June 12, 2008

Sir Lengtong Pauno Pahtawina In

-Haumuanlun Samte

Zomi te' Pathian kiang ah siamna chi tuamtuam a Zomi te a honvukna leh hiaibang a mi thupi a honpiak ziak a kipahthu geenna thuumna neih ahihkhit in, mipi mai ah sap in a om hi. Lengtong Pauno! Mipi te'n khut beeng zuazua in ana vaidawn ua. Huchiin a hong kilang a. A hongpai niitniit a. Ameel leh a hong khohei daan apan kilawpluatna leh kithupisakna bangmah a kilang kei. Kingaihniam meeltak in tua paungaihna a honleen hi.
Hiai ahihleh Lengtong Pauno Laasak Silver Jubilee chin lopna hun ahi. November 11, 2006 ni ahi a, amun ahihleh EFCM Hall, Tahaan khopi, Kawlgam ahi. Dohkaang tung a puankhai ah "Sunflower Music Production leh Minuamsa Video Studio" kigelh hi. Music ahihleh Falcon Band te' bawlvek ahi. Falcon Band te: Deihpi - Lead, Zekhe - Bass, Thawn Thang - Keyboard, Khuppi - Drums ahi.

Bangchi dan hiam in a CD ka kiang a hongtung kha a, huai ka etna apan mimal muhdan gelhdia hong kisa hi khanglaang veng aw. Hiai a laa kisa te a hongthang mahmah mai a, et theihna leh ngaih theihna nei kheempeuh a video keem khalou om din ka gingkei. Nidang pek apan Pauno ana ngaisang, a laa thu te lungkuai thei sa a ana paakta, leh tulai a khangthak Pauno theikha lou te lak a Pauno i chih kua, a tangchin bang hi hiam, eite adia bang a a honpiak, chih leh a laa te'n i laipau bangzah a khangsak hiam chih dotna i lak a a hong piankhiat theih, hiai thugelh in a tup ahi.

Classical nalh takmai in a hong kizuut a, huchiin "Ka neulai in khomui kuan in ka lawmte toh ka kimawl theizeel ua..." chiin mitsi diaidiai kawm in a honsa hi. I neulai pek apan i na theih mialmial, tu in a satu, Pauno ngei in a sak i honmuh hial leh bangchi hiam khat a ki om hiveh aw.

Geen dan di le ka theichiah tuankei. Huchiin, Leitheih Hilou, Meitei Guun A Kan Mateng, Na Voh Bang Na Aat Diing, Sen Lehkiik Theileng chih te a omna mun, stage tung apan a honsa ngiaungiau hi. Mipi te tokphuur hiam leh bangchi hiam in omkei mahleh, munkhat a ding maimai a, amah lungsung ngei apan hong pawtkhia laa a gelh, a kaih a bawl a sak te'n, tua Tahaan mipi te a lawn mai hilou in, khoveel mun tuamtuam a a video en kheempeuh te a khoihkha mahmah hi.

Delhi a sinlai khat toh ka genkhawmna uah, hichiin a chi: "Lengtong Pauno' laate athu ngaih ka sathei mahmah. A laa kisa ka zaakzual lel chiang in leeng, ka lungsim a khawlguih abang hial hi! Aziakbel, leitung a mohpuakna bangmah neilou a, 'Nuizeel in kapzeel a ka omlai, ka seenlai hun' apan laa ka theih masak lawi, ka khankhiakpih laate ahihziak in. A laathu ka ngaihtuah (man)louh nikhua inleng, diiphawm thei ngaihtuahna a hontun naak."

"Ka neulai in Pauno bang a laagelh siam hih a, mite' lungkhoih diing leh a kahpih theih diing uh laa gelhtheih bang ka na ut sek. Himahleh, ka ngaihtuah thakthak chiang in, amah bang a lungleng mi hileng, ka pozou din ka ki gingta kei. A laathu te hoih ka sak zahzah in amah ka ngaisaang a, amah ka ngaihsaang zahzah in amah bangbang a lungleng tak a om diing, pasal ka hi na a, ka ngamkei," chiin lawmdang khat mah in geen hi.

Mi lungleeng thei amah, Lengtong Pauno ziak ngei in i Zo thu-leh-laa leh ginglawm te nasatak a sukkhan leh suk hauhsak in a om hi. A laa te ahihleh laa kia ahikei a, thutuun thuuk taktak nei ngen ahi uh. Ama hinkhua a a thiltuah te apan a gelh ahi a, mihing leh mihing kikaal a kitanauna tuamtuam bang, mihing leh khotaang kaal leh Pathian toh kaal a kizopna te a geendeuh hi.

Gelhbeh didan tuan ka theikei. Lengtong Pauno' laa te thuukdaan theitel thei din ka theihsiamna in a baankei. Ngaih tuahtuah in, suutsuut in, gelh sawmsawm mahleng a laa thu te zaw ka theihsiamna khenlam pek ah a om uh. Huaiziak in, huailam hiaitan in ka khindia, abaan zaw, simtu, ngaitu leh entu te'n noumau ah ana ki sutzop mai un aw.

Hiai Lengtong Pauno laasak kum 25 chin lopna a video ahihleh a fuh thei mahmah. Fuh peen chih di himai. A thilsai daan uh a changkaang a, van te a hoihthei a, sound a fuh a, mipi a tam a, projector bang 2 tak kizang zomah. Maimai lou. Thupi lua.

Hiai video in Zomi laasiam thak tamtak khoveel theih di'n a hon phoukhia hi. Adiak in Kapno leh Sangpi bang - mimal tak in ka ngaisang a, lametna liantak ka nei hi. Kapno in "Khen Theihlou Maimit" a sa fuh mahmah. A zei mahmah a, mipi te tokphuur leh kisawidaan a siam peetmah hi. "Ka Paal Heuta" chih laa remix Kimpu leh Siantawng a sak uh ahihleh a changkaang mahmah. Zokam in Kimpu in mawitak in rap ziahziah a, Siantawng in a chaang leh thunon te sa hi. Analh diakna mun ahihleh "Et ka chim theihlouh, na maitai siusiau te, tu in ka mit ah maigum suak khinta" chihna mun a Siantawng' hih daan ahi. Nalh himai.

Falcon band te le a maimai kei uh. A kisak theihpih huai peetmah uhi. Kapno in asak "Na Lua E" bang chu a beat paidaan, rockkk himai. Lead guitarist Deihpi'n siamtak leh zeitak a kisawi kawm in a tum a, bassist Zekhe in leeng a bass taikual sak in a kisawi neknek a, Khuppi in lah a deeksam kaang leplep kawm in a drum a khen lalat a, Thawn Thang in keyboard melody nalh taktak hon luangkhe sak hialhial a. A instrument khoih uh a siamna baan uah, munkhat ah ding burr mailou in mipi mai ah perform daan a zei mahmah uhi. Huaina tak ahi hiai video a et a nopna. A etchim theih huailouhna.

Falcon band in Lengtong Pauno laa te, a music paipi peen, nidang apan ngaikhe tu te'n a cheptehna uh, a khengkei ua, a hidaan mah in a tum uhi. "Leitheih Hilou" kipatna a lead ging trangtrang peen bang. Leh "Meitui Guun " patna bang.

Paupu leh Cingpi'n "Na Min Loukha Zeel Ing" a sakdek ua a kimelh heeuhaau na uh leeng a ettaakna mahmah mun khat ahi. Piangno in "Chidam Peuhleh" a sak a, "Vaimiimchiim zong kham zoulou, gataam chiip bek mah petpet ing, aihhang phamoh kei chidam peuhleh" chi a a khuttum a liikna mun le a nalh dang khat hinawn. Sangpi' aw luandaan hiauhiau a ngaih a nuam mahmah mai. Adiak in hiaimun a sakna bang nalh ka sa: "Kamsiatna toh namdang pasal nei, zinei khaleng, Kawlgam Vaigam omkha leng, Pasian hongpiak tu-leh-ta, Zomi hihna theisak ning, Zolai Zopau sinsak ning, ahizong amasa pen Zomi mah deih ing."

Thawnkham ahihleh geentam a ngaikei. Zomi tuailai tamtak in amah be ut hial di'n ka ging hi. "Mualdawn Vangkhua" leh "Nang Na Zuanglou Maw" a sa hi. "Nang Na Zuanglou Maw" bang ka zaakkiik chiang in, nidang a adamlai a ka Pu Biaklal in, guitar tum kawm a asak hiauhiau lai khawng ka mitkha ah a hong kilang kiikzeel a.

Huaiziak in, Lengtong Pauno, aphu bangbang pahtawina i pia hi. Hiaibang a kum 25 chin lopna vaisai tu te a ngaihsaang huai lua uh. Zomi te laa leh tumging lam a meisel ana de tu, Kawlgam leh Vaigam a om Zomi te a laa te tungtawn a hon gawmkhawm, amah Lengtong Pauno, Sir Lengtong Pauno chih minletna piaktuak ahi.

M U S I C A L  P E R F O R M A N C E

1. Ka Nu Aw Nem - Lengtong Pauno
2. Leitheih Hilou - Lengtong Pauno
3. Meitei Guun - Lengtong Pauno
4. Na Voh Bang Na Aat Diing - Lengtong Pauno
5. Sen Lehkiik Theileng - Lengtong Pauno
6. Khen Theihlou Maimit - Kapno
7. Na Lua E - Kapno
8. Naubang Na Sang In - Kapno
9. Ka Paal Heuta - Kimpu & Siantawng
10. Na Min Loukha Zeel Ing - Paupu & Cingpi
11. Chidam Peuhleh - Piangno
12. Zomi Ka Hi Hi - Sangpi
13. Mualdawn Vangkhua - Thawnkham
14. Nang Na Zuanglou Maw - Thawnkham


MusikBuzz
Tulai in Zogam ah Lengtong Pauno' laate kithangthak mahmah. Tahaan a Nov 2006 a alaasak Silver Jub chin lopna hun a kisate. Falcon Band leh Kapno, Kimpu, Siantawng, Paupu, Cingpi, Piangno, Sangpi, Thawnkham te sak ahi.
*Here's 2 Sir Lengtong Pauno*
[June 7, 2008 ZogamThuthang]

June 02, 2008

Zodawn Tulliim


Zodawn nipilai iitna tangthu te aziak tampi'n a bei uh. Mahleh a tung diing teng a tunkhit chiang in, thil khat a kibang gige a om. Aksi kikhoh mah abang uh. Thangvan kimlai a vaak siilsial. Tomchik kilang zual in. A hong vaakpuap ua, a mangnawn ngaal uh.


A tuanna IndiGo in Phaipi khopi a honboh hi. Air hostess maitai siiusiau te toh mangpha kikhaak in, leenna kong ah a hongpawt khia a, a hongdaak khia. Delhi khopi lum hemhum banglou in suun nisa neemtak leh huihvot ana nung hiauhiau a, kithalawp tak in a kumkhia hi. Avan teng a khawm a, kintak in amah vaidawn a konglam a ana ngak, anu-le-pa kiang a hon manoh ta.

Anu'n a muhphet in, "Kim, na hongdam maw?" chiin ana liangkawi hi. Huchiin, anu-le-pa toh a car un Tulihal Airport a kipan a hong kitholh khia ua, Lamka lam a honzuan ta uhi. Tu in ahihleh a lung a muang lawta. Nu-le-pa te, innlum, mahni khua leh mahni mi-le-sa te omna mun ngei a nipi khawlhun zang di'n Kimbawi a hong kisa ta.

Kaal nih sung veel Lamka a a omnung in, a pute uh veh di'n Aizawl ah a innkuan un a hong zinkhia uhi. Aizawl ah kaal khat veel ava chaam nung un Guite Road tawn in Lamka lam a honzuan uhi.

Khopi ngen a khosa ahihziak in Kimbawi in singtang lam a mu ngeikei. Guite Road a a hongtai kawm un, lampi gei a mual te khawng etlawm a sa thei mahmah hi. "Novel a i sim, movie a i et te ataktak a eigam a ana omdan eivele maw" chiin a pa te kiang ah a geen hi. Suun ni sa singseng, meipi liim in mual a liah dindin te bang, leh luiluang te khawng a enchim thei mahmah kei.

Lampi khang a singtang lou a haichi pou siuhseuh te leh buuk bang, loulai a nnasem a om dialdial te bang a muh patna ngen ahi. Sava rong chi tuamtuam, singkahiang a boh te bang a digital camera in laaksawm sek mahleh a laakkhaak ma in a leeng manzeel uh. Akhenchiang in a gari uh khawlsak in lamgei khawng ah lim ava kila zeel hi. Kipaak a nui seuseu in, "Delhi ka tunchiah ka lawmte'n a en utthei mah di uh," achi hi. "Orkut, Facebook, Flicker khawng ah ka taakdia..."

Tuuktui luanlai hiven, lam kimchiang diing leng a taima un menchim nasatak in lampi ana khaak hi. Paisuak theihvual ahimai kei a, kiiknawn diing lah hitheilou, a hahsiang ua lampi a bawlhoih uh a ngaakmai uh angai ta. Bangtan ngak ngai diing ahia chih geen a haksa. Atom pen in kaal khat a kipan kha khat sung bang a luut diing. Huchiin, tua menchipna mun gei a khua ah a hong tawlnga ta uhi.

Kho hausa te inn khat ah, a gari heekpa utoh Kimbawi te innkuan a hong om uhi. Khopi a kipan a singtang a khualzin, kithalawp mahmah Kimbawi' kipahna teng a beita. Lampaina a a totkhak munte nopchi sa in etlawm sathei mahmah napi'n hiaimun a tawmchik sunglel om diing leeng a lin ngoihngoih hi.

Hiaimun ah meivaak a tungkei. TV omlou, music system omlou, Internet chihte om vetlou. Phone le zat theihlouh hilai. Gas a omkei a, heater a omkei a, ann huanna dia thuk a sing, khutak a chih nguingui ngai. Hiaiteng mai in leeng a lung a kesak khin dimdem hi. A tunni zaan bang un a ihmu thei sekei. Lamka a a innlum uh, thupi takmai bang a ngaihtuah a, Delhi a niang-leh-tai a a omdan khawng a ngaihtuah nilouh hi. Mall, showroom, theatre, McD chih te khawng a nuamsa tak a vaaklai hunte mitkha ah a honglang dundun a, ihmut sawm mahleh ihmutna in a siang a zuanthei mahmah kei.

Ziing beltak in alang-alang ah aak a hongkhuang pah cheelchuul ua, ni hongsuak a suun a hong hi a. Hihdi lah omlou, lawmdi lah omlou, chimtak in Kimbawi a om ngiungeu hi. Kisuk halh sawm in a hongpawt khia hi. A inn gei te' innkong ah tangval, ama' chia diing khat in tem in sing ana saat keuhkeuh hi. A thilhih ava en nilouh a.

Atawp in Kimbawi in, "Bang a na bawl?" chiin ava dong hi.

"Khuaibu di ahi," chiin adawng a, a saatzom zeel hi.

"Bangchi daan a?" chih dotna apan dotna dang ah kaltou zeel in singtang hindan chi tuamtuam, a theih ngeilouh tampi tua vaalnou in Kimbawi a hilh hi. Bangchi dan a hiaikhua hong paikha uhiam chih Kimbawi in agen a, huchiin a hong kitheituah ua, vaalnou in Muanthang ahihdan ahilh hi.

"Nang bangtan simta?" chiin Kimbawi in adong a.

"BA third year. CCPur Government College ah. Nang la?"

"Keile BA third year keive. Delhi University ah. Ekzam khin. Ahihleh nang bangchia kai?"

"Ekzam hunchiang a vapai zel, huchilou chu hiaimun ah sep theihtheih seem a kiloh."

Aziingchiang in Kimbawi in Muanthang' thilbawl ava en nawn a, a hong kihou theita mahmah uhi. A khankhiatna uh leh a ngaihtuahna uh kibanglou lua himahleh a hong kipawl thei mahmah ua, a theih ngeilouhte tuak uh kihilh tuah in nuam asa mahmah uhi.

Ziing phalvaak tuung in khomual lam zuan in, khogaal a nisuak khia, neem takmai te a en ua, huchiin, gophel kaapdaan kihilh in sava a bengkhawm uhi. Suun a honghi a, lou kuankhawm in loulai ah a vaak ua, tangmai, muvom, mazel leh haigah limchi taktak, athaklai ngei in Muanthang in Kimbawi a lohpih hi. Tua te buuktau a tukawm in a ne ua, a nih ua kithoh in a nuikhawm alh-alh uhi. Louvuum a mawngkung sangtak mai khawng ah a tuang ua, Muanthang in taamngai a muut vengveng a, tuahun chiang in muvanlai in a tung zawn uh ava veel diaidiai hi.

Gamlak ah vaak in thaang khawng a kam ua, theipi khawng a vilkhawm uhi. Luidung a vaak in, aisa bang a sawk ua, sanga khawng a man ua, tua luiluang sialsial gei a phazaang hing dimdim lak a tulliim nuai khawng ah khawl tawldam in maanlai tangthu leh khovel tangthu tuamtuam bang a kihilh uhi. Lui ah a hong kileuh ua, a kileuh khit un suangtung a lumkawm in ni neem hiihiai liim bang a awi uhi.

Huchiin, suunni hongtum a, khua a hongmial a, sawtlou nung in kha a hongsuak a. Guitar tumkawm in laa sa in nuam takmai in hun a honzang khawm uhi. Solkha taang siilsial nuai ah.

Huchih hunsung in a theihlouh kaal un Muanthang leh Kimbawi kingai a hong hi maimah ta uh.

Hiai khangnou nih te' iitna hong piankhiat dan leh a taangthu uh a hong kizial touhzeel diing daan, Zodawn nipi hun leh tuuktui luang te'n a theihpih kei uh. Hun paisa leh mabaan hundiing himhim ngaihtuah lou in iitna lampi, nuam leh maamtak mai hidia a gintaak uh, a hon zui panta uhi.

Agaal a kipan et in hiai iitna tangthu, a hithei ngeilou diing khat hileh kilawm maw. A tangval pa i chihchiang in singtang dawn a niamtak mai a khosa hi a. A nungak nu lah a khebul a khoveel koihthei hial khop a hausa hizeel.

Kimbawi ahihleh khoveel thak a hongteeng mah abang hi. Amah a din a thiltuah khempeuh te leh Muanthang toh a kholhkhawmna te uh, thilthak zilna leh kipahna bukim tuntu ngen ahi. A theihngeisa khopi itna leh tu a a theihthak Zodawn itna te a tehkaak chiang in kilamdanna lianpi a om hi. Khopi ging vungvung leh michih in amau thilhih chiat buaipih a kuamah kingaihsak man di leng a omlouhna mun apan suakta bang in a kingai hi. Khopi a hunteng, 24x7, a tongleng tawivial (mobile phone) hiam vannnuaizom (internet) hiam a kizop tuah gige sang in hiaimun, sing-le-lou, paak namtui, huihkhi siang laang hialhial leh tungleng vasa haam seseuh na mun a lungdeih ngaih toh hun zatkhawm in itna diktak mah dawnsuang zaw hi a thei tlat hi. Ahi, restaurant, bar chihkhawng a hun zatkhawm sang in Zo mualdung a vaakkhawm nuam a sa zawtham.

Khatvei, a nu'n Kimbawi ki'ah, "Kim ei, huai na lawm Muanthang khatvei honvaak pih ve. I mu ut thou voi," a chi hi. Suun khat Kimbawi in leeng Muanthang a omna uah a hon tonpih ngei hi. Kibawi nu-le-pa toh a li un singpi dawn in a hongtu khawm uhi.

"Na nu, na pa te kua te a? Nou unau bangzah?" chiin Kimbawi' nu'n a dong a.

Anu-apa min a geen a, "Ka pa'n gaalbuai lai in honna sihsan a, ka nu toh hiai ah ka khosa ua, ka naunu, Lamka lam ah mi' inn ah ompih in a kiloh," a chi hi.

"Ahihleh nou na nu toh bangchi'a kivaak?"

"Buh tiin 1 mun di khawng lou ka bawl ua, huchilou, ken mi' lou khawng a kuan in leh a lemtheih nana ah ka kiloh zeel."

Hiai kihouna te'n amau gel iitna taangthu kigelhna laidal, ziikkeek hithet di'n Muanthang in ana ngaihtuah pha kei. Huai nung teng Kimbawi toh a kimu kha theinawn kei ua, a omna ua ava kanchiang in leeng anu te'n "omlou", "pawt", "manlou" chi hiam in ana heemkhe zeel uhi.

A kimuhnung uh kaal khat achin in, lampi a siangta a, huchiin, Kimbawi te innkuan in khua nusia in Lamka lam a zuanta uhi. Mangpha kikhaakna bangmah a omkei. A khomual uapan Muanthang in tua gari tai a en liam a. Tua gari in Kimbawi te innkuan kia a pailiam pih kei. Kimbawi kia leeng a pailiam pih kei. A itna, a lungtang leh a hinna ngei ahih a pailiam pih.

A itpen ' aang Kimbawi in a va beel ut ngeimai. Khatvei lai. Khatvei lel. Leh a tawpna di'n. Mahleh a hithei nawnkei. Veen in a om. Khaam bikbek in a om. A liammang matan uh a mittui vuung thriuthriau kawm apan a ittpen a gaal et a.

Huchiin a mangta.

Sabang a tatna sa munte uh Muanthang in ava vehkiik zeel a. Ama a di'n a lungzuan phawngtu lel ahita uh.

Huchihlai in, Kimbawi leeng hinkho thak zang diing chi in Delhi tual a tungnawn ta hi. Mahleh a ngaihtuahna mit ah tua mundai, thoveng, galmuang leh etlawm tak mai, mual hing dimdim te, luiluang sialsial te, paak namtui hiuhiau te a hong kilang kiikzeel a; huchihlai mah in zuunlouh vangsel Zolei gam, lampi setak mai, khoveel changkanna himhim omlouhna mun leh mizawng tak te teenna mun te ngaihsutna in amah a buakkiik khazeel hi.

Hunte luitui bang in luang liamzeel mahleh a ngaihtuahna ah a mangthei mahmah kei. Muanthang. Leh suunchim lungzuan a sialkhawmna mun uh, zaan chiang zaideih a awihkhawmna mun uh, Zodawn tulliim.

© vaphualization Hiai tangthu phuahtawm ahi. Min, hihna, mun leh thiltung a kilou kha teng laigelhtu' suangtuahna apan piangkha hiam ahihkeh phuahkhiat maimai ahi a, mi kuahiam khat, mun leh thiltung toh a kibatkhakna ana om zenzen leh coincidence maimai hi di eikha aw.