Sumpi Nuihchiam

Puan-aak ngawng kual, khekor naraan leh khedap ngou a kithuam in a hong kilang a. A hong khuhthrauh a. A kiimveel teng - anung a puan kizaak, ama zawn a khut ngakna'ng leh lehkha ette koihna dia dohkaang - a ngou rong ngen in a kizeem a, a lang fiah mahmah hi.

"Nikhat Unau Gangte te..." a hon chihkhiat apan nuihna a hong kipan ngaal mai.

Unaupa Sumpi ahihleh Lamka leh a sehveel a khua te baan ah Zodawn tanpha a chiamnuih geensiam leh mi sulim siam mahmah a minthang ahi. A meel mukha ngei nailou te bang in leeng a min a zaakna uh a sawtta. Mazek in New Lamka a cable operator minthang, Angel's Vision te'n Unaupa Sumpi' chiamnuih bawlna a video in bawl ua, mipi te ettheih di'n CD in hawmkhia uhi. Lamka leh a kiimveel ah a laar peetmah. Local cable te khawng ah tatsat lou hial a kikhah zom ziahziah maidaan ahi. Delhi ngei ah leeng hongtung baan hihtuak.

A video hun sawtdan ahihleh dakkal khat ahi. Huaibel, tawplou a daakkaal khat sung vingveng nuihsuakna ahimai. Unau Gangte te apan honpan a, azoh Unau Hmar te, Vaiphei, Zou, Lusei, Teijang, Simte, Paite - a banbaan in. Paite ah leeng paukawi, pautang leh daapzaal omlai. Hiai pau chi tuamtuam te in chiamnuih hongeen a, amau' pau diktak bang in hon lamkhe theimawk hi. A phonna omlou, a kawina omlou, a dik chiahlouhna mun leeng om tuanlou.

Gangte awphawi a honzat leh Unau Gangte chiamnuih khahsiam diktak te toh a kilamdan himhim a om tuankei. Hmar counselor khat pau daan honchiing a, i na ngaihkhiat leh Heutupa Buonglienkung ahihkeh Evan Timothy te bang sakkhaak in a omdek. Huchibang zeel in Lusei pau, Zou pau, Simte pau, Teijang pau leh adg. adg. Daapzaal pau chiikdeuh mai a honthoh nawn bangchu, eekhai, haa lizeen in ahi a kinuih. Nui mai i hikei, sipiring hahsuah bangmai a kizuang zokzok thok aka hia. Amah, Sumpi' chihdaan ngei in.

A geen a geenthoh kia hilou in a lemchiin mahmah in leeng mit a sutai mahmah. Chiing peetmah ahi, pang peetmah.

A chiamnuih geen te mundang, gamdang hiam leh phuahtawm mai hilou in ei sung mahmah a ana tungta thilte ahi. A "Zo" mahmah. Hiaiziak tak ahi a et a, a ngaih a nopdiakna. Hollywood comedians minthang taktak te hiam, internet leh laibu tuamtuam a chiamnuih geensiam te' saang mah in leng hiaibang a eisung a hong piangkhia chiamnuih thu te a ngaih nuamzaw hi. Russell Peters te khawng' aa sang in leeng.

Ei Zomi te i hihleh i khotaang ua lawm-le-vual ngai te i hi ua, kithuahkhawmna leh kipawlkhawmna ngaina mi i hi uh. Tangkhat a mahni kia a khosa ngeetnguut mi i hikei ua, ikiim-ipaam, khanvual, innsak-innkhang te toh kisumdawltuah a tongsaan kikum khawm nainai te i hi uhi. Singtang lou nnasepna gam ah lawmvual bangzah hiam kipawlkhawm a lou kuankhawm nainai te i hi ua, phalbi chiang a kongtual a meipi seem a tukhawm timtem te i hi uh. Ziingkaal in hotel ah papi hon te'n singpi dawn a tutkhawm a chiing ua, nitaak khomui zuul in vaalnou hon te'n lampi gei khawng a tutkhawm a thangsak uh. Huchiin, zaan khua hongmial chiang in nungaak te' innlam zuan in tangvaal te ava kithuahkhawm theizeel uhi. Hichibang a i omkhawm nainai chiang in thu i kikum khawm ua, hun tamzaw ah chiamnui geenna in i zangsek uhi.

Khotaang vai, saptuam vai, inndongta vai leh nopni-dahni a i kimuhkhawmna te uh chiamnuih geenkhawmna in a zui taangpi hi. Si inn zaanhahna leh haantohna khawng ah chiamnuih geen in i nuikhawm dardar theizeel uhi. Hiaitak ahi i paidaan uh a nopna.

Hiai Sumpi' nuihchiam leelna video ka etleh ka lungsim ah phawksuah thakna khat hongdawn khia in ka thei. Huaibel, ei Zomi te' lamdanna mahmah ahi. Namneu tuamtuam in i kikhen tiltel ua, pau tuamtuam i zang uh. Mahleh, i pauchiat in pau mahle hang i geente i kithei tuah ua, i nuikhawm nainai thei uhi. I lungluutna uh a kibang a, i ngaihnat zawng a kibang. I hong kipatna uh a kibang a, i manohna mun uh leeng a kidang kei. I tawndan uh a kibang a, i sahkhua ngeei leng a kibang. Hiai in a kikhen theilou minam i hihdaan a thak in a hon taaklang hi.

Huaiziak in, Angel's Vision te leh Unaupa Sumpi ngeei' tung ah kipahthu i geen ahi. Mipi te'n i kipahpihna leh deihsakna saangpeen i pia. I talent hoihneih te lawmvual kithuahkhawmna a kisuklimna tanlel hikei heenla, summuhna tamseem bang leh minthanna saangzaw seem hontun theileh i chi. Huaidi'n mipi lam in hiaibang a talent hoihnei te kithuahpihna naakzaw seem in pia in, a saangzaw seem ah vawktou thei le.

[vaphualization]
--------------------------------------------------------------------------------

Hiai video a transcript khenkhat simtu te khualna in i taaklang. A dikkei leh phuilouh.
#Khokawm tangval khat kiphat inchin, "Sipai in kawva pang a, lenna apang in zuan haakdi a chi ua. Ka pawl te pakhat-khat in ka zuangha sak a, kei hi a nanung ber ah kikoihta ka hihchu. Kei hun a hontun tak a parachhute kidaih nawnta lou. Zuanhaak lah chu truul tlat si. Ka gei a anntang quintal 1 pom in k'ong zuangha tei taktak chu eeeee, ka pawlte ka peelsuk zungzung. Lei hi ka tung rang khopmai a," a chih leh a gei a papi khat in, "Geen oh, geen zomzeel oh. Zuaugeen lawlaw hichih HROIH-HROIH di mah eikha!" ana chi!

#Pastor Liankhosiam' thugeen dan:Sialkal tlaang saptuam te hi eilamte toh a kibang nemnum kei ua, a harh thei khopmai uh. Thu i hongeen lahchu a kam-kam un a ngaiha heuhou gouh ua. Laa i honpan a lah chu, a khuang toh rualrual in a ding pah suupsuup ua, a himsaang thei eemeem ua. A thunon vuai 3 bang i hon sakzoh phei inchu eeee, tehpih di dang a om nawnkei reengreeng. Sipiring hahsuah bang deuhmai eikha.

Mihing te hi khovel ah khial in ahi i hong piankhiak, chih gingta lou mi tampi i om ua. Chialpi e, crusade e, camp e, i chi ua, bangziak a lohching taktak theilou i hia? I pianthak taktak na'ng inchu sual a hong kipatna theih masak a truul. "Kei Adam lah hilou ing a, theihtheihna singgah ka neeklouh pi," na chikha maithei. Nikhat setan in Eve aw-va heem a, "Eve, na Pathian un hiai singgah nekei ua a chi maw?" a chihleh Eve in "Aw, na neek nini un na si du, on chi," a chi a. Setan in "Zenzen, na hailua, Eve, na hailua. Amah bangbang na honghih du a lauhziak eikha na Pathian un. A thiikthu siat a siat eikha. Ne oh, amah bangbang in na hongpil di," a chi a,a heemheem a, a tawp in chu Eve in on ne ta a. Him a sa khopmai a, a mit vak kuau hial in a thei a. Huchiin, a himchi ber ziing a pakhat an lou tei a. Adam kiang a, "Kha, hiai singgah a him khopmai, chiamtei reengreeng daw, U Dam!" aw-va chi a. Khoveel ah hi amau nupa loungal a omkei ua, a kiduat hle d'un a ginhuai. A nupi neih sunsun chu seel ngaihna a theikei reengreeng. "Huchituk a him ahih inchu koihia, kan chiamtei reengreeng di chu, Ve-te."

Eden huan apang in eikha thaiboy a hong kipat daih, pasal te pilvaang ua, heuhou gouh!

#Singtang khuakhat ah papi hon houlim khawm unchin, America te kha a luutdan uh khawng leh thil tuamtuam houlim uh hiveh aw. A houlim lai ua a gei ua puteek khat in, "Amerika te kha ah hoh na chi vial ua, kha man lai in hohle uh a ke vovok d'u maw!" ana chi.

#CBA te'n biakinn bawl unchin zouthei mahmah lou uh. A sum in dong le ulah nikhat a 100 le mu zoulou uh. Thachial di chile ulah tuailai te kuamah kuan utlou. Building Committee a chairman pa hongthuum, "Toupa aw, hih na biakbuuk a kilam peen, a kibei dong sim mahmah hita in ah, na Khasiangthou kithuahpihna toh na pa ta ua n'ong limpan mahmah kei uleh a pianglou diing aive." Pathian chu neel mahmah hihtuak.

#Bulldozer i chihkha sing lompi peetmah a kibawl hinchin, a suutdaan chi tuamtuam omthei tham ahi. Unau Gangte te'n en vengveng unchin, "Ze bulldozer hi, phim in kisiem leh bangzat a pha dem?" chi uh. Phim in kibawl leh bangzah tak a phadiam chidaan eive ua. Unau Mualnuam lamte' suutdaan: "Hiai siik lompi beembuum, annkam huan ah luut leh a hawlkhiat hak mah di!"

#Pata khat houlim unchin, a tapa pa'n a pa' kiang ah, "Pa, kumteng a Krismas kilawm ahihleh Jesu tam lawta lou diing a maw?" a chihleh a pa'n, dawndi daan theilou tak zaw hidi hia, "Bang a tamtuan mawk dia! Good Friday chia that tawmtawm a kei ua hia!"