Khoveel thak ah i teengta. Misi kou di’n mun gamla pipi khe a paitung angai nawnkei. Kithuzaakna di’n laithon kikhaak tuah leeng atawm hiaihiai ta. Meelmuhlouh tongsaan bangleeng hunteng a vazat angai nawnkei. SMS khoveel a teeng i hihtaak man un kithuzaak tuahna a ol mahmah ta hi. Abiik in, tulai in service tuamtuam te ah free offer a om a, hiai phattuam pih in SMS, khuai vaitung bangmai in, i kikhaak tuah huthut hial uhi.
Hiai ah SMS thu leh a poimohna te kikup sawm i hikei. Alehlam daih ah, bangchi bang a SMS in i laipau hon nawkkha hiam, chih i endiing. SMS i kikhaak chiang un a tomthei lamlam, a simtu te’ theihsiam diing daan in i gelh uhi. Saappau ahihleh pau piching ahia, i utdaan teng in heikawi lehang leeng a paidaan khat ana omsa om hi. Ahia, i pau peen a pichin louh baan ah paidaan zuihtuam a neikei a, a gelhtu’ deih daandaan a heikawi ahimai hi. Hiai in buaina a hontun gige.
Lawmte khat in hichiin geenngei hi: "Tulai SMS hahgelh theilua ing a, ekzamna a bang a tomngen a vagelh kha dek!" Saappau ahi i geen. Eipau ah en lehang, SMS i gelhte’n naaktak in laipau i gelhdaan a sukha. Huaiziak in pilvaan mahmah ngai hi. Tulai khangthak te i pau gelhdik siam i tam hetkei. Va gelhdik siam chihbang leeng thil namai ahikei. Bulhkhawm, repkhawm, khenzaak, khenkhiat leh a neuhneuh hihdiing tam peetmah hi. Ahia, a poimoh zual khenkhat a om hi. Huaite i endiing.
Paite Laipau Saipawl in i pau ah ‘J’ taang in ‘Z’ zatdiing chi ua, laimal ‘O’ leh OU’ a tuam ah, baan ah a tomgin te ah ‘O’, a saugin te ah "AW", leh thumal saugin te ah ahithei tan a vowel zatkop diing chih ahi. Etsakna, Toupa aw, zaanmial nuai ah honleen in. Khenkhat te laimal ‘I’, ‘E’, leh ‘A’ zatdaan a buai leeng i om hi. "Emu ta m?" chia hong ki mesees leh bang chu kibuaitop maidaan ahi. A zatna te uh enni: "Ehe, ihmu hakvee!" Ahia, SMS ah grammar diktak vazui ni chi bel i hituan saamkei.
Baan ah, SMS khenkhat ah laimal ‘W’, ‘X’, ‘Y’ bang i hahzat sim ua, hiai in buaina hontun phetdiam, chih dotna piangthei hi. Huaibel, a keypad meek nopdaan zir a i zat leeng ahithei. Etsakna, ‘kwateng’ , ‘bangxiak’ , ‘hya’. Ahia, hun hongthak toh kiton a i paidaan khentouh a, behlap zeel bangleeng thil navaak huai khat ahi. I pau suk hauhsakna khat ahihman in. I lak a a kulmuut pawl in bel hiai a deih lawmlawm kei diing uh. ‘Mahleh, khangthak te’n "kikheekna" i ngaina uh.
Himah lou hya?
[Siamsin Bulletin, August 20, 2006]
No comments:
Post a Comment