April 12, 2009 in Rayburn kongtual, Lamka khopi ah Rigvedazz in a video album masapen diing "Zaching" hongkhia hi. N Thangminlian in phamta N Khupbiaklal phawkgige-na dia a produce ahi a, aw, tumging leh lemchiin tengteng Lengtonghoih Studio a kikhum ahi. 2005 in a album masa uh "Zolei Ittu" ana bawlkhe ta uhi. Zogam.com Writers Award 2008 hun a, amasa pen dia a hon sakkhiat uh, "Zaching" leh "Noplen na'ng" chih laa te khawng i ngaihkhaak a kipan, lametna liantak mai toh ana ki mitsuan a, tu in, hiai laa te tel in, a lim toh kithuah, ettheih din a lakhil piching uh a hong suakkhe ta!
Hiai Zaching lakhil ah, laa thak 10 leh tuma a ana khahkhiat sa uh, single nih om hi. Single nih te bel "Zawlla" leh "Salpha Goukhothang" ahi. Huai laa nih te mah lah Lamka khopi a duur a ana duur khin ta kha hi unchin, tua athak te'n bangzahta in Lamka kialou, khovel a Zosuan tuailaite, chibiikle, a hon nawk diam chih chu kigen thei chetlou. Ahia, mipi te' lametna a hon vuaksuah sak uh bel ginhuai hetlou.
Bangziak in?
Hiai Zaching lakhil a laa te leh video te fuh theilua hiven. Hun sawttak ngaihtuah khawl detdet a, a siamna teng uh suah a, a hon bawlkhiat uh ahihziak mah ahi diing, laa te ngaih leh et a nuam thei petmah hi. Itna laa leh nam-leh-gam ngaih laa a tuunkhawm.
Amasapen in, Rigvedazz a lasa, Rig Valte (a.h.k. Goukhansong) ' aw hoihdan kha, maimai lou ahi. Nidang a kipan mite'n, "a singer pa uh a aw a hoih mawwww..." ahihkeh "saang a zou mawwww...." ana chi vengveng mai eive ua. Suun nisa vaak singseng nuai ah, sava khat in a kha te a zaappalh a, huai nisa vaak lam zuan in a leeng tou diaidiai a, a leeng sangtou zeel a, nuamsa tak in leh etlawm tak in a leengtou hiaihiai a - huaibang mah in, Rig Valte in laa a sa. Kipezou leh thazoh takmai in a sa a, a saanna mun ah leng maamtak in a awi vengveng a, hiaibang a a hon luansak laa te mai ah bil hum ngam i omtel dia hia? Hiaisang in performance nengchik hong kizil zek laileh, chi pawl om. Hilele, ken chu, siam sa lokhin himai.
Guitarist Mangzalian chu kisawi chii ahikei na a, hilele, a khut in nna seem veh aw. A taklam khuttal leh khutpi geel toh a veilam khutmal li te pangkhawm in thil thupi takmai hon zuutkhia a, i Zogam music leilawn, sangzaw seem ah a hon dohtou hi. Drummer Hau Tonsing in a nnasep a thazoh mahmah a, tumdan chituam leh mawi taktak in a laa te uh a honzeem hi. A meel bang le hoih vervur thou inchin, kilawm mahmah eive. Perform le siam zomah lai. A video a guest bassist dia a zat uh, Muamuan kha kilawm lotel. A hihdi tak hihkha eive. Kizep didan leh om didan a thei mahmah. Bass guitar tum kawm a hong kizawi heuhhauh dan in entu te mit a taisak mahmah hi.
Rigvedazz ahihleh rock band, 2004 kumtawp lam a ana kiphutkhia ahi a, a laa leh tumging te uh rock music ngaina te a di'n kipahpih huai petmah hi. Hiai Zaching album ah, "Am in" laa a guitar te leh drum a rep dan uh a kituak mahmah. "Henkol Sut", "Laizom Itte" leh "Vonggah" ah lead guitar pa siamdaan a kithei hi.
Eimite hi, atangpi in, tumging a lunglutmi i hikei ua, a bengseng leh senglou chi in music genre i khen mai uh abang. Ka chihna ziak bel, a bengseng lam ngai theilou nu-leh-pa te a din leng hiai Rigvedazz te' laa te mullit huai lo lawmlawm lou di ahi aw. Zawichik a pai diaidiai bang le hunkhop om ahi. Tehkhinna dia, "Ngilhta na hiam" chih laa bang, zansawt nung a hoihdeuh a i ngaihleh, kah ngoih-ngoihna chi ahi. Lungzuan thelbang thou theisak zungzung maidan eive. A laa thu leh a kaih zir in, ngaikhe tu te' lungsim lawngtheihna di'n music a tum un, laa a sa siam lua uh.
Rigvedazz in a lakhil thak uh tungtawn in debutante artist nih a hon phoukhia hi. EHA/Hornbill Teen Star 2008 RDi leh gospel singer Remkim. Rigvedazz toh RDi in a sakkhawm uh, "Noplen na'ng" in gothic paidan a zuisim h'in ka thei. I music paidan chithak a hon pokhia uh. Huailou in, Remkim telna, "Zohna Laa" kaih leh a beat a bawlnalh mahmah uh. Remkim kha, a zei a, a se hetkei ka chi.
A album lamin, "Zaching" single ah Zomi te lak a lia duangzen pen hi a telkhiat, Miss Zomi 2008 a pang a, hiai in Rigvedazz te' laa te a khawng un, a paisak mahmah din a ginhuai. Miss Zomi zet a telna chu! Fuh himai!
"Vonggah" laa ahihleh minit 15 veel a sau lemchiin toh kithuah ahi a, Thang leh Ching itna simthu ahi. Hiai album producer pa' gelh ahi. Khovel ah iitna kia a thil hithei lou ahihdan a hon ensak. Thang leh Ching' itna in tangtawn daihkei mahleh, a kingaih hunsung ua ana kithuahkhakna te uh, amaute a din, a mangngilh ngei nawnlouh diing uh hunnuam ahi himhim.
ZogamThuthang in Rigvedazz te' laa lak a nalh a teelkhiat hiaite ahi.
*Noplen na'ng
*Zaching
*Ngilhta na hiam
*Zohna laa
Nang la?
D I S C O G R A P H Y
Rigvedazz - Zaching
1. Zogam Zomi ***
2. Na siang zuan in ****
3. Noplen na'ng feat RDi *****
4. Ngilhta na hiam ****
5. Am in ****
6. Zaching *****
7. Henkol sut ****
8. Zohna laa feat Remkim ****
9. Laizom Itte ***
10. Vonggah (Thang leh Ching Simthu) ****
Bonus tracks
1. Zawlla
2. Salpha Goukhothang
* Ngaih taaklou ** Ngaih theihthou *** Nalh maimai **** Nalhlua ***** Nalh law peetmah
