Innlum a Krismas zang di’n

ZOGAM PHALBI NUPI’N a puanpi vot takmai in Lamka khopi a khuh leengluung ta di’n ka gingta. Tedim Road dung ah secondhand van a kiluikhe phengphung ta dia, sinlai naupang te’n khawlhun leh vaantaang in hun awl zang in, mun tuamtuam a kipan bazaar kai di'n mi hong paikhawm ta dia, mundang a omkhia te tungkhawm panpan ta in, mipi leh gari kiphu nuainuai te’n lampi leh kongzing lai te a kitawtsak ta mahmah diing hi.

Kaihlam taang leh Lungthul taangtung lam khawng a kipan hongsuak khia, phalbi ziing ninou in Zolei mual leh guam te neemtak in honsal hiihiai ta diing a, Tuivai leh Ngajam-Tuiliam dung ah ngoumei a zaam liiliai ta diing. Hanship te’ Zawngsihlui sak a thuangpaak leh theidampaak zu tawp in vasa neu chikchik te haam vengvung ta diing ua, huchihlai in, Mualnuam in ziing nisa mulou in khomite’n nilum awi di’n Kotpi Mual lam a honzuan pan ta diing uhi. Vangaitang lam a singtangpa’ bi inntung a vuuk kia, ngou phihphiah te, leh thelnah tung a ngou dai kia tang singseng te’n laphuaksiam te’ lungleen a puangsak mahmah ta diing. A minthang Lungleen Kawl a kipan huihzang hongnung tonton in Sialkal Tlaang dung a honmuut panta diing a, Cikha, Haiciin zaang khawng ah mei a kai thrithriai ta diing. Sa chaang leh gan kai di’n Singngat tuailai te’n Buanlawn Tlaang leh Sasan Kawl lam a zotlai un, Thanlon tuailai te’n Vaiphei Mual lam a zuanpan ta diing uhi. Huchiin, Buukpi te’ Sakeel Kawl a suunni a hongtum khitchian, khavaak in Sinai Mual leh Songtal vaangkhua te a hontaan singseng diing a, biakinn a lia-leh-taang te’ laapawl zilna ginglawm te tungtawn in, zaan khosawt sianglai ah, lemna leh muanna in mualkuam a thawn chiaichiai ta diing hi.

Hiaibang hun in, Zodawn loutul leh pawn lak khawng ah taangsaam a hongpaak siuhseuh diing a, tua te’n Mang pianhun ahihdan hon langsak in, Bethlehem ngaihna tulsa lungsung ah a hon thaksak nawn ta.

Krismas hun hongtung nawn in michih lak ah ngaaklahna leh lawpna a hontun hi.

I kum a hongpung tou zeel a, sinna leh sepna ziak in mun dangdang ah i hong omkhia a, Krismas i zatdan a hong kidang hiaihiai hi. Innlam a nuamtak a a kilop dupdup lai in, adiak in India khopite ah a gim himhim le a nam phakei. Mundang a omte’ een huailouh hun pen ahihleh Krismas hun ahi. Amau te’n hiaibang hun a hongtun chiang in, hun paisa a, innlum a Krismas a na zatdan te uh ngaihtuah ua, eimi Krismas laa te ngai kawm in, suangtuahna khoveel a kilaam in, lungleeng ngoihngoih in hun a zang zeel uhi. Krismas hunnuam ana zatna sate uh amaute adi’n a kepbit thiintheen uh, gou manpha ahimai hi.

Delhi a lawm khenkhat in, hiai gou manpha a kepbit te uh hon phelkhia uhi.

Neulai Hunnuam
“Krismas a hong tunchiah neulai a lawmte toh niik, khedap, muja leh clip thak khawng kilaktuah a, kua’n balloon a muutlian zoupen chih kidem laikhawng ka phawk,” Luni in chi hi. Siasiam in, “Neulai a puanak thak, tual, a lace pan sirser, a rong laar deuh mai neihlai khawng nuamlua eive maw,” chi. Krismas ni a puan-ak thak toh kizeem a, sungte’ kuan le ngaakzou lou phial a omlai khawng Ginthang in ngai mahmah hi.

“Nu-le-pa te vanlei hongtun di kal uh ngaklah a niteng a bus station bang va kitung mai. Puanak, khekol, pistol, khedap thak chihte toh nuam kisalua. I nute’n tanghou khawng su dapdap ua, nitak leenkhop tawpchiah kine zel,” chiin Kham Naulak in geen. “Thanlon ah nam tuamtuam - Hmar, Vaiphei, Simte, Paite, leh Gangte kiteng khawm vek ahihziak in Krismas hun nuamdiak abang.”

“24 Dec zan a kuang doh. Kithuum in Pathian kiang ah i deih mahmah te aban-aban a gen daudau. Genzou, lumsuk, ka kuang kei lu zawn ah a om na hiam, chih en thaknawn. Huaikha, ziing baihtak a thou. Lupna nuai enpah, haha, nui khe kha! Pathian in ka van deihte honpia, chi in kipak mahmah. Puan-ak/khedap a omle bang silh/bun suk ziau. Lawmte va ohchhan zaih lai,” chiin Tete in a neulai hunte hon phorkhia hi.

“Nitaak lengkhop kar a Biakinn kiim a ‘In Out Rain Water,’ ‘Dampa-Spite’ kimawl lai ka phawk. Nute’n i pai utma a ahon paipih chiang ua nuak lai khawng,” chiin Chingboi in geen hi. PL Siam in lah, “Phantom pistol toh Lion keep kaap puak phekphek lai kaan omlou,” chi.

Nenem Vualnam in, “Veng naupang te toh nitak chia mei awi di chi, suun a sing khawng kitom zel. Azoh, ingah teng kha nitak chia field a kitawi khawm laihlaih inchin kichih zaizai zel. Nuam himai!” chi.

“Mawngluikawi lam ah Krismas paak phiphia te va kilou inchin, Taangsaam kung khawng kihawl sek. Apaak te bang va kibohpuk zeelzuul mai. Hiai paak ten December chiah i Zogam a kilawm sak mahmah. Tu’n a pak muh di lah om nawnlou a maw,” chiin Biakson in Singngat ngai mahmah in geen hi.

Malai Hunnuam
“Krismas kuan chia ka phawk chu maw,” Ngangai in geen a, “meikai thriithriai, aksi phe leplep te, biakinn a decorations te leh Krismas laa kikhah ging. Nitak kikhop tawp chiang a innkuan te toh meiphu kiim a sangkan lai khawng.” Khokhawl in ahihleh, “Innkuan a kimtak leh kipaktak a omkhawm laite a hon phawksak diakse,” chi hi.

“Khua a hong keu a, geepsim niipniap in i hong om a, lou nnasem te’n lah nnasep zouta, tuailai leh papite’n gamlak a sa beng, niteng phial a honman uchu sahou kigu mun atave! Nitaakchia’n lah khua a gamlum mahmah a, naupang chik hilele lungsim khat a nopna honpe lua,” chiin Lambawi in a Suangdai hunlui hon pholhkhia. Benson Guite in, “Singtang lam, khua khawng a zat khawmlai nuam e,” chi hi.

Kamlian in, “Krismas a hongtun chian van thak, bomb leh buuk bawl lai khawng ka phawk a, lawmte toh zaleen deuh, laisim di omlou a om theihlai ka ngai a, zan hah leh bawng ching lai bang ka thei gige,” chi hi. Joy Thanglian adi’n bel, Krismas i chih zingkal thoutuung sasem dia kuan, mike a Damhoihching/S Chingnu te laa ki play, mei khu gim nam, nungak te’n tui pua, singpi ki dawnkawm chih khawng ahi hi.

Thianmuang in, “Ken maw Christmas chiah innkuan kim a biakinn kai khawm, biakinn sung bang a mei (meh huanna) hong khu lingleng leh zansawt chia Krismas laa hong kikhah ten innlam ka ngaihna hon liansak diak,” chi. Biakhoih in, “Ka muhdan a nisa bang a satdan tuam, a vot dan tuam. ‘Krismas top!’ ka chisek ua,” chiin geen a, “a ni a ann nekkhawm leh ann nekkhit a kholai fang khawng nuam ki a kisathei.”

“Lawmte toh Krismas shopping pai, laa khawng zil in carol khawng pai, Krismas hongtun chiah atuam a zat sang a nupi-papi te toh leenkhopna inn a leenkhawm zaizai mah nuam pen,” Chinghoih in chi hi. “Delhi ah nih vei ka zangta na a, a nuam ka chihna di point khat le ka thei mahmah kei.”

Mang Ngaihte in, “Pathian hehpihna zaar in gam tuamtuam nga ka phata na a, eilawi zatdan a zang ka theih omnai lou ahi,” chi maidan eive.

Nuam Rura!
“Ann neekkham khomui kuan a kuva hai kawm a Teddim Road dung ah kimelhtuah lalaih. Leenkhopna ah laa thei ngellou a phuur a phuur. Tawp a lampi lai ah zun kibaan peh. Huaikha zanhak di’n hon ngak. Sung te’ phallouh te bangle kigu teitei. Bonfire kiim a tu toh, a laam toh phe nuaihnuaih. Nuam rura!” chiin Biak in a hunlui ngaihtuah kiik hi. Khup in a tangval tuunglai a nungak te toh puanza kikop, ann neekna a kuate hiam toh meh dohkhop, Kumthak sangkan leh thilpiak kipiaktuah te mahmah in hiai hun sunuam ahihdan geen hi.

“Leengkhawmna khawng ah laa theihna sunsun - a thunon lak - sa vakvak, upa’ te ngaihdan hi khollou. Jesu pian champha le kiphawk vetlou, a nopsak lam kia a kipai,” chiin Muan in geen. “Huaichiah, 31st Dec lawmte’ inn ah zang. Daak 12 hongging. Teddim Road phei ah kizui. Signboard teng lehkheek. Sagou te’ dohkaan bang lampi laitak ah tung vervur.”

Buukkaakna & Krismas Diktak
“Khatvei, neulai in ka nu’n sneaker khedap a kibang, AIR kichi te, ka u toh hon leisak lalat a, kikhawm dek pheituam sau teng di’n a hon sawl ua, ‘AIR’ kigelh pen khuhsuk kha ahihchia, a dawk keikha di chi ut bilbel lou himai,” chiin KK Tawmbing in geen hi. “Tuhun khawng in ahihleh zingkal a sasem dia kuan a, phalbi khovot nuai a singpi lum dawn kitkit khawng maimai nuam kisa ta,” chiin behlap.

“Neulai ki ngaipen hinte, lenkhopna hall a di buhpawl puaklai, a ziing a sasem na a a zunbu chaang, leh beelpi sapok khawng salam ngaihtuahna ah suak. Tu’n Bungmual a buhpawl puakna mun teng inn dimta,” Thangza Mwan in chi. “Khalam ah, ei bang a mi niam, kua thulaklouh, aman it a a mabaan di theisa napi a, a dinmun sangtak nusia a hongpiang, a hon it didan hon ngaihtuahsak mahmah ve.”

“Ka neulai in Krismas a hihna tak ka na phawkkei a, vanthak nei di, Mas putek in thilpiak hongpe di, chiin Mas hongtun kal ka ngaklah thei petmah,” Sangpuii Chhakchhuak in chi hi. “Ka pichin nung in Krismas diktak ka zangta a, bangmah hikei leng le, tu’nchu niteng a Krismas zat di ka chimai.”

“Krismas hun in emotions chiteng hong neisak thei,” chiin Haute in geen. “I neulai a mi pawlkhat a ding a lungdam pen ni, van thak ngah ni chihbang, aihhang mi pawlkhat adin, khitui nuul ni ahi. Mi’ neih bang a vanthak nei zoulou te adi’n kikhop di bang nuam lou thei. Krismas hun i chih suahtakni ahihkeh lungdamni in tuat in, Jesu tung a i lungdamna zahzah mi huhna, piakkhiatna in zang thei leng uthuai ka sa.”

HIAIBANG A LAWMTE’N Krismas memories leh experiences a treasure te uh ka hongelh dendon ziakkha, kei’ aa kia hongelh leng, simtute a bored khaak di ka luahziak ahi. Kei’ a te zaw k’on gelh sedah di. Ahi, innlum a kum 4 mawngmawng Krismas ka na zatkhak nawnlouh nung in, tu in, zang di’n ka hong kisa ta. Tu, hiaibang hun khawng in mite a din a lungsung uah Bethelem ngaihna hongthak mahleh, kei a din zaw, Bethelem lamlam le hilou in, pianna Zogam mahmah ngaihna a hongthak zaw ka chi. Khovel gam lianpi lak a ka gam, ka inn ka chih theihna di mun omsun. Kholai a ka pau mahmah zang a ka leen theihna. Sungkuan, tanau leh lawmteng a kimna. Tua gam nuam zuan in ka hongpai diing.

Innlum a Krismas zang di’n.

ZogamThuthang in PDS anntang dikloutak a zuakna pholhkhia

ZogamThuthang in October 20 leh 21 ni a Lamka khopi leh a sehveel, veng/khua tuamtuam a PDS anntang kizuakna zah kibanglou tak te a suahkhiat in a kisaipih agent te naaktak in sawiliing. Veng tamtak a agent te'n a diktak a azuaklai un khenkhat te'n a tamzaw in zuak uhi. ZogamThuthang a.h.k. ZTT in hiaithu a honsuah khiat chiang in PDS Agent Association Churachandpur te hong kisa khia ua, Sepnawnni, October 21 in Churachandpur sub-division sung a veng/khua tuamtuam dapsuak uhi.

PDS Association in a suina uah, Lingsiphai, Mata leh Zenhang Lamka a agent te'n BPL anntang a rate zah sang a tamzaw a zuak uh hi'n musuah hi. A kisaipih agent te'n association kiang ah ngaihdam ngeen ua, huchiin rate diktak in zuak ta uhi.

"Rate diktak a zuak agent tampi a omlai in khenkhat diklou deuh a zuak kha te'n association kiang ah ngaihdam a nget ziak un mipi te'n ana theisiam diing in k'on ngen uhi," chiin PDS Association makai khat in ZTT editor kiang ah thu tun. "Mabaan a a sutzop uleh a i Pawlpi saangzaw te'n a permit uh laakkhiat sak diing uh," chiin geen behlap.

Anntang kizuakna rate baan ah, innsuan a seer kihawm zah leeng mun tuamtuam ah kibanglou lai hi. "Hiai bang le hon suizom ve ua," chiin simtu tamtak in ngetna bawl zomah uhi.

ZTT a Oct 20 ni a kisuah
PDS antang man
Phailian 12
Sielmat 12
Tangnuam 10
HmuiaV 10
ZenhangL 10
Mata 10
New Lk 8
SalemV 8
Rengkai 8
Hiltown 8

Oct 21 a kisuah
HQV 8
Mualkawi 11
HiangtamL 8
BMual 8
LailamV 8
LamkaT 8
Lanva 8
Salvah Lanbung 10
NgathlKwnpui 8
Pearson 7
VengnuamA 9
BijangH 8

Hihdikna:Pearson & HmuiaV a PDS antang man Ch 8 ahi
#CCPur ah Lingsiphai, Mata,ZLamka ten dikloudeuh in zuak
#Sdvn dang ate kitheikim nailou

PDS Assn CCP'n tunin rate diklou a antang zuak agent te suikhia ua, tua ten Assn kiang ah ngaihdam ngeen
[Mipite' aw in ZTT pangzeel diing]

ZTT thu tamlou
January 20, 2008 ni a kipan khia, ZogamThuthang in munchih mualchih a om Zomi te adi'n tuni tan tatsat lou in thuthak paw khetou zeel lai hi. Thuthak masa pen a kikhahkhiat nung ni 275 in simtu siingkhat leh za sagih phial phata. Hiai ahihleh tongleng tawivial (mobile phone) tungtawn a simtu te ahi. Tamtak te'n vannuaivom (internet) tungtawn in leeng hunteng in ana sim uhi.

A kipat tuung apat ZTT in thiltung leh tanchin thak te kia taangkou pihlou a, gam-leh-nam leh khotaang vai a a diklou leh a dikte puangkhe zeel diing, chih a tup ahi.

Hiai hun manpha suam in ZTT in simtu tengteng tung ah kipahthu kigeen hi. Mahni sum seeng a thuthak honna pe zeelte; a khenchiang in ninhuai leh thulaak huai hetlou sim mahleh, hon laaksak tu te tengteng; midang kiang a ana geensawn te (ana geen thaanghuai te ;-D) leh atom in khoveel mun tuamtuam a ZTT simtu kheempeuh te -- KIPAAK LUA AW.

Theihtuak
~ZTT deih te'n JOIN ZOGAMTHUTHANG chia gelh a 567673434 ah SMS khaak di
~ZTT deih nawnlou te'n LEAVE ZOGAMTHUTHANG chia gelh a 567673434 ah SMS khaak di
~ZTT lakhin hingal, lah message bangmah mu nawnlou te'n LEAVE a, JOIN thak di ahi. Huchih nung a le apaitheih tuankei leh 9711796850 ah thuzaak mai in aw
~Thuchian zogamthuthang at gmail.com ah aw

October khasung a hunzatna khenkhat

Sports lai | Daih zezeen


Leel Simthu honna | Kamlian, LT Ngaihte, Kei


Leel Simthu honna | Kamlian, Thangkhanlal, Kei


Tuailai Day 2008 | Munirka lapawl


Tuailai Day 2008 | Munirka te

I pupa te apan kum khat sung a hunnuam pen dan a ana gen uh, phavaang hun ahi. Huaimah bang in Delhi ah leng, tu phavang hun, October kha hi, hun nuam pen ahi diam, ka chi mai ka chi. October kha sung in thilhihna tuamtuam a om a, huaite'n i hinkhua hunzat dan ngeina te apan a hon suakta khesak hi.

SSPP sports, conference, Tuailai Day chih te mahmah ahi, kumkhat sung a i na ngaklah gige, Delhi a hunnuam. Hiai hunnuam ka na tuahkhak te ka gelhma in ka hun haksa te k'on gelh masa deh.

Haksa va chih di le ahi zezen diam ah.

Delhi Siamsin Olympics 2008 October 1 leh 2, Nilaini leh Ningani a neih di'n heutu ten a hon thupuuk uhi. Kei bang a private a seem, adiak a BPO leh a huapkhakte'n kaallai hunsung in a khawlni a mu kei ua, a buai mahmah uhi. Sports lah a tel ut si ua. 2005 in conference kaallai hun in a om a, 2007 in leng conference kaallai hun mah in a om nawn a, tutung a sports hong hichi zeel pen tamtak te'n ngaih hak a sa ta uhi. SSPPNet ah leng hiai thu a kikupkhawmna huaise simtak a omman a. Kikaap tuah zezek na. Ke'n hichiin ka va kum tei a

Sportsi chih hi kimawl lungluut te adia kimawlni kia ahi kei a, a hohkhatengteng, aneu-alian, ateek-akhang, amei-apa kithuahkhawm ni, kimuhkhawm ni, kipolhkhawm ni ahi mai. Delhi ah eimi i tammahmah ta ua, saptuam tuamtuam i hi ua, biakna mun tuamchiat, kikhopkhawm theihlouh; sepna leh zilna tuamtuam, hun zatkhawm theihngeilouh.. zaan a kai toh, suun a kai toh, kaltawp hun a khawltoh,kaallai a khawltoh - - huai tengteng in delhi ah kum khat a ki socialize khawm theihna'ng hun aneih sun uh sports hinchin....

Naupangte adia lawmpolh ni, lawmthak muh ni. Tleirawl te adia hoihsak zonni,muhni. Tuailai te adia le huchi thou. Nungak-tangval melhni, zonni,muhni -- kitheihtuah ni, kipolh ni, kineel ni... Leengkul lamdeuh teadia koppih di zon hun remchang. Nupi-papi te adia kithuahlim ni. Piteek-puteek te adia damsung hun paiveel dan sim a tholeen tak a hunzat ni, lungzuan sialkhawm ni hinchin...

Hiai kha kei' ngaihdan hi hmiah mai.

Sports hun di, kaaltawp hilou a kaal lai a a hongtuk pen lungkimlouhna ziak in pawlpi a ka hihna apan ka na ki 'awngsuut' hi. Chia chepteh in ka om. Hileleng, ahikei. Ama a kipan thu hong pai toutou a om a ahi. Hilele, hiai ah huaiteng ka gelh dekkei. Ka gelh ut ahihleh, pawlpi adia ka na kipiakzohna te leh ka na hahpanna te tengteng, mangngilh leh nuulmang duak in a om a, ka thilhih hoihlou neuchik pen chepteh in a om zaw daih hi.

Hiai chiah chu naa ka sa mahmah ve.

Seppatni apan Sintawpni tan sepna ah kaisuak, Kiginni khawlni leh manni sunsun a dongsawp di, inn hah di, dawr kai di, nungak heel di, lawm polh di teng taisan a Siamsin Bulletin bawl dia kisa, mahni balance seeng a thu dongkhawm a mi i fawn kual, tua i thu donte lai a gelhkhe chitchit, tua te tawi a ka veng uapan ka sutna di veng uah bus kitawt deuhmai a tuangphei, khawlhoihkim ah tua thu te khumluut, mi dang fawn kual, kanchian, thu guangluut zeel, mangngilh khak a om deh aw, chi a en kiik thakthak, "thu tuamtuam," "kua ten bang gen" chih te hu dim, a dim zohkei leh a dimtheihna di lampi ngaihtuah, a tamluat lelah paihkhiat di toh hihtom didan ngaihtuah, zohfel chiang a, convert in va print khia, print khit chiah, xerox, xerox khit chiah, biakinn tuamtuam ah hawmdia va pe khia, inn i tunchia zaan dak 12 gingta, kisil khit chia ann huan, ne, i hongman chiah zinglam dak 2 naihta, huaikha zingkar beltak a thou a biakinn lam delh ngaizeel...

Hiai bang a i na panna te kuaman hon theihpih kei le ule, pawlpi i iitna ziak a i sep ahi a, ka kipaak veve ahi.

October 2 sports ni in nitaklam in ka va hohzual a, nuam ka va sa mahmah, kei huntawk in, chih di ahi. Hilele, bangchi dan a le, mi serious thei peetmah uh. Football final kimawlna ah, a out zen pi umpire in a mukei a, a muutkei a, a hawl ua, goal a khum hiau ua, huchiin khatlam te thangpai in a pawtkhia uhi. Batman film a Joker gendan takleh, "Why so serious?" chi ut dan ka hi.

A sports beinung tanpha a le buaina neuhneuh, complain vel bangvel om tou nalai.

SSPP sports lam hiaitan hileh.

Pa LT Ngaihte in October 11 ni in a laibu bawl LEEL SIMTHU a release a, a hon chial a, ka va kihel thei hi.


Tu'n Tuailai Day.

Laapawl zirna ah pasal ngen, pasal ngen ka hi ua, numei a tawm mahmah uh. Munirka kha, a seem ngen a kihih ziak in manhun a kituak thei mahmah kei a, thilsai hi a buaihuai mahmah. Kaal khat veel ka zir hawhaw ua, a hun in gimhuai in ninhuai sim mahleh, a khonung in a na nuam maimai khemkhem ahihdan a kithei pan hi.

Tukum Tuailai Day hunzat a nuam mahmah mai. Rev Dr. Pumzathang in hunpi a laa a, October 18 Kiginni in seminar dandeuh a hon neihpih hi. Ziinglam in hinkhua a mi lohching te tungtang ahon genpih a, nitaklam in dotna leh dawnna hun a om a, huaizoh in, nungak-tangval kingaihna leh kipolhna thu a hongen pih hi. Nuamthei hita ven. Durdur mai. Pa Thang chu, a thugeen nuam himai. Expression siam thei law peetmah himai. Sunday ni le nuam. Lapawl mi 50 veel in ka hon sa dumdum uchu, biakinn sung le pua khawng liing durdur mai ka hi uh. Formal deuhmai in ka kichei a, zenzen in, kamiz baantawn, zeeplut, khekor vom, khedap mong zum teeng in kong kikhawm taktak chu - - a tatak te kihimai. Hilele, ki smart chetchut lua, i om remthei mahmah lou. Hi leeiluai nilouh!!

Seenchiil Vangngaih

Baihdeuh mai in ka phone a hongging buutbuut a, ka et leh ZogamThuthang a khah di, thuthak innlam te'n a hon message uh ana hi hi. Khamlou deuhmai in ka thoukhia a, kihahsiang in hulliap ah ka hongdaak khia hi. September ziing ni suak in neemtak in a honsal hiihiai a, huihnung bang leng a vot theidek hiauhiau ta. Ka luutkiik a, ihmut nawnna dan lah om nawnlou ahihchiang in, Pathianni ahihtoh kikhop ka honsawm daih hi – Siamsin Bulletin (SB) le hawmdi omthou hiven chi in. Khateng a kikhop veu le, chi a kikhop ana sawmlou chu hi ing a.

Biakinn ah thugen in honkhim ziak hia, ahihke'h ihmut khamlouh ziak hia, ka ihmu kha den hi. Tawpna laa a honpat un ka khanglou a, ka pawtzui ngal zomah hi. Kikhop man omkei vaanglak. Biakinn kong a ding in SB ka na hawm a. Mipi te’n honla dialdial ua, kuamah houpih man di ahikei. A meel uh leng a ki en mankei. A pailiam zungzung zeel uhi.

Huchihlai in, ka ma a hongpai numei khat news laidal a khut a ka piakkawm in, a meel ka entou a. A mit zawntak ka etleh aman leng honna en kilkel hi. Ka kiguih hial. Thakhat a khovel hong dinkhawl thut mah abang. Ka mit ka khap a, a meel ka enthak a, huchiin ngaihtuahna pingpei in ka lu a hon pei hi.

Ka manglam hia? A taktak?

"Kimbawi na hi ... himah te maw?" ka chi hi.

"Hi, himah ing e. Nang la U... U Lun maw?" a hon chi a. "Hi," chiin ka dawng hi.

Kum tamtak pailiam khinta sung a ka ngaihtuahna lampi tawn a hong paikha ngeilou, ameel-apuam leh a aw te bang leng bulhtuah theih nawnlouh diing khop a ka suangtuahna mitkha apan ana mangkhinta, tu in ka mai ah a hong kilang phut a. Lamdangsakna, diiphawmna leh kipahna kigawm in a honbuak hi. Huaihun laitak in, khua leng a hong daiduak hi'n ka thei.

Ka mit ka si a. Hunlui mualliamsa te'n a hon per kiik suksuk mai. Amah Kimbawi, Singngat vaangkhua a ka naupang lai hunte uh, Sande skul ka kaikhawmna mun uh, ka lawmte leh ka kimawlna mun te uh abaanbaan in ka mitkha ah a hong kilangkiik dundun hi. Kum 11-12 paita, tuni, hiaibang hun khawng a hun ka na zat diing dan ka hon suangtuah a, aneeneen in, abaanbaan in ka hon remkhawm a, ka hon bulhkhawm kiikthak hi.

Huailai a kha, Sande skul kai ki-a-kiphuur thei. Ziakchu, ka class (pawl) uah numei khat om inchin, hoih kisa sim, huaikha, ki-a-kimu ut, lah zah-a-zahtaat zeel, chihdan deuh. Kimbawi ahi ka geen. Ka skul kaina uh a tuam ziak in Sande skul ahimai, amah ka muhtheihna mun omsun.

Ka Sande school huangsung uh a nuam mahmah a, kongtual lian huntawk khat om hiven, huai ah ka kimawl nainai zeel uhi. Numei te ling, peeklum, leh lastic khawng a kimawl ua, pasal te lah thengh te, deen te, kibuktasial, milawngpi, kidelhte chih khawng ka kimawl vengvung sek uhi. A skul inn kiang a singkung khawng ah tuang in ka va kisawi ekek sek ua, segah khawng tom in, a gamleek deuhte lah a khanglam a gamkawm ah a ava gamtaang vaksek uhi.

Nuam thei lozeen a. Ngaihna omlou.

I kuanhak deuh ni chiang bang a Sande skul i gaal etleh, naupang ngen, naupang ngen, phe noinoi, haam cheelchuul, chiak zuazua mai. Huaikha, a bouruak himhim in hon hiiplua ahihchiang a, kiphuur lua inchin, delh a kidelh liam suk vuvut mai dan ka hi uh.

Kimbawi te lawmta lastic kimawl a kitawm zatzat sek hive un, Biabiak toh a kimawlna gei uah ka va pai teitei zel uhi. Va en mawk. Va thoh. Ahihke'h va engbawl zeih. Ameel mu a, a kiangnai a om khawng nuam sak a kisakthoh mawk dan ahi. Aziak di le thei tuanlou. Om didan le thei tuanlou. 'Star' a chihte uh ana hi didan hiveh aw. Zeihzeih mai.

Ka kuanbaih deuh ni khat un Kimbawi, a lawmte toh room sung ah ana om ua, amah baang ah ana kingai hi. A kingaihna nung zawn chiah ah baang vang om hiven, huai apat lawmpa toh ka en ua, akam ah chiikhum a muam peerpuur a, "Nnggaaa! Kimbawi, na kam puak!" ka chihleh, "Ut a leh!" chiin a hondawng bauh hi. Baang vang apat chiangtawn khat a akhe ka va sutsak chiitchiat leh naa sa sim. Thren luailuai zezen. Bangmah chu hon chih ngamlou. Azoh, hunpatna daak a hongging a, room sung a luutdia a kipai khawm nainai lai in ka na tai chenchen a, kongkhaak bul ah ka na ding chat hi. Den a chiangtawn pen mah kongkhaak ah ka na kham a, Kimbawi te lawmta a hongluut un, ka na kaansak sese hi. Amau bang zak-a-zakta uh hilai.

Khatvei, Kimbawi te ling kimawl ka en ua, aman a kaap leh a hang a, a paamdeuh a dailing buk kawmlak a tu hi. Chih ngaihna a theikei ua, huchih laitak in ka va paiphei a, "Ke'n k'on laaksak di," ka chi a, dailing kawm ah ka va luutsuk hi. Ka va la a, pilh nengnung sa in ka hongpawt khia hi. Kimbawi' ka pia a, a nui seusau a, kimawl a sunzom nawn uhi. Morningstar paak te puanaak nung leh baan khawng a i bet chiang in a lim kilangthei a, huaikha theihlouh kal a kibetbelh sak ka thangsak mahmah uhi. Khatvei a lawmte mi 3 toh Kimbawi te'n thakhat in ka nung ah a hon belhsak chot ua, ken le amah ka delhngaal a, a kipalpuuk a. A nung ah naakpi a paakteh ka va bet dup leh a puanaak ah kilang chiang thou ei.

Kimbawi te numei te' tutna lam a vual nihna ah a tusek ua, kou le pasal lam a a nihna ah ka tu tei zeel uhi. Heutute hongluut ua, laa a honsak pih zaizai uhi. "Atak manpha nuamna na ngah nopleh Jesu na lungsung teengsak in," chih laa bang ka sakmun pawltak uh ahi. Tutna vualvual a changvom gen kidemna om chiang bang in Kimbawi te vual ka el thei mahmah uhi. Laidal ziikkhia in leenna lem, rocket chihkhawng ka bawl ua, a tutna zawn lam uah ka deeng phei keuh zeel uhi. Heutu te'n thohlawm dong di'n naupang te khatpeuh a honsawl zeel ua, khatvei Kimbawi in a hon dong kha hi. San tuaituai sa in kou tutna mun a hongtung a, sum siik khat kheging kalh in ka na en chenchen hi. Aman chu hon en ngam hetlou. Tawpchiang in Kimbawi te' nungnung ah ka pai ua, amau a innchiat ua apai khit chiang un kou ka pawtsuak zeel uhi. Paldai lam khawng ah. Ahihke’h video en.

Huaibaan a ka om dan te uh chiangtak in ka theithei nawnkei. Mahleh, ka theihhoih mahmah thil khat a om. Huaibel, ka hinkhua a ka na theihkhaak ngeilouh, tuni tan a leng huai dandan ka tuahkhak nawn nailouh, Kimbawi in ka lungtang a hon luahdaan ahi. A meel ka muh khak chiang in kipahna lamdang takmai ka nei a, ka muhlouh chiang in muh uttha asuak tuntun sek hi. Ka va muh hial chiang in ka zahtaat zeel a, lah, a kiang nai a om nuam ka sa mahmah zeel hi. Bang chi ka hia chih leng ka thei tuankei. Ka naupang suangtuahna mawlchik in khovel a ahoih leh a etlawm teng toh Kimbawi tehkaak in, ka na bulhkhawm sek hi. Amah zaw tangthu a glass slipper bun ka Cinderella, ka Little Red Riding Hood, ka Sleeping Beauty, ka Vaanleeng' Tanu, ka Hausapa' Tanu, leh ka Lengtonghoih ana hi gige hi.

Hiaibang a neulai hunnuam te ahi bangbang leh sukbuai louh a tangtawn a paitou hiauhiau mai diing ka na saklai in, thakhat in keekkia bangmai in kum 1997 in khoveel a hon deeng darhphuah mai hi. Ka hinkhua vaak siilsial lai peen mial in a hontuam ta. Gaalbuai ziak in Kimbawi te'n a innkuan un Shillong lam ah a hon peemsan uhi. Hiaibel ka taangthu uh beina ahimai.

Ka hinkhua apan Kimbawi a paikhiat nung khatvei leng ka kimu nawnkei uhi. Theih leng hon thei nawn di'n ka gingkei. Kimbawi toh ka na kituahkhaakna hun te uh zaw neulai a ka pi'n tangthu a honhilh, tua ka mangngilh taak te bangmai ahi ta. Amah ngei leng maanlai tangthu a a etlawm mahmah "nahpa san," lui tuiluang in a taihliam bangmai ahi ta. Ngaihtuah khak in leng ka na nei nawnkei.

Tuhun tan in.

Bangtan mitsi ka hia, ka theikei. Ka mit ka hakkiik nawn a, Kimbawi in honna en kilkel hi. Geen diing tampi om mahleh bang peen geen a koi a pan di ka hia chih ka thei zezen kei hi.

Atawp in, "Dam maw?" chikawm in chibai buuk di'n ka khut taklam ka pia a, aman leng a honna saang a. Huchiin, amasakna pen di'n a khut ka hon leenta. Neem takmai. Leh nou ngiingei.

"Dam," chiin nui siausiau in a hondawng a. "Nangla?"

"Hi, keile dam," liing sim pupulh in ka chi hi. Ka khut a SB hunkhop omlai teng lawmpa ka pegai a. "Nang tua koi a om e?"

"Nanakpura ah, ka Pa Lian te kia'h, na thei diam ah. Nang la?"

"Munirka, chih dandeuh. Pa Lian maw thei e zenzen," ka chi a. "Hon thei nawnlou di k'on sakleh."

"Theilai mahkei dia," nui hiuhiau kawm in achi a, "hilele nana kikheng lawta. Thaudeuh na bang maw. Tarmit khawng nana bun a."

Huchiin theitui a kihawmna lam ah ka paisuk ua, bangtan simta a, banghih ta ka hia chih a hondong hi. Ka geen a, aman ahihleh Shillong apan graduation zou daan ahi. Kaal masa a Delhi hongtung a chi.

A lamdang in a nuam telmai. Geen didan tuan le ka theikei. Ha hul zeen a nuih fiamfuam reng a uthuai mai ka chi. Nidang a kei mit adia a etlawm bang in tu in leng ana etlawm lailai a, a mai apan ka mit ka taikhe sak thei mahmah kei hi. Ka kimuh nawnlouh hunsung un, hun-le-ni leh kum-le-kha te'n Kimbawi ana duat mahmah uh ahi ngeidiing ua, etlawm, hoih leh deihthoh huai takmai in ana khanglian sak uhi. Huaiziak in ka kipaak lua. Ama' aa di'n.

Kimbawi in leng kipahna tak khat nei hidi'n ka ngaihtuah tei mawk hi. A nuihsim hiuhiau dan apan. A hon en a, thakhat in a meel latdaan a hongtuam phut a, "Kei maw, tuzaan..." a chihlai tak in a Pa Lian in a sam a, pailam vai a sawmpih hi. A car geitan uh ka va kitonpih phei a, "Bang eita?" ka chihleh "Bangmah hikei," a honchih san daih hi. A luutdek in, "Ann nekkham chiah honghoh oh aw. N'ong hoh teitei di eikha. Aw?" chih tak meeltak in a hon chi nguutnguut hi.

"Hilua heh."

Innpai, ann neekkhaam in Nanakpura lam ka zuanphei pah fefu hi. A inn uh ka tun in nitaklam dak 3 a gingta hi. Ka va luut in Kimbawi pindan sunglam ah buai in ana buai a, kholhkhawmna pindan ah ka na tu hi. Zogam.com leh SSPPNet khawng apat ka theihsa hiven, a Pa Lian politics a lungluut mahmah a, ka houlim kha ek uhi. Kimbawi a hong man khong a, a hon tutpih ta. Huchiin eimi tangvaal tuung, nungak heel chiang a i chiindan te uh abaanbaan in k'on apply tou a – ann a nek khit leh khitlouh dong, tuisuak dia sawl, kuva puak te pia, album etdia ngen, leh adangdang.

"Ana nupi nai hialkei te maw?" ka chiamnuih a. "I kimuh nawnlouhna sawt thou ta maw, vengveng."

"Sawt eimah voi. Eh, ka peem nung uh i khua uah nih vei hiam va paikha ta keive. Hilele kuama'n honna thei nawnlou uh."

Luck mahmah ahi dia, a phone di ahike'h message a hongpai zutmai a, kei a lahchu ZogamThuthang loungal bangmah om mahmah lou. Amah leng atawp in a hong kisuanglah hial hi. Thu vantang khawng houlim in ka om ua, nuam ka sa mahmah. Atuung in kizahtaat tuah sim mahle ung, neulai pek apat ana kitheisa nanana chu, Ngeisok (Central Lamka news) te' geendan takleh, "ka hong kineel taktak uchu, a chintawk ka theikei reengreeng uh" ahimai.

A Ni Ching' lawmte hunkhop a hongluut ua, Kimbawi kiang ah, "Na man leh koilak hiam ah i va pawtkhe maimai diam?" ka chi a, a hon aw hi.

Huaihun in ni tum di'n a kisa ta. Satya Niketan kongzing nuam takmai ah pai in, Sharmaji dawr ah kuva ka hai ua, huchiin, Priya manoh sawm in auto ka dawp uhi. Ch. 30-40 veel hizeen pi aheekpa'n 100 a honchi toih hi. Deek. Utlou. Kiseel. "500 k'on pediam?" ka chih ek lezaw, a ngaihdan hikei thou ei. Taikhe vengveng. "Delhi ah kha, ataangpi a vaite khelthei lua unchin hon lohgawp uh eivoi," chiin ka nui hemhom hi.

Angeina daan mah in Priya mun ana luun peetmah a, nungak-tangvaal kaaltawp hun nuamtak a zang in ana vaakkhawm hialhial uhi. Eilam mi nungak fuh simsim khenkhat, mivom te leh vai te khawng toh kikawi, kileen in ana kizui lalat tei uhi. Kimbawi a ut ziak in shopping complex kiim ah ka vaakkual ua, ka houlim ua, akhenchiah ka nuikhe ek zeel uhi. Kipiching sak sim le le, bangchi dan eidiam ah, naakpi a nuihkhiat tuar chihkhawng kitawpsan theinai mahmah lou. Amah le ana huchi tei thou, haha! "Eigeel i pawtkhawm a, tangval te a hehthei a om di e!" ka chihleh, "Omlou e, nang lam ah a omkei ngaal leh," a honchi a, "Himai!" chiin ka dawng hi. Zan, zanhal, hal masa, zanlam, kha masa, nikum, leh kum masa chihkhawng a ka na omdan te uh ka hon geenkhawm suksuk ua, atawp in ka vaangkhua uh ka hon geen tung uhi.

Huchiin Barista ah ka luut pih hi. A omna mun a fuh a, a dai a, thoveng tak a hun zattheihna ahi. Huaimah lah ka ut ahingaal a. Cappuccino ka la ua, a siik khat a table ah kimaingat tuah in ka hongtu uhi. Saaplaa neem deuhmai a kikhah diaidiai a, Kimbawi meel ka en a, a ngaihhuaina in a honzou ngeimai.

"Kim, bangziak a hiai tantan nana mang? Na …" Ka geenzoh ma in innlam apat a phone di a hongpai a. Bangtan hiam apau zoh in neulai thu ka honsuut khawm pan uhi. Aman leng thildang teng sang in Sande skul a hun zatlai te mah a theihoih pen a, ngaih leng a ngaidiak, a chi. "Khatvei, i khua ua ka va pai ua maw, Sande skul lam ah va vaak ing a, ka lung a leng dan chu," achi hi. Ka geen leh nidang a dailing kawm a ling ka na topsak lai, 'na kampuak' ka chihlai khawng, kongbul a chiang ka kaansak laite khawng a theihoih mahmah hi. "Huai, khatvei thohlawm dongdia heutupa'n i nih a honseh khawm inchin, ka thohlawm donte ka sukbuak veklai kha, na thei hia?" honchih pen bel ka na theinawn kei.

"Ngaihhuai e maw, U Lun," achi vengveng a.

"Ke'n le ka ngailua."

"Sapkiik theihleh maw."

"Sapkiik angai nawn tuan saam a, tu’n i kimu ta vele. Huailai hunte i sunzom nawn keidia. I pehthak nawn dia, ahihke’h i panthak dia."

"Tua chu hithei nawnlou eivoi."

"Chimawk! Ken lah nang k'on muhnawn ka kipaak lua a. Ka neulai pek apat na tung a lungsim guuk ka na neih, ka na gen ngam ngeilouh tu a hongen sawm h'ing a."

Nui siusiau in a hon en a, "Maw?" a chi hi.

"Geensuk thruai maile. Iitna bang ahia chih ka na theihsiam ma pek apat honna iit ta ing a, hilele nang n'on bangchi ngaih dia chihchu theilou. Nidang a i khua uah, khatvei ka lawmpa Biabiak' hon panpihna a nang a di letter ana gelh ung a, Sande skul a honpiak di ka chihleh ngamlou. Tu in huai letter a ka na gelhsa te mah, na ma ah k'on geen a. Kei a di'n zaw nang mah na hi lailai."

"U Lun, ka kipaak lua. Ke'n le nang k'on muh leh ka lungsim hongthak nawn inchin. Nidang a nang muh di ziak a Sande skul kai phur a ka phurlai te khawng hon phawkthak sak chin a. Ke’n le nang honna …” a tawpthak a. “Hilele, tua chu thilteng kikheel ta eivoi."

"Bangziak eita, Kim?"

"I hinkhua tuamta, i paina'ng le tuamta. Career kha ngaih poimoh ngaita inchin." A mit hah etlawm takmai kawm apan nguina thuuktak mai hong kilang khia hi'n ka mu hi. "Kei maw tuzaan chiah pai di keive. Gamdang ah."

"Chihchu?" mawltak in ka dong truh a.

"Higher studies a UK ah paisawm ing a, hongkiik pah nawnlou di…"

Abaan a ageen te ka zathei nawnkei. Ka bil a ging vungvung a, ka aam a hai huaihuai hial hi. Bangmah leng ka ngaihtuah theikei. Capuuccino ka dawn kut a. Atawp in, "Dak bangzah a na flight?" chih teng ka kam apan ka pawtkhe sak thei haamhaam.

"Ziinglam daak 2.45," a chi a.

'Kahnuih' achih te dan chiah uh hilou, kipaak hetlou pi, kipaak hi awmtak a kilangsak in, "Hoih e, na hampha lua. K'on kipahpih lua," ka chi hi.

Barista apan ka pawtkhia ua, kiiklam in lampi ah geen diing a vaang mahmah mai. Kum 12 nung a ka kimuhkiik nawnna uh kipah di hia, ahihke'h, mabaan a kimu ngei nawnlou thei dinmun a ka om pen uh dah di hia – ka thei zoukei. Aman leng a thei zoukei. Hi'n ka thei. "Kim, bangziak a hon paisan pah di khawng, tu a n'ong kilaak kiik phiing? Bangziak a tuma lam hun khawng a k'onna tuah khaak louh?" ka chi hi.

“2000 a i khua ua ka va pai ua maw, nang hon zonbawl ing a, na meel khawng honmu di ka kisakleh…”

“Maw? Kei huai a Lamka ah omta keivoi.”

“I thilhihna peuh ah, ginom tak leh kuhkal tak in omle, Pathian in lem a hongeel sak dia, i kituak kha nawn kei dia maw, huaichiang in…” chi in ka liangtung ah a hong kingai a, a sam awl in ka zuutsak hialhial hi.

Geen diing tampi om mahleh ka geenthei nawnkei. Ka kisuum zomai.

Huaizaan Kimbawi’ Pa Lian te inn ah ann ka va netei a, a Pa Lian toh a u-te khat toh IGI Airport ah Kimbawi kha di'n zaan daak 12 veel in ka pawtkhia uhi. Kou geel car tutna nung pen ah ka tu ua, a khut neemtak ka leen hi. Delhi lamlian tung a ka kitholh henhen lai un ngaihtuahna a paisau mahmah mai. Kiimveel leh malam khawng a meivaak ziizia te hongmial dundun hi un ka mu a, Kimbawi - ka seenchiil vaangngaih - ka letna khut ka kipsak deuhdeuh hi. Hon paisan ngei nawnlou di'n lettaang ka utngei.

Airport ka tung ua, terminal ah chibai kibuuk in hon luutsan di'n a kisa hi. Ka va naihphei a, huu diik kuaikuai zeen in, “Kim, i Sande skul innte, tohlet leh baang te, asung a tutna te, kimawlna huangte, leh agei a singkung pou te ana omlai di un na gingta hia? Ana omlai bang hileh uh a honthei lai d'uam?" ka chi a, a mittui a hongtaak khe keuhkeuh hi. A paam a om a Pa Lian te le zahtaat zou nawnlou in a honkawi top a, ken leng ka kawi ngoihngoih hi. "Nang toh khut kileen helhel in huai mun ka va paikkiik utngei. Loupa hing dipdip gim te leh huihnung hiauhiau te ka va diikkiik nawn ut."

A mittui ka nuulsak a, a hon entou a, "Ka utlua, U Lun, ka ut lotel," a chi hi.

"Kum hiaitan ka honna sukmang nung in ka hon mukiik a, tu in zaw ka hon sumang phal nawn mahmah kei. Honna ngaak gige di ka hi," ka chi a, a hon luutsan ta. Security check-in a a tummang madeuh in a hon gaal et kiikthak a, a mittui paak niuniau kawm apan a kam a honka a, a kamphun apan hiai honchi hi'n ka thei.

"K'on ngailua."

© VAPHUALIZATION | Hiai ahihleh a tatak hileh kilawm tak dia gelh, phuahtawm taangthu maimai ahi. Mun, min leh thiltung a na kibangkha bang a om zenzen leh ‘coincidence’ maimai hi di ekha aw. Mundang koimah a suahsawn phallouh.

O Munirka | 2 NE girls raped in Munirka

Munirka is making the news again. Welcome to the city that never sleeps, The Last Vegas.

Two Northeast girls were raped in the dark alleys of Munirka, South Delhi at around 1.30 a.m. on August 12 by seven unidentified males. The two girls were returning home from work when they were attacked and pushed to the ground. The unidentified persons then took turns to rape them. Nobody responded to the girls’ scream. Nobody came to their help.

Sadly, the identifications of the victims as well as the rapists are not known. No police incident report has been made, no FIR has been filed.

The incident is first reported by ZogamThuthang, a microblogging Zomi news service.

Muan, a student residing in Munirka, saw two tattered pairs of women’s bra and underwear by the roadside in the early hours of Tuesday at around 6:00 a.m. By that time rain had already soaked the entire place.

On Friday evening, Ms. X, a friend told Muan that one of her managers witnessed a rape incident in Munirka the past Tuesday at around 1.30 a.m. She is working at a showroom in Priya, Vasant Vihar. This happened to be exactly the same place where Muan had seen the pairs of underwear on Tuesday morning.

The manager said to her, “We heard someone screaming, went to the top of the building and saw two girls being dragged and raped in turn by around seven unidentified persons.” He added, “We couldn’t go down to help since the gate had already been locked.”

They then seemed to have enjoyed the whole episode from the comforts of the top of their building. This, is absolutely shocking. People who witnessed the rape of two helpless NE girls without even trying to try to help them are far guiltier than the rapists themselves. Gates may have been locked, but neither lips nor phones can’t be locked.

RELATED POSTS:
Story of an NE girl
Zomi Girl Molested

Music lam gelhnawn le...

Zaan a hongsawt hiaihiai a, khua a hongdai deuhdeuh a. Hiaibang hun khawng in khoveel ah laa tampi om mahleh, eimi laa te mah a ngaih a nuam a, lungsim honkuai diak hi’n ka thei. Eimi laa chiat ah le, a zawl laa lamdeuh mah kingai kha naak hiveh aw. Pathian laa lamte ngailou chihna chu hituanlou maw.

Zawl laa leh Pathian laa sak kikaal ah ngaihdan tuamtuam ana om gige hi. Adiak in Lamka lak ah, zawl laa sa te sang in Pathian laa sa te a laar zaw ua, pahtaak leeng a loh bok uh. Mahleh, zawl laa sa te bangtan hiam ah, ngaihneepna khat om hileh kilawm. A album uh le zuak haksa sazaw hileh uh kilawm.

Tuma deuh in ka veng ua tuailai pawl kipolhkhawmna khat ah zawl laa sak leh Pathian laa sak kaal kikupkhawmna ka nei uhi. Ka geen tangpi uh ahihleh zawl laa sak toh Pathian laa sak koi a hoihzaw, a nih a sakkhawm theihmah hia, mi a pianthak chiang a zawl laa sak tawpsan a Pathian laa kia sak di mah hia, chih khawng ahi.

Huai ka kikupkhawmna hun ua a thu paidan leh hiai ka laigelh in a kawksawm pen thiltuam daih ahi.

Tua hun a paikhawm mi 26 lak ah mi 8 in Pathian laa sak mah hoihpen in a teel ua, mi 9 in Pathian laa hi’n zawl laa hileh hoihsa a tuak uhi. Adang mi 9 ten ahihleh laa siam hi a, sathei dinmun a om hile uh zawl laa mah sa di achi uhi.

Tukum Zomi Nam Ni lopna video ka na enkha a, duur ka sa mahmah. Mipi a tam a, nuam a sa thei mahmah mai uhi. Kumdang teng sang in leng tukum nuam sazaw hi un a lang. Mizoram lam apan laasiam te a hongpai ua, a tuailai mahmah-na uh, a tulai mahmah-na uh, leh, a meelhoih leh changkaanna te un mipi te a muutpuuk duamduam mai hi. Hunkeempi-pa bang kideek zoulou in Mami Varte, mipi mai a a lasak lai, a va laampih lohloh nilouh! Atom a geen in, eimi laa leh i gam ngaihna laa te saang mah in Mizo zawl laa te’n Lamka huihkhua a zeelsuak dumdum hi. Lamka mipi te hi, laa i siamthei mahmah ua, a hong lasak te bang uh a tawn in i na zuisuak thei vek tel uhi. Huchih vengvung lai in, atul theilou Haumang, SN Thanga, S Chingnu, V Siampu chih te khawng in a ommun chiat uah, daitak in, tukum Zomi Nam Ni ana lawmtei diing un ka gingta.

Huchiin, Zomi Nam Ni in a puakkhiat Mizo laa hii, i khopi sung ah leeng chihtak in a hongleeng hi. A nung sawtlou in Lengtong Pauno laa, a sakthak te uh, a hong kithang khia a. “Nang Na Zuang Lou Maw” chih te khawng in M Sailova laa te a honmuut theng duakmai. Naupang pauthei tuung te nasan in hiai laa te sa thei uh ai’hbangh!

Sawtkuam takmai koihdap a a omnung in, tu in, Lengtong Pauno’ min, a laa, leh a thupina taangthu te Lamka kholai dung, baang te leh huihkhua khawng ah, phawnhalh in a hong omthak nawn hi.

Huaikhit in, Gloria’ hun a hong kipan. Album a bawlma a kipan a minthanna in khoveel Zosuan te tenna munteng zeelsuak khinta ahi a, tua “Nang Di’n Zang Ning” album bang, a thupi ngial ve. Adang te geenlouh, a video a changkaang mahmah a, a kisak theihpih huailua. A nu, Lianlunching in leeng a honsa kha a, a thupi mahmah hi.

Gloria Niangbawi khit in Mimin Baite a hong kilang nawn hi. Mimin Baite laa te nanaa-na chu Gohau in uluk tak a bawlsak him hiveen, a fuhsa himai maw. Sound chiang, video et nuam, music te le hoihtak a ngaihtuah khawl detdet a bawl ahi ngei dia, Mimin Baite 4th Step: Ei leh Ei a leikha te kisiik om hetlou daan ahi. Khangthak te’ lametna subuching tu, Mimin mahmah!

Hiai Mimin Baite’ VCD bangzah hiam Delhi ah ka zuakkha a, ka zuakkhaakna te apan ka muhsuah ahihleh, “ei leh ei kidopsaang tuahdi ahi” chih laapi i sakma a, i quality hihhoih masak phot di ahi, chih ahi. Nawmtawm tak a hihzual hilou a, a hoihthei peen dia bawl, hiai album a zuak a hak hetkei. A laa hoih a, a kaih nalh a, music fuh a, video leh editing siamneel tak a hih ahihnaak leh zaw, eimi te a leidia mansa ngen a om i hi(ta) uhi.

Ka thugelh hiaitan in khinleng le hithei ahina a, thilkhat k’on behlap lai chiitchiat deh.

SSPP JHQ Delhi in asai, SIMAS 2007 a thupi mahmah a, hiai in zung nasatak akai a, a kahiang leeng mun tuamtuam ah a zaam hi. Hiai music awards a kisai khit a kipan music lam ah halhthakna chikhat Lamka ah a hongtung hi. SSPP Voice of Jubilee, Inter-Tribe Super Idol, Hornbill Little Star, Angel’s Vision Music Awards, EHA/Hornbill Teen Star chih te abaanbaan in a hong kizomtou ziahziah hi.

A thak zonkhiat i pibawl lai un, a omsa, paampaih in bangzah a omta deh aw; zailaa leh tumging lou, lam chi tuamtuam a kiphawkpih tuah leh kipahtawi tuahna daan lampi panthei chikchiang in i hong omthei dia, chih khawng ka na kidong kheemkheem ve. I pau a laibu tuamtuam ana bawlkhia, lemchiin nalh taktak ana suahkhia, khoveel vaak honpo luut tanchinbu tuamtuam suahkhe zeel, leh adangdang te bang.

[S Pauginmuan' laa thak, "Suunkim ka lunggulh, zaanchiang ka zaalmang in" a khahkhiak louh, ka kiang hongtung kha khat, ngai hialhial kawm a hiai thu gelh ahi.]

Sir Lengtong Pauno Pahtawina In

-Haumuanlun Samte

Zomi te' Pathian kiang ah siamna chi tuamtuam a Zomi te a honvukna leh hiaibang a mi thupi a honpiak ziak a kipahthu geenna thuumna neih ahihkhit in, mipi mai ah sap in a om hi. Lengtong Pauno! Mipi te'n khut beeng zuazua in ana vaidawn ua. Huchiin a hong kilang a. A hongpai niitniit a. Ameel leh a hong khohei daan apan kilawpluatna leh kithupisakna bangmah a kilang kei. Kingaihniam meeltak in tua paungaihna a honleen hi.
Hiai ahihleh Lengtong Pauno Laasak Silver Jubilee chin lopna hun ahi. November 11, 2006 ni ahi a, amun ahihleh EFCM Hall, Tahaan khopi, Kawlgam ahi. Dohkaang tung a puankhai ah "Sunflower Music Production leh Minuamsa Video Studio" kigelh hi. Music ahihleh Falcon Band te' bawlvek ahi. Falcon Band te: Deihpi - Lead, Zekhe - Bass, Thawn Thang - Keyboard, Khuppi - Drums ahi.

Bangchi dan hiam in a CD ka kiang a hongtung kha a, huai ka etna apan mimal muhdan gelhdia hong kisa hi khanglaang veng aw. Hiai a laa kisa te a hongthang mahmah mai a, et theihna leh ngaih theihna nei kheempeuh a video keem khalou om din ka gingkei. Nidang pek apan Pauno ana ngaisang, a laa thu te lungkuai thei sa a ana paakta, leh tulai a khangthak Pauno theikha lou te lak a Pauno i chih kua, a tangchin bang hi hiam, eite adia bang a a honpiak, chih leh a laa te'n i laipau bangzah a khangsak hiam chih dotna i lak a a hong piankhiat theih, hiai thugelh in a tup ahi.

Classical nalh takmai in a hong kizuut a, huchiin "Ka neulai in khomui kuan in ka lawmte toh ka kimawl theizeel ua..." chiin mitsi diaidiai kawm in a honsa hi. I neulai pek apan i na theih mialmial, tu in a satu, Pauno ngei in a sak i honmuh hial leh bangchi hiam khat a ki om hiveh aw.

Geen dan di le ka theichiah tuankei. Huchiin, Leitheih Hilou, Meitei Guun A Kan Mateng, Na Voh Bang Na Aat Diing, Sen Lehkiik Theileng chih te a omna mun, stage tung apan a honsa ngiaungiau hi. Mipi te tokphuur hiam leh bangchi hiam in omkei mahleh, munkhat a ding maimai a, amah lungsung ngei apan hong pawtkhia laa a gelh, a kaih a bawl a sak te'n, tua Tahaan mipi te a lawn mai hilou in, khoveel mun tuamtuam a a video en kheempeuh te a khoihkha mahmah hi.

Delhi a sinlai khat toh ka genkhawmna uah, hichiin a chi: "Lengtong Pauno' laate athu ngaih ka sathei mahmah. A laa kisa ka zaakzual lel chiang in leeng, ka lungsim a khawlguih abang hial hi! Aziakbel, leitung a mohpuakna bangmah neilou a, 'Nuizeel in kapzeel a ka omlai, ka seenlai hun' apan laa ka theih masak lawi, ka khankhiakpih laate ahihziak in. A laathu ka ngaihtuah (man)louh nikhua inleng, diiphawm thei ngaihtuahna a hontun naak."

"Ka neulai in Pauno bang a laagelh siam hih a, mite' lungkhoih diing leh a kahpih theih diing uh laa gelhtheih bang ka na ut sek. Himahleh, ka ngaihtuah thakthak chiang in, amah bang a lungleng mi hileng, ka pozou din ka ki gingta kei. A laathu te hoih ka sak zahzah in amah ka ngaisaang a, amah ka ngaihsaang zahzah in amah bangbang a lungleng tak a om diing, pasal ka hi na a, ka ngamkei," chiin lawmdang khat mah in geen hi.

Mi lungleeng thei amah, Lengtong Pauno ziak ngei in i Zo thu-leh-laa leh ginglawm te nasatak a sukkhan leh suk hauhsak in a om hi. A laa te ahihleh laa kia ahikei a, thutuun thuuk taktak nei ngen ahi uh. Ama hinkhua a a thiltuah te apan a gelh ahi a, mihing leh mihing kikaal a kitanauna tuamtuam bang, mihing leh khotaang kaal leh Pathian toh kaal a kizopna te a geendeuh hi.

Gelhbeh didan tuan ka theikei. Lengtong Pauno' laa te thuukdaan theitel thei din ka theihsiamna in a baankei. Ngaih tuahtuah in, suutsuut in, gelh sawmsawm mahleng a laa thu te zaw ka theihsiamna khenlam pek ah a om uh. Huaiziak in, huailam hiaitan in ka khindia, abaan zaw, simtu, ngaitu leh entu te'n noumau ah ana ki sutzop mai un aw.

Hiai Lengtong Pauno laasak kum 25 chin lopna a video ahihleh a fuh thei mahmah. Fuh peen chih di himai. A thilsai daan uh a changkaang a, van te a hoihthei a, sound a fuh a, mipi a tam a, projector bang 2 tak kizang zomah. Maimai lou. Thupi lua.

Hiai video in Zomi laasiam thak tamtak khoveel theih di'n a hon phoukhia hi. Adiak in Kapno leh Sangpi bang - mimal tak in ka ngaisang a, lametna liantak ka nei hi. Kapno in "Khen Theihlou Maimit" a sa fuh mahmah. A zei mahmah a, mipi te tokphuur leh kisawidaan a siam peetmah hi. "Ka Paal Heuta" chih laa remix Kimpu leh Siantawng a sak uh ahihleh a changkaang mahmah. Zokam in Kimpu in mawitak in rap ziahziah a, Siantawng in a chaang leh thunon te sa hi. Analh diakna mun ahihleh "Et ka chim theihlouh, na maitai siusiau te, tu in ka mit ah maigum suak khinta" chihna mun a Siantawng' hih daan ahi. Nalh himai.

Falcon band te le a maimai kei uh. A kisak theihpih huai peetmah uhi. Kapno in asak "Na Lua E" bang chu a beat paidaan, rockkk himai. Lead guitarist Deihpi'n siamtak leh zeitak a kisawi kawm in a tum a, bassist Zekhe in leeng a bass taikual sak in a kisawi neknek a, Khuppi in lah a deeksam kaang leplep kawm in a drum a khen lalat a, Thawn Thang in keyboard melody nalh taktak hon luangkhe sak hialhial a. A instrument khoih uh a siamna baan uah, munkhat ah ding burr mailou in mipi mai ah perform daan a zei mahmah uhi. Huaina tak ahi hiai video a et a nopna. A etchim theih huailouhna.

Falcon band in Lengtong Pauno laa te, a music paipi peen, nidang apan ngaikhe tu te'n a cheptehna uh, a khengkei ua, a hidaan mah in a tum uhi. "Leitheih Hilou" kipatna a lead ging trangtrang peen bang. Leh "Meitui Guun " patna bang.

Paupu leh Cingpi'n "Na Min Loukha Zeel Ing" a sakdek ua a kimelh heeuhaau na uh leeng a ettaakna mahmah mun khat ahi. Piangno in "Chidam Peuhleh" a sak a, "Vaimiimchiim zong kham zoulou, gataam chiip bek mah petpet ing, aihhang phamoh kei chidam peuhleh" chi a a khuttum a liikna mun le a nalh dang khat hinawn. Sangpi' aw luandaan hiauhiau a ngaih a nuam mahmah mai. Adiak in hiaimun a sakna bang nalh ka sa: "Kamsiatna toh namdang pasal nei, zinei khaleng, Kawlgam Vaigam omkha leng, Pasian hongpiak tu-leh-ta, Zomi hihna theisak ning, Zolai Zopau sinsak ning, ahizong amasa pen Zomi mah deih ing."

Thawnkham ahihleh geentam a ngaikei. Zomi tuailai tamtak in amah be ut hial di'n ka ging hi. "Mualdawn Vangkhua" leh "Nang Na Zuanglou Maw" a sa hi. "Nang Na Zuanglou Maw" bang ka zaakkiik chiang in, nidang a adamlai a ka Pu Biaklal in, guitar tum kawm a asak hiauhiau lai khawng ka mitkha ah a hong kilang kiikzeel a.

Huaiziak in, Lengtong Pauno, aphu bangbang pahtawina i pia hi. Hiaibang a kum 25 chin lopna vaisai tu te a ngaihsaang huai lua uh. Zomi te laa leh tumging lam a meisel ana de tu, Kawlgam leh Vaigam a om Zomi te a laa te tungtawn a hon gawmkhawm, amah Lengtong Pauno, Sir Lengtong Pauno chih minletna piaktuak ahi.

M U S I C A L  P E R F O R M A N C E

1. Ka Nu Aw Nem - Lengtong Pauno
2. Leitheih Hilou - Lengtong Pauno
3. Meitei Guun - Lengtong Pauno
4. Na Voh Bang Na Aat Diing - Lengtong Pauno
5. Sen Lehkiik Theileng - Lengtong Pauno
6. Khen Theihlou Maimit - Kapno
7. Na Lua E - Kapno
8. Naubang Na Sang In - Kapno
9. Ka Paal Heuta - Kimpu & Siantawng
10. Na Min Loukha Zeel Ing - Paupu & Cingpi
11. Chidam Peuhleh - Piangno
12. Zomi Ka Hi Hi - Sangpi
13. Mualdawn Vangkhua - Thawnkham
14. Nang Na Zuanglou Maw - Thawnkham

MusikBuzz
Tulai in Zogam ah Lengtong Pauno' laate kithangthak mahmah. Tahaan a Nov 2006 a alaasak Silver Jub chin lopna hun a kisate. Falcon Band leh Kapno, Kimpu, Siantawng, Paupu, Cingpi, Piangno, Sangpi, Thawnkham te sak ahi.
*Here's 2 Sir Lengtong Pauno*
[June 7, 2008 ZogamThuthang]

Zodawn Tulliim

Zodawn nipilai iitna tangthu te aziak tampi'n a bei uh. Mahleh a tung diing teng a tunkhit chiang in, thil khat a kibang gige a om. Aksi kikhoh mah abang uh. Thangvan kimlai a vaak siilsial. Tomchik kilang zual in. A hong vaakpuap ua, a mangnawn ngaal uh.

A tuanna IndiGo in Phaipi khopi a honboh hi. Air hostess maitai siiusiau te toh mangpha kikhaak in, leenna kong ah a hongpawt khia a, a hongdaak khia. Delhi khopi lum hemhum banglou in suun nisa neemtak leh huihvot ana nung hiauhiau a, kithalawp tak in a kumkhia hi. Avan teng a khawm a, kintak in amah vaidawn a konglam a ana ngak, anu-le-pa kiang a hon manoh ta.

Anu'n a muhphet in, "Kim, na hongdam maw?" chiin ana liangkawi hi. Huchiin, anu-le-pa toh a car un Tulihal Airport a kipan a hong kitholh khia ua, Lamka lam a honzuan ta uhi. Tu in ahihleh a lung a muang lawta. Nu-le-pa te, innlum, mahni khua leh mahni mi-le-sa te omna mun ngei a nipi khawlhun zang di'n Kimbawi a hong kisa ta.

Kaal nih sung veel Lamka a a omnung in, a pute uh veh di'n Aizawl ah a innkuan un a hong zinkhia uhi. Aizawl ah kaal khat veel ava chaam nung un Guite Road tawn in Lamka lam a honzuan uhi.

Khopi ngen a khosa ahihziak in Kimbawi in singtang lam a mu ngeikei. Guite Road a a hongtai kawm un, lampi gei a mual te khawng etlawm a sa thei mahmah hi. "Novel a i sim, movie a i et te ataktak a eigam a ana omdan eivele maw" chiin a pa te kiang ah a geen hi. Suun ni sa singseng, meipi liim in mual a liah dindin te bang, leh luiluang te khawng a enchim thei mahmah kei.

Lampi khang a singtang lou a haichi pou siuhseuh te leh buuk bang, loulai a nnasem a om dialdial te bang a muh patna ngen ahi. Sava rong chi tuamtuam, singkahiang a boh te bang a digital camera in laaksawm sek mahleh a laakkhaak ma in a leeng manzeel uh. Akhenchiang in a gari uh khawlsak in lamgei khawng ah lim ava kila zeel hi. Kipaak a nui seuseu in, "Delhi ka tunchiah ka lawmte'n a en utthei mah di uh," achi hi. "Orkut, Facebook, Flicker khawng ah ka taakdia..."

Tuuktui luanlai hiven, lam kimchiang diing leng a taima un menchim nasatak in lampi ana khaak hi. Paisuak theihvual ahimai kei a, kiiknawn diing lah hitheilou, a hahsiang ua lampi a bawlhoih uh a ngaakmai uh angai ta. Bangtan ngak ngai diing ahia chih geen a haksa. Atom pen in kaal khat a kipan kha khat sung bang a luut diing. Huchiin, tua menchipna mun gei a khua ah a hong tawlnga ta uhi.

Kho hausa te inn khat ah, a gari heekpa utoh Kimbawi te innkuan a hong om uhi. Khopi a kipan a singtang a khualzin, kithalawp mahmah Kimbawi' kipahna teng a beita. Lampaina a a totkhak munte nopchi sa in etlawm sathei mahmah napi'n hiaimun a tawmchik sunglel om diing leeng a lin ngoihngoih hi.

Hiaimun ah meivaak a tungkei. TV omlou, music system omlou, Internet chihte om vetlou. Phone le zat theihlouh hilai. Gas a omkei a, heater a omkei a, ann huanna dia thuk a sing, khutak a chih nguingui ngai. Hiaiteng mai in leeng a lung a kesak khin dimdem hi. A tunni zaan bang un a ihmu thei sekei. Lamka a a innlum uh, thupi takmai bang a ngaihtuah a, Delhi a niang-leh-tai a a omdan khawng a ngaihtuah nilouh hi. Mall, showroom, theatre, McD chih te khawng a nuamsa tak a vaaklai hunte mitkha ah a honglang dundun a, ihmut sawm mahleh ihmutna in a siang a zuanthei mahmah kei.

Ziing beltak in alang-alang ah aak a hongkhuang pah cheelchuul ua, ni hongsuak a suun a hong hi a. Hihdi lah omlou, lawmdi lah omlou, chimtak in Kimbawi a om ngiungeu hi. Kisuk halh sawm in a hongpawt khia hi. A inn gei te' innkong ah tangval, ama' chia diing khat in tem in sing ana saat keuhkeuh hi. A thilhih ava en nilouh a.

Atawp in Kimbawi in, "Bang a na bawl?" chiin ava dong hi.

"Khuaibu di ahi," chiin adawng a, a saatzom zeel hi.

"Bangchi daan a?" chih dotna apan dotna dang ah kaltou zeel in singtang hindan chi tuamtuam, a theih ngeilouh tampi tua vaalnou in Kimbawi a hilh hi. Bangchi dan a hiaikhua hong paikha uhiam chih Kimbawi in agen a, huchiin a hong kitheituah ua, vaalnou in Muanthang ahihdan ahilh hi.

"Nang bangtan simta?" chiin Kimbawi in adong a.

"BA third year. CCPur Government College ah. Nang la?"

"Keile BA third year keive. Delhi University ah. Ekzam khin. Ahihleh nang bangchia kai?"

"Ekzam hunchiang a vapai zel, huchilou chu hiaimun ah sep theihtheih seem a kiloh."

Aziingchiang in Kimbawi in Muanthang' thilbawl ava en nawn a, a hong kihou theita mahmah uhi. A khankhiatna uh leh a ngaihtuahna uh kibanglou lua himahleh a hong kipawl thei mahmah ua, a theih ngeilouhte tuak uh kihilh tuah in nuam asa mahmah uhi.

Ziing phalvaak tuung in khomual lam zuan in, khogaal a nisuak khia, neem takmai te a en ua, huchiin, gophel kaapdaan kihilh in sava a bengkhawm uhi. Suun a honghi a, lou kuankhawm in loulai ah a vaak ua, tangmai, muvom, mazel leh haigah limchi taktak, athaklai ngei in Muanthang in Kimbawi a lohpih hi. Tua te buuktau a tukawm in a ne ua, a nih ua kithoh in a nuikhawm alh-alh uhi. Louvuum a mawngkung sangtak mai khawng ah a tuang ua, Muanthang in taamngai a muut vengveng a, tuahun chiang in muvanlai in a tung zawn uh ava veel diaidiai hi.

Gamlak ah vaak in thaang khawng a kam ua, theipi khawng a vilkhawm uhi. Luidung a vaak in, aisa bang a sawk ua, sanga khawng a man ua, tua luiluang sialsial gei a phazaang hing dimdim lak a tulliim nuai khawng ah khawl tawldam in maanlai tangthu leh khovel tangthu tuamtuam bang a kihilh uhi. Lui ah a hong kileuh ua, a kileuh khit un suangtung a lumkawm in ni neem hiihiai liim bang a awi uhi.

Huchiin, suunni hongtum a, khua a hongmial a, sawtlou nung in kha a hongsuak a. Guitar tumkawm in laa sa in nuam takmai in hun a honzang khawm uhi. Solkha taang siilsial nuai ah.

Huchih hunsung in a theihlouh kaal un Muanthang leh Kimbawi kingai a hong hi maimah ta uh.

Hiai khangnou nih te' iitna hong piankhiat dan leh a taangthu uh a hong kizial touhzeel diing daan, Zodawn nipi hun leh tuuktui luang te'n a theihpih kei uh. Hun paisa leh mabaan hundiing himhim ngaihtuah lou in iitna lampi, nuam leh maamtak mai hidia a gintaak uh, a hon zui panta uhi.

Agaal a kipan et in hiai iitna tangthu, a hithei ngeilou diing khat hileh kilawm maw. A tangval pa i chihchiang in singtang dawn a niamtak mai a khosa hi a. A nungak nu lah a khebul a khoveel koihthei hial khop a hausa hizeel.

Kimbawi ahihleh khoveel thak a hongteeng mah abang hi. Amah a din a thiltuah khempeuh te leh Muanthang toh a kholhkhawmna te uh, thilthak zilna leh kipahna bukim tuntu ngen ahi. A theihngeisa khopi itna leh tu a a theihthak Zodawn itna te a tehkaak chiang in kilamdanna lianpi a om hi. Khopi ging vungvung leh michih in amau thilhih chiat buaipih a kuamah kingaihsak man di leng a omlouhna mun apan suakta bang in a kingai hi. Khopi a hunteng, 24x7, a tongleng tawivial (mobile phone) hiam vannnuaizom (internet) hiam a kizop tuah gige sang in hiaimun, sing-le-lou, paak namtui, huihkhi siang laang hialhial leh tungleng vasa haam seseuh na mun a lungdeih ngaih toh hun zatkhawm in itna diktak mah dawnsuang zaw hi a thei tlat hi. Ahi, restaurant, bar chihkhawng a hun zatkhawm sang in Zo mualdung a vaakkhawm nuam a sa zawtham.

Khatvei, a nu'n Kimbawi ki'ah, "Kim ei, huai na lawm Muanthang khatvei honvaak pih ve. I mu ut thou voi," a chi hi. Suun khat Kimbawi in leeng Muanthang a omna uah a hon tonpih ngei hi. Kibawi nu-le-pa toh a li un singpi dawn in a hongtu khawm uhi.

"Na nu, na pa te kua te a? Nou unau bangzah?" chiin Kimbawi' nu'n a dong a.

Anu-apa min a geen a, "Ka pa'n gaalbuai lai in honna sihsan a, ka nu toh hiai ah ka khosa ua, ka naunu, Lamka lam ah mi' inn ah ompih in a kiloh," a chi hi.

"Ahihleh nou na nu toh bangchi'a kivaak?"

"Buh tiin 1 mun di khawng lou ka bawl ua, huchilou, ken mi' lou khawng a kuan in leh a lemtheih nana ah ka kiloh zeel."

Hiai kihouna te'n amau gel iitna taangthu kigelhna laidal, ziikkeek hithet di'n Muanthang in ana ngaihtuah pha kei. Huai nung teng Kimbawi toh a kimu kha theinawn kei ua, a omna ua ava kanchiang in leeng anu te'n "omlou", "pawt", "manlou" chi hiam in ana heemkhe zeel uhi.

A kimuhnung uh kaal khat achin in, lampi a siangta a, huchiin, Kimbawi te innkuan in khua nusia in Lamka lam a zuanta uhi. Mangpha kikhaakna bangmah a omkei. A khomual uapan Muanthang in tua gari tai a en liam a. Tua gari in Kimbawi te innkuan kia a pailiam pih kei. Kimbawi kia leeng a pailiam pih kei. A itna, a lungtang leh a hinna ngei ahih a pailiam pih.

A itpen ' aang Kimbawi in a va beel ut ngeimai. Khatvei lai. Khatvei lel. Leh a tawpna di'n. Mahleh a hithei nawnkei. Veen in a om. Khaam bikbek in a om. A liammang matan uh a mittui vuung thriuthriau kawm apan a ittpen a gaal et a.

Huchiin a mangta.

Sabang a tatna sa munte uh Muanthang in ava vehkiik zeel a. Ama a di'n a lungzuan phawngtu lel ahita uh.

Huchihlai in, Kimbawi leeng hinkho thak zang diing chi in Delhi tual a tungnawn ta hi. Mahleh a ngaihtuahna mit ah tua mundai, thoveng, galmuang leh etlawm tak mai, mual hing dimdim te, luiluang sialsial te, paak namtui hiuhiau te a hong kilang kiikzeel a; huchihlai mah in zuunlouh vangsel Zolei gam, lampi setak mai, khoveel changkanna himhim omlouhna mun leh mizawng tak te teenna mun te ngaihsutna in amah a buakkiik khazeel hi.

Hunte luitui bang in luang liamzeel mahleh a ngaihtuahna ah a mangthei mahmah kei. Muanthang. Leh suunchim lungzuan a sialkhawmna mun uh, zaan chiang zaideih a awihkhawmna mun uh, Zodawn tulliim.

© vaphualization Hiai tangthu phuahtawm ahi. Min, hihna, mun leh thiltung a kilou kha teng laigelhtu' suangtuahna apan piangkha hiam ahihkeh phuahkhiat maimai ahi a, mi kuahiam khat, mun leh thiltung toh a kibatkhakna ana om zenzen leh coincidence maimai hi di eikha aw.