Zogam Etlawm

Tuivai



Zokuam damdiai



Songtal Vuum



Mual Kitawi

[© Hiai limlaak te K Thangpi, New Delhi apan ahi. Mundang koimah a thaangzat phallouh]

ZogamThuthang in kum khat meel muta

January 20, 2008 in ZogamThuthang in kum khat meel muta. Zomite' Pathian' min i phat ahi. ZTT vaisai te'n simtu te kiang ah kipahthu nasatak in hong kigen. Noute' kithuahpihna ziak a hiaitan tungthei ihi.

ZTT vaisaite:
Editor - Haumuanlun Samte | New Delhi
Publisher - Vanglian Tawmbing | Bangalore
Publisher - Lun Thawmte | New Delhi

Thu hon petute:
KK Valte | Lamka
Thangpu Samte | Lamka
Suanmoi Guite | Lamka
...leh simtu, nang na hi!

Hiaithu gelh ahihtan in member 11906 pha, posts 1703 kibawlta.

ZogamThuthang hong kipat dan

Mimal tak in k'on gelhmai diing. Kisialhna hiam, banghiam hilou in. Tulou, hichibang hun gelhna di chance bang om kha nawnlou maithei ahihna ah.

2008 kumbul ahi a, Behiang lam a Ngasuan Lui a gari eksiden laiveel ahi. Unau Hmar leh Zou pau in SMS news a om a, hiai tuahsiatna leh thu tuamtuam, a phone uah, a hunhun in a tung geihgeih a, a kizen mahmah hi. Huailai in, Munirka, New Delhi a Esther Communication neitu, Nu Muanching in, suun khat a honna sam a, a phone a SMS news a hon simsak a, "Nou le hichidan hon pankhe ve ua," a honchi hi. SMS news om ahihlam zakha mahleng ka muh patna ahi. Huaini ahihleh January 19, 2008, Kiginni (khawlni) ahi.

A lampi di ka hon ngaihtuah ta a. Huchiin, U Lal (Thangkhanlal) ka phone a, "Hichidan pattuak na sa hia?" chiin ka dong hi. Aman leng hoih a sakdan hongen a, himahleh, nna haksa pi leh buaihuai mahmah diing ahihdan a thei a, a hon kum lokei. "Website tuamtuam khawng ah news update i hau lona ve ua le maw," a hon chi hi.

Hiai SMS news kipan leh, hunteng a news update ngai dia, mobile apat sum seen gige ngai di, ahihkeh internet toh omkhawm gige ngai didan ahi. Inn a lah internet kineilou, sepna mun ah khoih zualzual thei maimai a kihi a, ka buai mahmah hi. SSPPNet ah ka va gelh himhim di, ka chi a, hiai ka hongelh hi.

Free Group SMS: I Soft Power khansakna di'n
Ka na hungaih zeel a, hilele hiaithu tuni tan in kuaman i geenkha naikei a. K'on luikhe mai di.

Eimi te'n Free Group SMS khat patdaan lampi ngaihtuah le eivele? India gamsung pumpi a di'n. Innlam news te Zogam.net, Zogam.com, ZogamOnline.com leh i SSPPNet ah i mu thei gige a, hilele, mi teng in internet i access kei. Huchibang in, tualsung news te leng michih in ki muvek theilou.

A olsam pen, a za huappen, a baihsam pen, leh a taanzau peen ahihleh SMS ahimai. Huaiziak in kithuzaak tuahna di, tanchin thak kihilhna di, khotang vai, gamsung vai, sahkhua leh adg adg te a i ki kaihmat seemna di'n SMS group pankhe ni. A group min di'n bang i chi hiam ah.

Thuchian kimzaw http://www.smsgupshup.com ah a ettheih diing.

Ngaihtuah tuak i sa uhia? A mandeuh, internet connect khat khawng in pantheile a uthuai. Huaichiah, khopi tuamtuam apan leeng msg hon post theizeel di om henla, adiak in Lamka apan bang.

- Haumuanlun Samte | January 19, 2008 | SSPPNet

Hiai mail khenkhat in a hon reply pah ua. Huaini, a nitaaklam in SSPPNet moderator leh Siamsin Bulletin a ka sep pih, Lun Thawmte in a hon houpih a, hiai SMS news hoih a sakthu a hongeen hi. Aman inn a internet nei hiveen, huchiin khat a hon hong a, a min di'n ZogamTangkou ka chi uhi. 'Zogam' chih min kingaina, baan ah, 'Tangkou' kichi thumal hoih mahmah ahihna ah. Lawmte khenkhat kiang ah SMS ka khaak khe pah zungzung uhi.

A ziingchiang, January 20, 2008 in Vanglian Tawmbing in Bangalore apan SSPPNet ah hiai a hon khahkhia hi.

Lawmte,

Unaupa Lunte leh SSPPnet Member khen khat te hon suggest dung zui in, SMS new update leh thil tuam tuam kithuzaak na dia vanzat hoihtak ahih theih nang in ThuThang Patkhiak ahi ta.

Let us join our hands and take the Zomis to a better place.

Awlmohna lianpi toh,
Vanglian Tombing
Admin_ThuThang

Unp Vanglian toh ka kithuzaak ua, i pat vanglak ualeh nih hihlou in khat in kigawm in, pangkhawm ni uh, ka chi ua, huchiin, ZogamTangkou leh ThuThang gawmkhawm in, ZogamThuthang ka hon chi ua.

Huan, ngai in, ZogamThuthang tuh January 20, 2008 in a bawlkhiat a hong hita.

Huchiin, hihtheih dandan in, ka hon hihtou noknok ua, gintak sang in, mipi te'n ana paakta uh ahi diing a, simtu bang, ani-ani in 100-100 in apungtou okh-okh mai hi. A sai a buaihuai a, mi tamtak leng a kisubuai in a ki su thangpai kha dia, tamtak mahlah a kisu kipaak ngei diing. Ei leh ei kaal ah.

Athu mai hilou in, simtu kiphaltaktak te apan panpihna tam loulou bang a kisaang a, amau te min, i hihtheih daandaan in i lou diing:
1. Gouzamang Guite, New Lamka
2. L Ruata, Lamka
3. Student Book Store, New Lamka
4. BYond Coaching Center, Lamka
5. Mang Tawmbing, Mualkawi
6. Munga Samte, Tedim Road
7. Dr Zamthianlal, Z Lamka
8. Muandoulian, Editor, Tongluang
9. Mawia Guite, Lamka
10. Bethany Christian College
11. Ngulkhanthang, Lamka
12. Sauliim Book Barn & Restaurant
13. Minthang, Lamka
14. Mang Guite | Thawnsau
15. Chinsuanlal, New Lamka
16. M Jamchingthang | Imp G Village i
17. Joy Thanglian, New Delhi
18. Kamzalian, New Delhi
19. Khatchin Langel, New Delhi
20. Thangzamuan, New Delhi

21. VL Ruala Tangpua, New Lamka

22. Dr Tualchin Neihsial, Hmuia Ven, Lamka

23. Siamnunlian Valte, Lamka

24. Lianmuansang, Ahmedabad

25. Liankhanlam Hanghal
26. LT Ngaihte

Maihkhaak a om zenzen leh ngaihsiam aw.

2008-09 Krismas leh Kumthak zangdia innlam a a kipai lai in, Munirka, New Delhi a om Tv Lamboi Hanghal (aka dammaw in Zogam.com) leh Lalsuankham Naulak (aka kuaude in Zogam.com) te'n phattuam ngaitak in ZTT honna etkol sak uhi.

Tualou in, chiamteh tham ching ZTT'n a tuahte ahihleh: Khatna ah, Zolengthe (SMS news in Zou) kumkhat a chin lopna hun ah, ZTT editor ngainatak a chial in om. Nihna ah, YPA Delhi in ZTT pahtaakhuai asak thu puang. Leh, thumna ah, Zogam.com in ZWA 2008 hun ah Zogam.com media partner ZTT kipahpihna leh theihpihna certificate leh trophy etllawm tak hon pia.

Hiaiteng ahihleh a nuamlam ahi a, a haksatna lam zaw i geen se kei di. Mai in.

Atawpna din, ZTT' lawmhoih Zolengthe, LenlaiNews, LamkaTimes leh GanggamTimes te hiai hun in i pulaak ahi.

Pangkhawm tou zeel ni. I nam di'n.

T H U T H A K N A N G A P A N . T H U T H A N G N A N G D I N .

T H E I H T U A K
~ZTT deih te'n JOIN ZOGAMTHUTHANG chia gelh a 567673434 ah SMS khaak di
~ZTT deih nawnlou te'n LEAVE ZOGAMTHUTHANG chia gelh a 567673434 ah SMS khaak di
~ZTT lakhin hingal, lah message bangmah mu nawnlou te'n LEAVE a, JOIN thak di ahi.
~Thuchian zogamthuthang@gmail.comThis e-mail address is being protected from spam bots, you need JavaScript enabled to view it ah aw

RELATED POSTS

Mobile tungtawn in ZogamThuthang SMS news update patkhiak hita
ZogamThuthang: I Soft Power khansakna di'n

ZogamThuthang in PDS anntang dikloutak a zuakna pholhkhia

ZTT QUOTATIONS

Never doubt that a small group of thoughtful, committed citizens can change the world. Indeed, it is the only thing that ever has.
~Margaret Mead

Let us take posession of the New Year and turn Vangsel Zolei into a land which the Lord our God cares, from the beginning to the end of the year
~Khatchin Langel

Regardless of the fact that, we, the VAGABONDS were members from the Sim, Gangte, Vaiphei, Thadou, Zou, Hmar community. We talked Paite. We were one.
~Lealyan Thomte

Vaphual khovel a Zomite' tenna baan vehkualtu, thu puaktu di a omlouh hangh 'ZTT is a new avatar of the extinct Vaphual with added features.

~Lianpu Tonsing'

Zogam Himai

December 17, 2008 zinglam dak 10.20 vel ahi. Neemtak mai in, "Damtak in aw..." chiin a phone a koih a. Huchiin, ka tuanna di leenna ah ka kaltou ta. Bangtan hiam ka hongleen nung un, veilam gal ah, a etlawm Himalaya tangte a kimuthei a, khut a gelhthoh hileh kilawm in ngou phihphiah in a ding veelvual uhi. Bengal phaijang hing dipdip te peel a, Malsuahbial mual-le-guam leh luitui te' tung a ka leenlai un ka ngaihtuahna in, 'Hiaite sang a ka Zogam etlawm zaw di hi a maw,' a chi hi. Ka munuam saam ngei, Zogam etlawm. Hausapi Vum leh Lentang. Tuivai dung. Kaihlam Tang. Lungthul Kawl. Leh Lunglen Khaam khawng.

Khopi etlawm vaklou hi a ka theih, Guwahati sang in leng Imphal khopi ana deree zotham a, leivui bang a khu petmah hi. Ka tuanpih tamtakte, adiak in Talpakte a din, hiaimun a inn uh himahleh kei' innlum bel a gamla lai mahmah. Direct Bus a ka tuanpih te ka pau mah in ka hon houpih theita a, hiai in naaktak in lungmuanna a honpia hi.

Ka hongtai touhlai un, ka gamlei tunkaal ka ngaklah mahmah mai a, himahleh koimun tak a kipan 'ka gam ka chihna mun' tungta ka hia, chih ka thei zoukei. Tuibuang forest gate, Lamka police station, huchiin New Bazaar ka hongtung a, 'ka gam koimun hidiing hiam' chihte zong a ka ngaihtuahna abuai sung in veeng sung ka hongtung ta hi. Khomui zuul a phalbi huihvot nung herher, kongzing lampi sia, phon leh kuak tektokte' gei a mei kichih kuang liahliah, a khu zaam liiliai, mei ana mit geet, leh innsung a meiphu duur deuhmai te'n honna vaidawn ua, huchiin ataktak in 'Innlum a Krismas zang di'n ka hongtung ta' ka chithei ta.


Ka omsung in Lamka ah gentham ching, muhtheih dia kikhenna thupilua mukei mahleng, NREGS tungtawn a kibawl lamneu hoih zawdeuhta te leh miteng phial in gari neu (huaile Activa hilai) nei hileh kilawm, chihte khawng ka muhdan maimai ahi. Kei ma a tamtak in 'building inn kilam ferfur, thupi thei peuhmah' achihte uh le ka mu. Ahi a, mobile phone houchik tawi ka mu vaang mahmah thepthup. Unau Thadou leh Mizo te' laa ka mu mun in ka za mun mahmah nawn. Adangte' aa te le honkhah beek ve ua, ka chih hun a tam.

Zi leh pasal neih hun ahihtoh kiton in kitenna, kikhakna leh moulopna dim in adim mai hi. Sa free tam, chitel le. Nikhat a le mun thum kawm theih, chi uh. I khopi a niangnaar deuhmai a lop zuazua, buh leh sa neek thaang zeelzuul a kithan mahmah lai in, imi-isa te Zodawn ah gilkial-dangtak a thuum hunkhop om diing hi ua maw.

Bangdang teng sang a thil thupi pen ka va muh ahihleh December 30, 2008 a Zogam.com Writers' Award (ZWA 2008) ahi. Zogam.com in hiai award a dia a teelkhiat nominee tamzaw tham te telkei in mipi tamlaw veekvuuk hetkei mahleh, a lohching in a guh mahmah hi. Mimal tak a laigelhmi ka ngaihsang, a thugelh te uh peellou a ka sim gige, Pu Eugene H. Chinzahao, Kimbawi' Pa, Pauzagin Tonsing te toh kimuthei in ka om a, VL Mangzou toh bang kithuah in, ka nuikhawm khuakhua ua, hamphat huai ka sa mahmah hi.

VL Mangzou' Hinkhua Nuamsaktu series dandeuh khat ken le k'on gelhtei. ZWA 2008 adia ki a kibuaisak heehuu, ama nitak a ka Pu Ruala Tangpua te'n a ziing a a inn ua ann ne dia honchial uh hiveh aw. Huaizan sawtsim tak leh a ziingkal buaisuak hithet. Inn a le ann ne manlou phial, baak somsom in, Zogam.com admins Ginza leh Muanding toh Htp Pauzagin toh DC pa mudia va kuan. Daak 9.30 khawng hita. Ka Pu Rual in hon phone. "Man nailou maw? Ann nedia honna ngak keive ua," honchih leh ana mangngilh hithet ka hihlam theikhia! Kisuanlah huai rura! Huaikha, a theidia ka deihlouh teng in thei chiitchiat zomah lai. KK Valte. Leh adiak a U Dong (VL Mangzou) in.

Tu'n Singngat mah k'on gelh nawn di.

Lamka-Singngat lampi ana hoihta mahmah mai. Nidang a bus driver te'n 'breakdance-na lampi' a chihsek uh, kisawi zawihzawih theihna munte, muh di a om nawn kei. Atawm mahmah ta, ka chihna. Sawtlou chik sung a kitung zar maidan ahi. Lampi bawlte leh thuneite i phat mahmah ahi.

Mei bang leng ana hoih mahmah a. 24x7 loudeuh chouh. Battery nekiam hulhul, ka Motorola phone in a ngeih luahluah ngot di chu, ka chih leh network omta mawngmawng lou. Lampi bawlte'n BSNL phone line a tohtanna uh akum a sim ahita. Lampi hoih i deih leh phone ngawl ngai hileh kilawm maw. Network a matna, mun sang deuh naih a ngai a, abuai huai mahmah. Ka zon siamlouh deuh ziak ahidiam, Krismas ni ziing in kilometer 1 mawngmawng, Munlui lam a ka va pai lehleng ka mu zoukei. Krismas wish tamtak ka chaan!

Phuur tak a kipai a, bangchidan ahidiam, Krismas ging le om mahmah lou. Kuaman Krismas hun a hihlam le phawklou bang. Dau a dau. Om diakduak. I va lengkhawm a lahchu, tuailai leh piching lam muh di tawm peetmah. Naupang khawmpi bangmai. Saklam veng te sang in khanglam veng te'n Krismas hun a phawkzaw ua, nuamtak in a zang zaw uhi.

Tui ahihleh a hak ngei in ana haklai hi. Phalbi ziing khovot tak nuai ah, inn a mei lumtak awi diing taisan in, numei naupang neu chikchik te'n, beel gik tak po koihkoih in, gamlapi a om luita te a zuan uhi. Singngat a 10 Assam Rifles om te'n amau' aa diing leinuai apan electric haatna zang in tui a hiiptou ua, nuamtak in a zang hiahhiah uhi. Khosung leh kiim a luita teng a hiip kang ua, selfish uh ka sa mahmah. Gari in a kivei huthut gige ua, a taina uh lampi leivu sah mahmah te' khu in, lamgei a innte buak in abuak khum lenglung gige hi.

Hiai akum a sim tui haksa dawn zaangkhai theihna diing lampi, project thupi takmai, heutu lian lamte'n hon ngaihtuah thei le uh a uthuai mahmah hi. Tuitha hiam Tuivai hiam apan tui zawl theihna dan lampi, phualpi solkal kiang a, pi deuhmai a, phuut theih di hiveh aw maw.

Ka khua nuam ka sak mahmah na ahihleh zanchiang a, thawmdai zikzik nuai a, meiphu lumtak awi riahriah a tuilum dawn kitkit mahmah eive. Suun khat, huai phuahtawm taangthu 'Seenchil Vangngaih' ka piankhiatsakna mun, Sande skul ka va pha a, neulai hunnuam te nasatak in ka va phawksuah rumrum. Ka na tomsek uh, segah kung ana kiphuukta a, amun mahmah leng ana tuam mahmah ta. Himahleh, a kiimvel a taangsaam paak siilsial te leh huih in a muutliing dialdial, louhing te'n ka ngaihtuahna a hon suhing thak nawn tuaituai uhi.

Deih khoplou takmai in, January 5, 2009 in pianna gamlei nungngat san in, lungsim gik keihkoih toh, ka hongleeng khia uhi. Delhi ka zaan tun ua, tunglam apan mialnuai ah, khopi a paak ziizia mai. Meiphu i sin chiang a a-aam kithehkhia, leitual a vaak phingpheng mah a bang hi. Leenna phual apan ka pawtkhia ua, muhtheih in kikhenna thupitak, tomchik sung himahleh, ana om man tel hi.

Kei mah leng ka na kikheng abang. Hon mu masa-sa in a honchi uh.

"N'ong vom sot."