Zaan dang banglou in khua dam peetmah hi. Vaan a siang a, tunglam ah meiphualpi mahbang in aaksi te duur phengphung in a neute bel a phe leplep uhi. Ka dinna innsawng apan gaal a khopi thupi tak, paak ziazua in a kimu a, meivaak chi tuamtuam a eeng zihziah hi. A kaallak ah haalpuak ngaihtak hongpuak domh a, vaan laizawl a hong eengtou singseng zeel hi. Ka kiim, ka paam ah mi te hulum in a om zaizai uhi.
Mite’n hiai Krismas ma zaan hun nuamtak a a zat vengvung lai un kei bel ngaihsutna khawl deeduu in hongveh se hi. Huchia ka omlai in ka lungsim mitkha a hongvaak a, awl in pianna Zolei a honveel diaidiai hi. Gaal a kipan Krismas leenkhop laa hong kisa hialhial hi’n ka za a, lawi-le-pai, khanvual te’ nuihging bang ka bil ah a honglang chiaichiai hi. Singpi san, limtak a bawl, leh i Zo’ khutsuak ngei, sangkan gim khawng ngaih gimsi bang a diikkha vingving hi’n ka kithei hi. Innlum ngaihna a hongpuang a, a lungleen huai ngeimai.
Huchih lai in ka phone a hongging a, message a hongtung hi. “Hongpai dek nailou mo? Panta keive ua,” chiin Kimbawi in honchi hi. Sangkan khawm sawm ka hihlam uh ka phawksuah hi. Muamuan te toh hohna diing nei masa ka hihman un, “Ana panmai uau, denlam chiah k’ong paidi,” chiin ka thukkiik hi.
Ahitak in bangmah ka peihkei. Bangmah in a ka kha a tokthou zou taktak kei.
Ka kingaihtuah a, innlam a om hileng, lawmte toh ka hunzat diingdaan uh ka suangtuah a, nopmeel ka sa mahmah hi. Khat khit khat, suangtuahna screen ah honglang ziahziah hi. “Ah, a lungleen huai maimai,” chiin ka hongpawt khia a, Muamuan te’ kiang ah ka va pai hi.. Huchiin, ka hongman ua, disco a hoh di’n ka hong kithawi kheta uhi. Ka iit Kimbawi bel hiaibang mun khawng a hohdi’n ka phal theikei.
Mi 8 ka pha ua, auto nih laa in disco mun ka honzuan ta uhi. Lawmte mi thum, kop kim in a om ua, kei toh Sangpu bel a khaat in ka pai heeuhaau uhi. Amun ka hongtung uleh lut chihtak in ana luun hi. Eilam nungaak, kholai a i tuahkhaak chiang a hoih i saksim khenkhat, Negro tangvaal lian hethut khawng toh kikawi helhel in a na om ua, a khen te lah Vai te’ car sung khawng a tu in, laizial pet veeuvaau in a om ferfar geuh uhi. Mit siip sim. Disco sung ka va luutdek uleh bouncer pa’n chinky te honna luutphal hetkei hi. (Ei compound ah mo lah va kichi thei mawklou hi’n maw.) Bangtan hiam ka kiseel nung un mundang ka zuannawn uhi.
A mundang peen bel ana nuam mahmah a, eilam mi leeng hunkhop va ki om hi. Laizial khu lunglung, zu gim nam humhum, meelhoih taktak kisawi hahhah – DJ pa’n tulai deuhdeuh honhih bangzaw aw, kisuum zoulou in kei leeng ka va kisawi trahtrah saam hi. Siamlou tuan saam ale! Lawmdang te nuam sa in a om vengvung ua, kei bel ka thaw kituak zou taktak lou ahi diing a, a hongpik mahmah ta. Ka lungsim ah Kimbawi a honglang a, a siang zuan a khaubang chiah ka ut tuntun hi. Sangpu leeng pai a ut a, nuamsa lawlai ahihman un Muamuan te lawi ka paisan mai uhi.
Kimbawi te’ kiang ka tun chiang un amau leeng duur in ana duur mai uhi. Kongkhaak ka va honleh, tangvaal hon toh zu dawnkhawm in Kimbawi ana om a, ana chiak niahniah uhi. Ka iit Kimbawi. Maimah de! Ka muhdaan a danglam ta ngeimai. Kimbawi, mihoih mahmah daan a ka koih, biakna limsak mahmah daan a ka muh, party na a hohdia le ka zot ngamlouh, hichia om maimaw! Na paammaih ngei. Na meelhoihna te hichia zangliam maidiing maw? Ka lungsim a hongnaa mahmah a, hiaimun a omtheilou in innlam zuan in ka hongpai mai hi.
Ahitak in, zudawn a omsaang mah in a zulhzauna in ka lung a hon suna zaw.
Bangmah ka ngaihtuah thei nawnkei. Heh ka hia, naa sa ka hia, hazaa ka hia, lungleeng ka hia, lungkham ka hia, ka kithei zoukei.
Lampi ah phalbi huihvot a hongnung hiauhiau a, vaanlai zawl a aaksi vaak singseng te ka entou hi. Ka sana ka etleh daak 12.00 ana gingta. Huchihlai in gaal a kipan Krismas laa hong kisa ging in ka bil a honluh ngiaingiai hi.
Zaankhua dai. Zaankhua siang.
[Hiai thugelh lungsim suangtuahna a kipan hong piangkhia ahi. Mun leh min te, kuamah geenna tuam ahikei.]
No comments:
Post a Comment