‘Singngat Special’ vaak a mitta

by Haumuanlun Samte

“Duhthusam i chih lametna ahikei. I lam-et phaklouh thilte duhthu a kisam ahizaw.”
-V L Mangzou

Laigelhsiam VL Mangzou in August 17, 2019 nitak dak 8.30 vel a sin natna ziak a ahon omlouhsan hun in, i gam khimpi ziing bang hial hi. Social media ah suunna thu kithehkual zungzung hi. Khenkhat adin a school teacher lui uh ahi a, khenkhat adin biakna vai leh khotang pawlte a heutu lui uh leh a seppih lui uh ahi. Police station a duty pih uh bang ana hi a, kholai a vaakpih, meltheih, lawm, WhatsApp group a chiakpih, leh inveng bang ahi. A vuina program August 18, 2019 hunzat hun ah, Mualkawi a a innkuam uah gaaltu tam petmah hi.

Mi hiaizahzah in hiaibang a VL Mangzou a suunna ziak uh ahihleh mi tam ana sukkhak ziak ahi. Amah toh kitheite adia chiamnuih gen siam, polhnop, midang panpih ut gige, phattuamngai ana hi a. Mimal a kitheihpihloute adin bel, a thugelh ziak mahmah ahi. Kum 2003 vel apan Lamka tanchinbu tuamtuam leh internet ah a gawm in thugelh 100 val bang ana gelh a, itna tangthu 10 veel gelh hi.

Nidang in Singngat a ka inn-gei uah mawltual lianpi a om a, a siik ah YPA Hall leh Silver Jubilee mualsuang a kitung viahvuah hi. Neulai in hiai kiim ah chek sing leh sing biim khawng kikoih reihruih sek hi. Valnou honte’n guitar tumkawm a laa sa in, khavak nuai ah hiaimunte hong taan gige sek uhi. Huailai khawng apat ahi, VL Mangzou te lawi in Lengtong Paunou leh S Chingnu laa te’ a hon na awih-ihmut sek uh. 

Laa leh thu lunglut, mi lungleng mahmah, VL Mangzou, a lunglenna te thumal a a gelhkhiatte ziak in  laigelh gil taktak hong piangkhia a, huai te i literature adia gou manpha ahi hi. A lunglenna ziak in itna tangthu hoih taktak a hon pia hi. 

Ama’ thugelhte tungtawn in Manipur Police Traning Center, Panggei mun om dingdan khawng kisuangtuah thei a, Singngat kholai bang, Guite Kual leh Mizogam bang ah hon vakkual pih a, ama’ mit tungtawn in Lamka khopi khodung teng kimuthei hi. A na totkhakna sa mun-le-mual leh a lawm-le-vualte pansan in tangthu lunglut huai pipi phuahtawm gelhkhia a, awmthei petmah ahi dia, mi tamtak in atak sa in a tangthu a ‘a nungaknu kua ahia’ chi khawng in kan hial uhi.

Hiai vual bang en le, “Mualsuang gelhsiamte’n thumal nalh taktak a a khuakkuak bang un ka lungtang ah a min khuak in a om a, thaimang vual ahi nawnkei. A nuih puakropte ka bilsung ah a kikhum a, hichi zodeuh leh chihna ding om hetlou amel kilawmtak mai, ka mitnauta ah chiklai peuh a muhtheih gige dia zutbelh in a om hi.” Hiai ahihleh VL Mangzou’ itna tangthu gelh khat apan eukhiat ahi a, a thugelh siam leh thuuk dan muhtheih hi.

Khanvual a polhsiamna, chiamnuih a gensiamna te ziak in mi teng toh kihou thei in, mi’n ngaina mahmah uhi. A chiamnuih gente mah a gelhthoh a hon bawl chiang in, gam keek diak hi. Lamka College a kailai ua a classmate, Laltanpui in, “History exam ni a long answer guk hong suak inchin, ‘Answer any five’ kichi hive aw. U Dong in a vek a ana dawng kha, thaisiat sang in chi a a paper tawp a, ‘Check any five,’ chi keuh ahi aw,” chi in gen hi.

“2000 lak vel a BYF Hebron te Zoudawn veh dia Town Bus dim a hohtou hive ung aw,” chi in Ginsuan Haulai in kahtvei hon hilh hi. “Singngat a giaktou, nitak kikhopna hun ah amah hong ding. ‘K’on kithuahpih theihna uh omsun chi in kou Singngat BYF te le mi bangzah hiam in ka hon zui di uh...’ hon chi chu, ki-ettuah liak a om. Kou mah le a gari a dimkhin hita. Amau hong bangchi kihen di aduam, chih ana kingaihtuah guk laitak a, ‘-- chithei di dinmun a ka omlouh ziak in poi ka sa,’ hon chi a, kinui zaak,” chi hi.

Delhi a om, Lia Nianghoihching in, “A thugelhte apat a mizia di ana kingaihtuah khia: mi pau nuam mahmah hi di, a lawmte lak a a central of attraction ahi ngeingei di. Thutuam pipi tampi bangchi-chi hiam a hon lemkhawm inchin, a gennop pen tamlou chik hel geih. Chiamnuih dan a sim utte adia le hithei, a focus tak en utte adia le muhtheih,” chi in a muhdan gen hi.

VL Mangzou’ hinkho tangthu - a hihkhelh leh a hihhoih hitaleh - iim neilou in gelh miahmiah mai a. Simtute adin ki-mekbelh theihna ding tamtak om a, kivelthakna ding bang in zattheih hi. A thiltuahte tungtawn a thil a gelhte’n simtute hon pawllim mahmah hi. “Ka hinkhua a ka thiltuahte leh ka duhthusam mawlchik a ka gelhkhiakte, mi khenkhat in hinkhua nuamsaktu taktak a ana zang uh ahi chih ka theih chiang in ka kipak petmah a, ka hunlui saupi phawkkik thei dia ngaihtuahna chiimtak hon petu, Pathian thupina ka pia hi,” chi in ana gelh hi.

A thugelhte ana sim gige, Lamphel a om Muante Khuptong in hichiin gen hi, “Chiamnuih ngaina leh dawl thei mahmah mi ahi di. Experience hau mahmah, huaikha simtute lunglut theihna di hisap a gelh siam hivaw.”

Gam-le-nam a ding leh khotang bawlna hoihna din tamtak ana gelh a, issue leh thil buai khat a gelhchiang in, a solution dia a theihte pe zel hi. Thil a gelh khempeuh te, “Kei’ ngaihtuahna lel ahi a, a dikpen ka chi tuankei,” a chih in thil tampi gen hi. Mizawng, daikilkal mite’ aw in pang tawntung hi. A thu gelhte luan in luan thoh a, simsuak ma koihkhiat theih ahi ngeikei. Khat i zoh chiang in abaan a dite kingaklah pah zel hi. 

VL Mangzou ahihleh May 28, 1972 in Singngat ah piang a, Hill Model High School, Singngat leh Lamka College te ah siam ana sinkhia hi. “‘Buai’ zoh in Hill Model High School ah kum thum teacher in ka sem a, naupang za-thum valzek a pha ua, a min uh ka theigai vek,” chi in aman ana gelh hi. Manipur Police in 2001 in luut a, Head Constable tan tung hi. Azi Ngaihlun leh a ta li te tun in G. Mualkawi ah khosa uhi.

‘Singngat Special’ kichi singpi khum genna dia ana kizang zel himahleh, VL Mangzou in a thugelhte column min dia a hon zat nung, ‘Singngat Special’ in khiakna leh gen tuam daih a hon nei hi. A khanletna mun Singngat vangkhua pansan in gelhzel a, amite leh amun-amual te a thugelhte ah zeptel zel mahleh, a thugelhte’n atangpi in i gam pumpi huap suak vek hi. A laigelhkhiat te tungtawn in a min in i literature ah a mang ngei nawnlou diing mun a luah hi. 

Amah ngaina khenkhat kipawlkhawm in a laigelhte kikaikhawm a, a bu in kibawl hi.

(Manipur Express ah 26.11.2019 in suak)

A ithuai, a pammaih VL Mangzou

by Haumuanlun Samte

“Sum-le-pai, thuneihna leh thildang ah ka gam leh nam’ adi’n phattuamna nei zoukei mah le’ng, ka theihna tawmchik zat phatuam teitei sawm in lehkha gelh beek in pan ka la hi.”
-V L Mangzou

Nitaklam khat, nitum kuan ann nekkham in ka innkong uah mi bangzah hiam lampi siik ah ka na tukhawm uhi. A lawmte khat toh koulam zuan in lampi ah a hong pai phei uhi. A lian a, a taksa a kiphuh litlet a, a sam siikkhen in khatlam ah a huiphei a, khekor rong ukh, dup raih, a teng a, tem a paai a, a nung ah single barrel a kuah hi. Ka kiang uh a hongtun un, “Ann ne ta umaw?” chi’n a hon dong a, ka lak ua khat in, “Hi, neta,” chiin a dawng hi. Aman, “Nek di ann nei lai chihna. A kipahhuai mahmah e,” a hon chi a.  

Huai hun, Kuki-Zomi galbuai lai, Zodawn lam a nektak haksat laitak ahi. Kituah khak chiang a a thei-ut hisese kholkei lele, ‘ann ne ta maw’ chi a i kidot chiang ua, kidawng a, theizui nawn tuanlou a kipai liamsan zel ihihlai ua, hiai bang a VL Mangzou in a hon thugen, gen kha mahmah ka sa hi. Huai lai in Singngat Defence Committee a Commander-in-Chief hihna leen a, a muanhuai a, a mohpuak a thazoh mahmah hi.

Pawl XI vel ka hihkum ahi a, VL Mangzou te inn ah sisuunna om a, nitak leenkhopna a nungak-tangval te lak ah aman, inteklam apan thu hon gen hi. A tangval tung apan khotang a phattuam-ngaihna vai te a ana kiheldan gen a, nungak-tangvalte kiang ah, “Hiai dan a si-inn lengkhawm leh hantohnate a kuan ahihleh thil hoih mai hilou a, siam kithuktuahna ahi,” chi a, phattuam ngaihna nna semtou zel din hon hasuan hi.  A thugen tutan ka theiden lai. 

“Hill Model High School, Singngat a Class VI ka simkum un ka class teacher uh ahi a. Amah apan lai simdan ka zilkhiat ahihleh, a thu ngaihtuah kawm a theihsiam sawm di, chih ahi,” chi in Jacob Munluo, Kolkata a banker, in gen hi. “Note hon pe ngeilou a, ei theihsiam dan a gelh hon kizil sak a, ka na phattuam pih mahmah. Ama kiang mah ah khatvei kipahthu ka na gen man a, hamphat huai ka sa.”

High School ka kailai un, football club khat ka nei ua, jersey/kit leh signboard a thil gelhte aman a hon gelhsak hi. Tournament ka telna khawng ua star player dan in amah ka la ua, khevuak in a peek huihhuih sek hi. A leenlai a football ana nehsoh mahmah ahi di, “Singngat gam a ka theihphakna chiang a corner peek a direct a goal khum amah kia hilai ahi,” chi in a lawm, Ginlalmuan in gen hi. 

1999-2000 kuamlak in Singngat a khosung tanchinbu, ‘Tuailai Aw’ a suahni Pathianni kingaklah thei mahmah hi. ‘Kua te’n bang gen’ ziak ahi pen. Amah editor ahi a, mi a chiamnuihna te simnuam thei mahmah hi. A news min bang le, Chinglalven’ Pa’ Aw chih dia hoih ahi, chi in mi tamtak in gen hial uhi. 2002 vel ahi deh aw, in Tongluang ah ‘Because I Love You’ chih tangthu tom a hong suak hi. Lung hon khoih mahmah a, a gelhtu siam ka sa mahmah hi. A gelhtu min ‘VL Mangzou’ a kichihziak in kua ahia chih huaihun in  ka na thei pahkei. Ka kanzui leh ‘U Dong, VL Donga ahi’ chih ka theikhia hi. A penname dia VL Mangzou zang ana hi khanglang hi. Huai apan a thugelhte ka hon zuitou hi. 

Hihtheih, siamna leh experience tamtak ana nei, VL Mangzou in thu gelh hon pan taktak zaw, a bun viau. Kuapeuh’ kibulhtuah-pih theih di thu, neulai leh hunlui khawng leh hinkhua nuamsakthei thil tampi a thugelh te’n huamtou kha vek hi. A gelh tam a, mi a sukkhak leng a tam – a kipak leh a kipaklou hileh.

“Kisoisak kawt chihte khawng bang chu single a kuamah kilaulou hi’nchin, nih-le-thum in ahon bom ua leh a haksa deuh a hiven,” chi in amah-mah in gelh hi.  “U Dong in khua hong phak khak chiang a, va houpih le lah, hon na kawt di chih kitheisa. Houpih lou di i chih chiang a lah ngaihnat huai,” chi in Singngat a dawrkai, T Vungzamuan in gen hi. Amah toh kitheite, a soisak-kawt khaklouh kuamah le ki-omlou phial le kilawm. WhatsApp group bang a amah a hong pau naakleh, a kawtkhak lau in kiheem duamduam mai uhi. 

Himahleh, a polhnopna in kuapeuh hiip hi. Aneu, alian, atek-akhang kuapeuh toh kihouthei vek uhi.   Kei bang leng, kum 14 tak a ama’ sang a nau-zaw himahle’ng, a hon ‘naupang-zaw-et’ tuankei a, ka kihou leh kithuah khak chiang bang un ka nui khuaa-khuaa gige uhi. A hihtheihna chiang ah, mite panpih ut gige mi ahi.

Mi khenkhat in VL Mangzou’ thugelh dan ‘key’ manlou in theisiamlou kha zel uhi. Atak a a paudan ‘style’ mah in thu gelh hi. Atak a a chiamnuih gen bang in, a thugelh ah leng chiamnuih telsak gige hi. Thutak a gelh chiang in leng, a kiimvel ah thil tuamtuam helkhawm zel hi. A chituamna leh a siamna huai ahi. 

Nidang a ‘Tuailai Aw’ a ‘Kua Te’n Bang Gen’ a mi’ min baan gelh sek a chiindan bang in, anung a lai a gelhnate ah huai chiindan paitouhpih hi. A thugelhte ah min tamtak tuang gige hi. Huaibang min te ahihleh, i gam leh khotang adia mi’ theihphak, mi tallang leh siamna tuam neite hi se khollou a; a lawm, a meltheih, a seppih, kholak a a tuahkhak mi vantang te ahi tangpi hi.

I gamsung, adiak a Lamka kholai bouruak leh issues te, a thugelh te’n tuntou kha vek hi.  “Laigelhtu i tawmlaw lai ua, khat in a hon gelh peuh bang ‘dik’ i sa pah duam zel ua, akhente lah ‘diklou’ i sa bur ua, cross-writing chih a omlouh ziak in ‘gelhdiktu’ khenkhat adi’n singpi khai theihna ahi,” chi in ana gelh hi. A laigelh ziak in singpi khai in nihvei vel ana kuankha hial hi.

I gam a tanchinbu tuamtuam leh internet te ah ‘Singngat Special’ min in thugelh 100 val leh tangthu phuahtawm 10 vel  suahkhia hi. A min in khomin khat ging mahleh, a thutuun in i gamsung huap ve hi. “A thil gelhdante nalh se. I simchia a picture didan bang lungsim a dawkthei. Mittui bang le pawtzen a ka simkhak le om. Khuaknei mahmah eive, ka chi phet,” chi in Delhi a nurse sem a om, Biakhoih in gen hi.

Laigelh siam, VL Mangzou ahihleh a mintak Vanlaldonglian ahi a, ‘Donga” chi in kisam ahi. May 28, 1972 in Singngat ah piang a, 2001 in G. Mualkawi ah peemlut hi. A tuailai lai apan saptuam leh khotang vai ah ana kiheltou a, private teacher in kum thum vel a sepnung in Manipur Police ah ana lut a, Head Constable tan tung hi.

2019 kumkim vel apan a damtheihna hoih nawnlou in, Lamka Damdawi Inn ah ki-polut hi. A hatlai a mite’ sim dia thugelh hoih pipi ana pekhia a, a hong hat nawnlouh nung in leng, a kiimvel a omte suklim sawm in panla gige hi. Damdawi inn a amah vavehte bang, kihatsak teitei in chiamnuih in ana pawllim hi. Hatlou sasa in WhatsApp group a alawmte a di bang in chiamnuih gengen lai hi.

A gam leh a mite adia nna tamtak leh thupitak, a laigelhte tungtawn a ana sepkhiat nung in, azi Ngaihlun leh ta li te nusia in, August 17, 2019 in Lamka Damdawi Inn ah a hon beisan ta. I Zogam literature a a ‘mun awng,’ hukdim zoh vual hingei nawnlou ding hi.

Amah ngaina khenkhat kipawlkhawm in a laigelhte kikaikhawm a, a bu in kibawl hi.

(Lamka Post ah 26.11.2019 in suak)

Itna Lamdang Ginglawm Nou

by Haumuanlun Samte

Puandum a kizem a Thyagaraj Stadium lam ka zotlai un Delhi ni, neem panpan ta, in ka tuanna bus uh hon sal hii-hiai hi. Sunnung a biakinn a et-khawmna a kineihlai in lawmte a kimuang sim mahmah uhi. Himahleh, kei bel a kum paisa a performance khawng in huai November 13, 2013 nitaklam a Sarojini phei a ka tailai un ka lungsim a hon buakkiik a. Ka nervous sim hi.

Tangkhul Christian Charitable Trust te’n 2nd North-East India Choral Singing Competition a telnawn dia chialna hon bawl nung ua, lazil kipatni, October 28, 2013 apan ni 13 lel hun ana kinei hi. Kidemna laa ding “Amazing Grace,” lapawl ngeina hilou a, hei lamdang a, acapella dan a sak ding, chih ahi. Ni tomchik sung a chituam deuh a bawl a, siamtak a zil ding, chih himaidan ahi, chouna.

BYF Committee in pan naktak a la in, Stevekid Valte in a style hon bawl a, Shang Naulak in hon pi hi. Choir member 34 te’n nitak teng in RK Puram Sector 8 a Upa Damsawmthang’ inn ah tatsatlou in kizil hi. Member tamzaw te’n a sepna mun uapan delhkhawm in, BYF Committee in nek-le-dawn a kul bangkim sai in kiluum vengvung mai hi.

Dak 7pm vel khawng in kipan a, 10pm vel in kitawp tangpi hi. RK Puram Sector 8 apan Malai Mandir tan khe in kipaiphei zaizai zel a, vangphat huaitak in bus bang ana omlai zel hi.

Delhi biakna leh tuailai vai a kihel hi, nna-mai ahikei. Hun muh a hak a, kinaihna a gamla. A seem leh a simlel te lah buai, single a omte lah, buai zawsem - numei-pasal chih omlou, inn-nupi a pang vek mai a kihihchia. Huchi kawmkal a, hun bawlkhe teitei a, pan theihna-na a pang teitei zel te etton tham ching petmah hi.

Huchiin, a mun ka tung ua, stadium tual ah lim khawng ka kila malam uhi.

* * *

Nungkiik zual le. October 12, 2013 nitaklam dak 3.30 pelh lak vel in BYF Delhi leh Central Delhi tuailai 90 veel, Siri Fort Auditorium kitung dupdup hi. Main gate bang ana hong naikei ua, a nunglam a va kualh ek a ngai hi. Delhi Mizo Christian Fellowship’ huaihotna nuai ah malsuah-bial fellowship/church kipawlkhawm hunkhop te’n Northeast Christian Meet, 2013 a saini ahi a, BYF te’n ushering nna kisemsuah hi. Ushering – tutna hawm tan mai seem dia kikuan himahleh, backstage leh program coordination tanpha va kisaitou suak kha phial.

Hiaibang mun hoih, bit leh nuam sung a, sound system hoihtak toh Pathian biakkhawm dupdup a nopdan va kimu thei a, inn tutpih theih thuhoih-lahoih tampi kizilkhia hi. En leng sai tei saam lunggulh vungvung-na toh inn ka zuan uhi.

Nungkiik tou le. Tuailai Day 2012, ni masa, October 20 a ‘Sounds of Praise’ hun ah opening – mipite suk thathohna di’n Mortal Komiti in ‘Denchiang chi seken, zekai niteh’ chih laa k’on sa naknak uhi.  Chang khat sa zou, a thunon ka hong tun un aw khat, ngaihdeuhmai in a hong keek duat a, mipi a nuih zaizai uh ka zaak toh kiton in kei’ aw ana hihlam ka thei khia hi.

Phuur-luatna lam a aw bang khahsuah kha zezen. A tawptan bel ka pangsuak zou. Himahleh, ka tutna ka tun nung in a hon deeng kha pan hi. Maizumna in. Sawtsim tak ka tutna ah ka chi bang a hong liing sungsung hial hi.

Bangmah ngaihtuah mumal theilou in ka tuden hi. 

Ka hong bukim kiiknawn tak in hiai ‘Sounds of Praise’ (SOP) ana paitou ziahziah a. A min ngeei leng Heutunu Vungroukim’ phuahkhiat ahi. Hiai SOP hun ah tuailai lasak siam leh tumging tum siam band/group 13 apan, mi 70 vaal – huaile, band member leh lasa kibang omlou, atuam ngen hivek - in Pathian phatna laa sa in tum uhi.

Hiai SOP adia tuailaite ana kisakkholhna uh gentham ka sa lailai hi. Ama kaal thum-li vel apan in, biakinn mun va zuan vengveng zel uh a, kikhelh thoh in sawtpipi kizil gige uhi.

Kitaitehna hilou, kipahman piak hilou; himahleh a siamna te uh zang a Pathian min phatna dia a kipiakzohna uh thupi petmah hi.

Nungkiik tou lai le. Easter Sunday April 8, 2012 in BYF Delhi in i biakinn lapawl “Ka Kha Kipahna” ka sa uhi. Ka telkhakna chiang ah hiai lapawl sang a kisa fuh zaw, adang theih ka neikei phial deh aw, ka chi hial hi. Heutupa Lun Thawmte in thazoh leh kipezoutak in hon pi a, kha khat val vingveng Pathianni tawp teng in Biakinn Basement ah kizil zoizoi gige hi. A zilsung leng a sawt bok a, a sakkhiat hun in nuam kisa mahmah chiat hi.

Khatvei kia sak deih khoplou in, EBCC Central Delhi 2nd Anniversary lopna hun, April 22, 2012, ah leng hiai laa mah ka va sa nawn uhi. Nuam.

Nungkiik tou zeel le. 2011 ahihleh Area Fellowship vanglai ahi a, BYF Munirka Area, South-Ex Area leh Mohammadpur Area te khawng kivehtuah in hun nuam leh manpha taktak ana kizang hi. Veng sung tuailai fellowship hunte ah issues tuamtuam discussion kinei zel te apan zilkhiat tampi ka na nei hi.  Kiginni nitak, ann nekkham dak 9 a fellowship dia va pai zel in, thilsia tampi hihtheihna di ana daal ana hilaw dan ahi hi.

November 5, 2011 in BYF Munirka Area Fellowship min in tuailai 90 vel, bus nih dimzen a tuang in, Taj Mahal, Agra va kiphakhawm a, sum-le-pai nei zoulou tuailai khenkhat bang kikankuah thei in, manpha ka sa mahmah hi. Veng sung a tengkhawm, kimu tuah ngeiloute adia kimeltheih tuahna hun hoihtak ahi. Lamtawn in laa ka sa, a mun sang mah in, a lampai nuam zaw hileh a kilawm hi. A kalnawn in South-Ex Fellowship te leng va hoh thei uhi.

Vualzou a Jerusalem a Jesu a lutni kipah leh pahtawina dia Palm Sunday chiang a lampi zui a kikou zel pen, naupangte’ a di deuh a kikoih hile kilawm bang hi. Naupang hunlai i ngaihkik mahmah-na khat leng ahi. Himahleh, April 10, 2011 Palm Sunday a tuailai hon in lampi zuihna a kineih pen, chiinchi ka sa mahmah hi.

Mohammadpur Area Fellowship te’ makaihna in Bersarai apan Sarojini tan zing beltak in lampi zuihna kinei a, huai hun a va kihelkhak theih hampha ka kisa a, manpha sa in ka mangngilh thei ngei nawnkei hi.

Veng sung fellowship vai a nopna mahmah khat ahihleh Krismas lengkhawm ahi. Mundang leh innlam khawng sang in Munirka tuailai lenkhawmna a nuam zaw tham hi. Tuailai ngen, Krismas nitak leh Kumlui-Kumthak kikhen nitak in dak 12 tantan bang, inn dim phitphet a tu in ka lengkhawm zel ua, ka limthei petmah uhi. Khelah takmai a hunkhak a ngai gige hi.


* * *

November 13, 2013 a Thyagaraj Stadium mun a 2nd North-East India Choral Singing Competition a tel, lapawl 13 lak ah EBCC Delhi in Serial No. 9 na kitang hi. Khat-khit-khat in hon sa ua, ei hun a hong tun in tutna apan a kiton in ka ding thrap ua, stage lam ka zuan dialdial uhi. A nanung ah Heutupa Mung Munsong toh ka dingkhawm uhi.

Stage light in maitang tak a hon sal a, mipi lam mial vek in kilang hi. Ima ah lawmte puandum a kizeem a ding depdup ahihman un, a khamuan huai mahmah mai.

Dinna mun chiat a ding vekta, mike leh sound-check bawlzou ta. Mitsi in thumna ka nei siausiau hi. Lavai a omkei. Shang Naulak in hon signal a, Bass Group 1 te’n, “Ama…,” chi’n ka hon pan ua, Bass Group 2 te’n, “.zing…,” chi’n ana bohzui ua, Tenor, Contralto, huchiin Soprano te’n, “…Grace…,” chiin a hong luangkhawm dialdial hi.

Chang khatna ahihleh a luang hiauhiau in ka sa ua, Chang nihna lutna di ah, Vunggohching in timing hon pia a, ka hon hih trah-trah uhi. A kisawi theite kisawi, a kisawi thei chetlou te’n le phuur mahmah in a sa khe belbel mai uhi.

A nung a pan huum haam, a lai a te kikou selsel, a ma a te’n ana hih hiau-hiau. Tui luang tung a huih bang a leeng diaidiai mah kibang zezen.

A baan a a paidan a hong kikheeknawnna mun di ah, Vunggoh in a malam a va naihtou a, saangtak mai in hon awi vengveng hi. A hong kiik nawn a,  hon hihkhial dek a deh aw, chi in ka diip a hong ko huaihuai hi. Hon sunzom thei nawn pah vanglak a, huchiin, nuamtak in a tawptan ka sa suak thei uhi.

Tutna mun ka tunkiik un, ka thuum ua, ka kichibai tuah noknok uhi. Safuh kisa toh kisalou toh.

Dak 8 veel ahita di e, result puanna a hon pat uh.

Third ah Paomai Baptist Church a hon chi ua, khut ka beeng zuazua uhi. Hikhalou.

“Second position goes to,” chi in a puangtunu a hong khawl a, Thyagaraj Stadium a dai duak hi. Bil bul ah thousi hong leng lele, a khazaap ging in i bil hon su-ngong zou di khop a ngaih in huai hun laitak a dai dide hi.

“Evangelical Baptist Convention Church!” hon chi khia chu, eekhai, dingkawm a khut beeng a kitawm toh, kichibai toh, kikou zuazua pawl toh, daitak a thumna nei pawl toh. Kipahna a bukim ngeimai. Hiai tan honpi Pathian min i phat ahi.

Hiai bang a saptuam ai-oh a, Pathian’ thupina suklatna dia panlakna a ka na telkhak hi, hampha ka kisa hi.

Tua zan Itna Lamdang’ ging kilawm tutan ka bilkha ah a dai naikei.


BYF Delhi Silver Jubilee magazine, 2019 "Phakchiam Delh Tuailai" a suak ahi