoh mahmah un kathei. I laa sasiam neihsun te’n haksa tak a honbawl khiak uh album te teisawn tawmtawm lou in ahi didaan tak leh phatuamngai tak in leisak siausiau theizeel le kipanpih tuahna khatleeng hi di’n ka gingta. Huaibaan ah, i media lam un leeng ei lam laa mah a nalh peen hi in hikei taleh leeng uang bawl le. A thulam gelhsiam ten music magazine bang bawl theile achih huai. Ahihtheih naikei lehleeng tua i magazine neihlel te tungtawn in laa/music lam uang bawl deuh in kihaanthawn daan siam le music lam ah khangtouhna om thei di'n ka gingta.

3. Mabaan ah bang tup deuh na nei?

Mabaan ah music line lam mah ah pai katum. Ahihtheih leh music studio bang bawl ka lungluut.

4. Music album na bawlkhiat leh laa nana sakkhiat taak te apan in bang zilkhiat thak na nei? Na album na khawng hoihthou in na thei hia?

Mipi te’ response bang hi’n na mu?Sum dawnna dan a profit lam et in, album bawl a phattuamna tuta dih in ka thei kei. Lunglutna a lianzou khop a i na bawlzeel chihthu hiveen. Ahi a, mihon thei zaw punbeh deuh uh.

Ka album anei zaw koikoi hiam ah om zeuhzeuh sam uh. Hilehle a sumlam kimu hoih hia chihbel ka theikei. Mipi te' response ahihleh honphat a hunkhop a omlai un i nunglam ah hongeen sia hunkhop a na omzeel ua.

Lungluutna bawlkhiak/hihkhiak chu bangteng hileh lungkim huai in nuam veve!

5. Khenkhat te’n i laapau a mang kuankuan te kepbit hoih ahi, a chi ua, khenkhat te’n lah tulai vai deuh a laa kaih(tune) i bawlchiang in lapau thuuk lawte a kilawm kei, a chizeel ua. Hiai tungtaang ah bang a na ngaihdaan?

I laapau uh kepbit ahoih kasa. Laa kichi, athu ahoih ziak a nalh i sak a om a, akaih nalh i sakziak a athu hoih lotel kei lehleeng nalh i sak a om a, a kaih toh a laapau zat a kituak ziak hiam in leeng laa khenkhat nalh i sak a om. Huaiziak in, a laa bawltu’n a repsiam naak leh kilawmlou ka sakluat a omkei.

6. Zawllaa leh Pathian laa sak tungtaang bang a na ngaihdaan?

Honbawl tu phatna leh ngaihna Pathian laa ahihleh a sa thei teng in chihtakna toh i sak di mah ahi. Zawllaa ahihleh mihing leh mihing kaal ki-iitna/ngaihna laa lel zaw ahi. Himahleh ,iittheihna leh ngaihtheihna mihing kia lou, ganhing tanpha in leeng a nei chih i thei. Iittheihna leh ngaihtheihna nei ngeei dia Pathian bawl i hihna uah, laa a va sakkhiak bang a siatna a om a?

Khoveel a piangkhia mihing te hiai iittheihna leh ngaihtheihna buaipih khalou leh neilou a om din ka gingta kei (a om khaak leh leeng bawlkhelh hiam mi banglou hiam hi'n teh!) Athu gelhsiam te’n athu in agelh ua, a geen siamt'en agern ua, achiing thei te’n a action in a lakkhia ua, a laa a sathei ten laa in honsa ua, chiin dan tuamtuam in hiai iitna/ngaihna pen i lang sakzeel uh.

Khotaang leh saptuam lam daan in tehkhin ta le. YPA lam a phatuamngai mahmah saptuam lam ah leeng a phattuam ngaihna a suah theih leh, bang a se dia… maw? Ahi a, amun leh ahun tuamtuak a nei uh chihthu ahi. Bangteng hileh zawllaa sak ah siatna a om kei. A satu te ah kinga peen hi'n ka thei.

D I S C O G R A P H Y

1. Siallouh vangngaih I ( 1999) / Produced by Chongbiak / ZRS Rec. Studio

2. Siallouh Vangngaih II (2000) / Produced by ZRS / ZRS Rec. Studio

3. Tulliim ( 2001) / Produced by Nu Ngaizavung / Roulngul Rec.Studio

S I N G L E S

1. Phualva Dungsuun (with Biaksang) / ZAA - Semkhawmni I

2. Nihgel Itna (with Kimneu Shoute) / Siallouh Vangngaih II

3. Sian In Siam Hen (with Kimneu Shoute) Album / Siallouh Vangngaih II

4. Ngaih lah ngai veng (with Nengzachin) / ZAA

5. Sul Honghei In (with Mimin Baite) / Dual Ballads

6. Tung Solkha

7. Sakmeel Etlawm

[A laa sakte paakta a, kupnop nei hiam, thuzaak nuam ut himhim a omleh, sona_pgm@yahoo.com tungtawn in leh +919856406331 ah chiklai peuh in a houpih theih gige diing]

Ka pa’n ka neulai un Guiter leh Keyboard tumdaan honhilh a, huai apan in tutan music sal ah ka na taang den. A khonung in hiai saltsanna apan tatkhiak honsawm mahle uh kuama'n hontan khezou nawnkei uh. Still then, I have survived mentally,physically and emotionally due to music.

S . P A U G I N M U A N

[© vaphualization / laaksawn phallouh]

Muhchil Pan: Muanlal

MUHCHIL PAN

Muanlal

Vega Studio, Aizawl

June 17, 2007

Produced by Khanthang Paite

Audio CDs & Cassettes

Genre: Pop

Rating: ****

Innlam ah omlou a, Zogam.com leh Laizoms Musika khawng ana en ngeilouh na hih lebel na chaan lian mahmah maithei. Tulai a Lamka leh a sehveel a khangthak te' haipih, laasiam hongdawn khethak panpan, Muanlal thei khalou na himai diing. Lamka a cable tuamtuam te leh, a tung a i geen website te apan a debut video, "Muhchil pan" laa hong kikhahkhiat a kipan, Muanlal in khangthak te' khoveel a honluah panta.

Mi te'n a laa ngai a, a video a etchiang un, "Hiai mipa zaw a naupang lua! Laa a siam lotel, mabaan limchi tak nei eive," a chi zeel uhi. 1989 kum a piang ahi. Neemtak a sak hialhial, a saanna mun te a leeng neemtak leh zohthoh deuhmai a bohtouh vengveng, leh awi ngiaingiai a siamzawng ahi.

Muanlal in a music album masa peen, "Muhchil Pan" June 17, 2007 in hongkhia hi. Hiai album a U, Khanthang Paite, tulel a Churchill Brothers Club, Goa a kimawl in a bawlkhiat sak ahi. Vega Studio, Aizawl a May-June, 2007 kikaal a a khum ahi a, music tum siam takmai Larry leh Ruata te'n fiahfai deuhmai a a bawl uh, leh Mamuana in kitel takmai a a repkhawm ahi hi. Muhchil Pan album ahihleh CD leh cassette in Lamka khopi mun tuamtuam ah muhtheih diing.

Amah, Muanlal in a geendaan in, a album, CD in copy 300 veel bawl a, tua te khawnggai ta a, audio cassette 200 a bawlna lak ah bangzah hiam omlai hi. Laa bawlman in a vek a kigawm in Ch. 20,000 veel seengbaan a, Ch. 60,000 veel muhphaak kineem, chi hi. Ama'n Pathian panpihna toh a album khawng hoih mahmah hi'n kithei a, mipi te a kipan haanthawnna naaktak in dong hi.

A neulai, kum 4 a phaak a kipan Muanlal music ana lungluut a, tumging leeng chi tuamtuam tumthei hi. High school a kailai in leeng function tuamtuam ah pawl kibawl in laa ana sa zeel uhi. Tulel in New Lamka ah khosa ua, Rayburn College ah class XI (arts) sinlel hi.

Muhchil Pan album sung a laa 12 om te lak ah nih chihlouh aman a kaih a bawl vek ahi. Thangboi Mangte' saksa, Oho! nang nana hi maw peen remix thak a, ladang khat mah vai laa khat lasawn hi. A laa te a baanbaan a i ngaihchiang in a siamna kingaikhe deuhdeuh hi. A om hiauhiau deuh te ngaina mi ahihziak mah in a laa te ngaih a hahdam ngeimai. Zawi deuh mai a luansak hiauhiau a siam a, huchi lou in a om trahtrah deuh, kawng sawi hahhah theihna diing bang leeng laa 3 veel a om. Adiak in "Gaalkhua in donveeng" chih peen bang, kei kia a ka ngaihkhaak chiang in ka na kisawi hehhah zeek sek hi. S. Pauginmuan in a remix thak, "Sakmel etlawm" laa toh kidem thei mahmah di'n a ginhuai. Pop lam ngen beithei ahi maw, na chisim maithei. Ngaisin himhim ve. Rock bang le siam lawtel thou eive. A aw in saang a zou a, a burbur lamdeuh te hihna di'n a aw in a chinlah tuan hetkei. Saang vengveng thei eive.

A laa masa peenpeen, "Muhchil pan" ahihleh 2005 kum pek a kipan a bawlzoh taak ahi. Hiai "Muhchil pan" laa pen a video in bawl a, tualou a dang te bawl nai tadih lou hi.

Vaphualization toh a houlimna uh laaksawn hiaibang ahi.

Mimal tungthu
1. Pianni: July 16, 1989

2. Pianna Veng/Khua: New lamka

3. Tulel a omna mun: Hebron Veng, New Lamka

4. Nu-leh-Pa min: T. Donglam ka pa ahi a, ka nu ahihleh Chinngaihching ahi

5. Siamsinna munte: Rayburn College Class XI; Rayburn High School Class X; Blue Star Academy Class IV – IX; St. Paul’s Class A - III

6. Lungluut zawng: Laasak

7. Hun awl a thil hihsek: Ka hun awl in Laa ka ngai sek

8. Music bang chidan a ana lungluut kha: Kum 4 ding khawng ka hih a kipan in music lam ka na lunglut kha pah a. Guiter khawng ka lunglut mahmah a, kum 12/13 ka hih in Function na khawng ah Band in laa ka sa sek uh. Huai ah Lead Guiterist khong in ka pang zeel

9. Music van bangbang na khoihthei: Guiter, Drum leh Keyboard ka khoihthei

10. Khovel ah laasiam kua na ngaisang peen: Khovel a laasiam teng lak ah Sonu Nigam ka ngaisang pen a amahmah in a hon inspire zou pen hi in ka thei

11. Music genre deihzawng: Pop music

12. Zomi laasiam ngaisang peen: Khentuam ka neikei a, ka ngaihsang dan a kibang chiat

13. Eimi laa nalh na sak peen khat: Duangzen Etlawm (Benjamin Thomte)

14. Ngaihzawng na nei hia: Tuta dih in zaw ka nei nai kei (Ehem! Ehem!)

Thukhotaang
1. Lamka leh i zogam ah eimi laa te khawng sang in Mizo laa khawng a kithang zaw a, atom in geen le a culture uh a hon zuaknaak mahmah mai uh. Eilam laate’n pha zoulou lua bang na sa hia?

Pha zoulou lua kasa mahmah. Aziak ahihleh, eilam te ki promote dan a kisiamlouh baan ah eimi laa ahihleh nalhlou di mawng a ngaihtuah mawk i hihman un. Tua Mizo te ahihleh, a mite khat un laa a sak leh asiam leh siamlouh thu in thu polou in promote pahmawk unchin. Alehlam ah Mizo te ahihleh state khat nei ahi ua, mi le a tam ua, kitawisang dan a siam ua, baan ah amau a ding in leng eilam toh teh in a market uh alian mahmah mai.

2. Bangchi'n i music dinmun domsaang thei dia? Banglam a panlaak kisam na sa?

Tua i Zogam a i musician te ahihleh a siamthei mahmah mai ua, ahihziak in idea/style lam ah i na backward deuh kha uh chih manthu. Kei muh dan in i siamlouh pen uh ahihleh a mixing thu ah ahi. Midang a toh teh in kei' muhdaan in mixing kisiam zou nailou in ka mu. Music leh mixing ahihleh i singtang pilna uh zanglou in a zatdaan diktak zilphot peuhle nalhmai di'n ka gingta. Mixing kia gentak louh a music mahmah leng zil beh hoih ka sa. Huchi hileh Music lam ah hi’n thil tuamtuam ah i develop mahmah ding in ka lam en.

3. Mabaan ah bang plan na nei a?

Maban a ka plan ahihleh album khat bawl ka tumnawn ve. Promoting Concert bang neithei hileng ka ut mahmah khat ahi. Zawl laa hi in Gospel hita leh Album bawl tuak ka tumlai.

4. Hiai music album na bawl khiat in thil zilkhiak thak khawng na nei hia? Na khawng hoihthou in na thei hia? Ahihkeileh mipi lam a pan bang response na ngah a?

Zilkhiat thak ka neitham. Huai ahihleh mahni deihdan kia paipih lou in, mi' te deihdan in bawlle paizaw laiding ahi. A san ahihleh a leitute mipite ahihman in. Baan ah huchideuh a sak ding eive chihbang ka zil khia. Huailou in, Pathian panpihna toh khawng hoihthou hi'n ka kithei. Mipi te a kipan in motion picture om hileh chih bang ka za a, huaiziak in motion picture bang le bawlpah ka sawm.

5. Khenkhat te’n i laapau a mang kuankuan te kepbit hoih ahi, a chi ua, khenkhat te’n lah tulai vai deuh a laakaih i bawlchiang in laapau thuklua te a kilawm kei, a chi zeel ua, hiai tungtang a bang ngaih daan na nei?

Ka ngaihdan in, khat peuhpeuh poi kasa kei. Hilele i lapau mangkuan te kepbit mah a poimoh kasa. Tulai a i laate uah i laapau taktak a om kha nawn kei a, kholai pau tam a kihel zaw a, huaiziak in i laapau kulmuut taktak te kepbit mah poimoh petmah hin ka thei.

DISCOGRAPHY

Muhchil Pan (2007) 500 copies sold all over Zogam

SINGLES

Muhchil Pan apan
1. Ana e ngaih hiauhiau ****

2. Etlawm trahtrah ***

3. Gelkik in burbur ***

4. Heina peuh ah hiauhiau ****

5. Ka kinepna hahhah ***

6. Lungtuak nihgel zahzah ***1/2

7. Muhchil pan hiauhiau ****1/2

8. Ngilhmoh ning e heuhheuh ***

9. Oho nang nana hi maw trahtrah ****

10. Sulkik hei aw hiauhiau ****

11. Vangngaih burbur ***1/2

12. Zogam nuam trahtrah ****1/2

[* Ngaih taaklou ** Ngaih theihthou *** Nalh maimai **** Nalhlua ***** Nalh law peetmah]

Watch his debut video, Muchil Pan here

© vaphualization laaksawn phallouh bikbek

Tul Ngeilou

Itna diktak i chihzaw thil thupi tak ahimah ve. A baihlam kei. A kipatna a hak bang in a beina leeng a hak. Mangngilh theih ngeilouh a a omna peentak ahi a hakna. Tul ngeilou a a omna peentak kha. Huihnung bangmai a luangliam thei ahikei hi. Hiai ngeei ahi, tul ngeilou diing itna ana chihsek uh.

2002 nipi lai in "Tul Ngeilou" kichi laa in Lamka huih nasatak in a zeelsuak hi. Hiai laa ahihleh lawmta kipawlkhawm, MISHAVFIZZA chia min kilou te'n a bawl uh ahi. Sound quality chiang thei tawp, musician siamthei tawp leh laa siam peenpeen te bawl hikei mahleh, hiai laa in ngaikhe tu tamtak te' bil vut hi. A music neemtak mai a luang hialhial, aw neem takmai leh laa thu, gil mahmah te ziak hipeen di'n a ginhuai.

Mishavfizza ahihleh K Muanlal, Sonlian Tangpua, Samtelun, Soson Valte, Steve Guite leh Suanlal te ahi uh. Tumging lam a siambiikna nei lua hikei mahle uh, laa leh tumging tungtawn a pau-leh-haam kepbit, puahphat leh tawisaang tupna ziak a pawl hong kibawl ahi ua, minthanna saang mah in tua i geen te ngaihkhawk in nei zaw uhi.

Mishavfizza min in laa nih khum khe ta ua, amasa peen "Leel Chimlouh," Lengtonghoih Studio a a bawl uh ahi. Hornbill Cable Network (HCN) in a video bawlsak a, hiai laa tungtawn in a min uh hong kithei khepan hi. Hiai laa ahihleh leeng ki-ngaihlai laa ahi a, lungkuai takmai leh thuuk takmai ahi. A nihna peen, "Tul Ngeilou" ZRS kibawl ahi a, a video Uptown (Bungmual) te' laak ahi. Lamka khopi a cable tuamtuam ah a luun mahmah.

Hiai "Tul Ngeilou" laa ahihleh saanneem laa, gil mahmah leh geen tampi nei ahi. Zawlla kia ahi kei a, i khotaang dinmun leh i siamsinna dinmun a kawkkha hi. I teenna gam ah siamsinna nasatak in a puuksia a, a neizou kichi liai teng in gamdang ah zilna saangzaw delh in i paikhia uhi. Huai in i khotaang uah azawng-ahau kaal ah kikhenna gui thupitak a hon zaamsak. Gamdang a paizou te a di'n nuam law mahleh, a pai zoulou te a di'n kingaihsiatna leh khanvual een ngoihngoihna nasatak a tun hi. Tua kikhoukhiatna kaal a itna a hong kigolh khaak zawkmah chiang in thuakhak diak diing hi. Hiai bang khotang vai leh itna vai kaankhawm in laa phuaktu te'n zawlla dan in honphuah uhi.

Hiai laa ahihleh mikhat in a thiltuah ngeeingeei apan leh a lungtang tawng apan a hon gelhkhiat ahikei a, thil hithei leh omthei mah ahi, chih lahna dia gelh ahi zaw hi. Thiltuah hizawlou in suangtuahna apan hong piangkhia ahizaw. Ei Zomi laa ana kiphuahkhe teng lak ah "research" nasatak bawl hial a kigelh omsun, hiai laa ahidiam, chihtheih phial abang. Aziak ahihleh laa phuak tu te'n, tulai zawlla te a et vengveng chiang un, lapau om mang nawnlou, a omsun te leeng adik-atang zang om nawnlou in mu ua, upa bangzah hiam leh laibu hunkhop kaikhawm in, thumal tuamtuam zongkhia in lemkhawm ua, tua te pansan in hiai laa hon gelhkhia uhi. Adiak in, laa dawng thumna a, vual thumna a "Thelnah kiat nu'ah gam tulta zaangtuum vuai" chih bang, khangthak te a thei tam hetlou diing hi. Huaiziak in, hiai laa ahihleh, a gil mahmah, a mang kuanta, i laa kammal te kepbitna leh pholhsuah thakna hoihtak khat ahi.

A laa taangthu ensuk ta lehang. Dawng khatna leh nihna ah. A lawmnu, a laisimna munlam zuan a a pai ni'n a lawmpa thawmhau lua, om didan theizou mahmah lou hihtuak. A nih ua hunnuam zang sawt manlou a a hong kikhen mai uh pawna peetmah hi. Lawmnu a paidek kuan in, lawmpa'n bus khawlna mun ah va khakhia a, pai taktak dia hong kisak hial chiang un lawmnu'n khelah lawtel in a mit apan khitui nan vuallouh in hong bawkhe zoihzoih mai hi. Tua a ngaihzawngnu' mittui hong luangkhe zungzung te'n mipa' lungtang tuum hial hi'n a thei a, thuak hak asa mahmah.

Hong kikhen ta ua, a omna munchiat uah lungleeng tak in om mahle uh, kipahna leh lametna a nei tinten uhi. Nitak a sol vaak singseng te khawng a et chiang in a tangval pa'n a nungak nu' meel vaak muthei hi'n a kingaihsun zeel a. Meipi'n bangchi zawng teng in tuamkhum mahleh a kawm a kipan in tua solnou hongtaang thei veve hi. Tua solnou vaak ngeei ah ahi, a beithei ngeilou diing itna a kilat khumzeel uh.

Dawng thumna in a tangval pa' lungleen daan geendeuh hi. A lawmnu omlou ahihchiang in amah su kipaak diing mi om nawnlou a, a kiimveel mial in tuamvek hi'n a thei hi. Nisa in gamlak a tuum kung naaktak a a haai chiang in, tua tuum kung hongkeu a, a nah teng hongpulh hi. Huaibang deuh in mipa leeng kingaihsun hi.

Himahleh, a thunon-sakkiik ah a thak in lametna hon neithei zeel hi. Huaibel, haksatna bangteng tuak mahleh, a lawmnu ama' a dia ginom gige ahihdaan phawksuah a, tua in thathak guan zeel hi.

Hiai laa ahihleh, i zawlla ngeina daan te uh toh a kibang kei. A himhim in, i zawlla te uh, a tamzaw, 98% bang, kikhenna laa ahi mawk hi. Kingaihsiatna, kikhennung a kisapkiikna, leh kikhen ziak a kikousiatna ngen in a dim hi. Himahleh hiai laa bel, khoveel a Pathian' thilsiam thupi peen IITNA pahtawina hipeen hi. Haksa bangteng palnung a leeng lametna omthei gige ahihdaan hon taaklang hi. Tua kia hilou in, i khotaang leh siamsinna lam a kikhoukhiatna uangtak om bang.

Hun hongpai zeel diing a, i gam hong changkaang diing a, khangsawn te'n hiai laa a hon ngaihkiik chiang un, "Aw, nidang a siamsinna dinmun ana hichi eivele maw... Khotaang ana hichi eivele maw..." chih hon theithei diing uhi. Baan ah, hiai laadawng in a tuun, lapau gil taktak te bang, keembit in hong kisin siam diing uhi.

A laa gelhtu ahihleh MISHAVFIZZA pawl te'n lungtuak a a gelhkhawm uh ahi.

L Y R I C S

TUL NGEILOU
Siamsinna tual zuan a khaubang n'on chiahsan ni'n

Khattang in i vaang kholai ah hambang vai veng

Lungsim ngaihsutna mumal ka neithei nawnlou

Kua siang ka zuanta dia?

Lungtuak heikhawm a houlungkup chim manlou in

I leenna mual hongdang mai zaw a poingei maw

Daitui bang siang na maimit luankhi hongluang khia'n

Kei' sinlai khang damtui bang hongtuum

Zaan a solnou bang

Lummei kawm pan iitna meivaak n'ong taan a

A tul ngeilou diing iitna n'ong laan

Hizong tak a meel mulou

Kei ka suih lungzuan saangsawn lel e

Nang tellou in ka nunna muikhua khimbang ziing

Kei' ma ah tuanglam ka zui theilou hongleen in

Thelnah kiat nu'ah gam tulta zaangtuum vuaibang in

Taang nisa khuambang ka dou zoulou

Zaan a solnou bang

Lummei kawm pan iitna meivaak n'ong taan a

A tul ngeilou diing iitna n'ong laan

Hizong tak a meel mulou

Kei ka suih lungzuan saangsawn lel e

BRIDGE

Khaimu bang in ka siang hongleeng in

Zaan a solnou bang

Lummei kawm pan iitna meivaak n'ong taan a

A tul ngeilou diing iitna n'ong laan

Na sakmin malbang k'on kou

Mual zatam hal kei ka heina pan

Watch the video here