A hunlai in...

Itna thu k'on gelh mawk deh. A simtaak hiam ah. Eh, itna va chihmawk di le hi kholkei. Itna in a geen tamlua. "Ngaihzawng" khawng chi leng a dikzaw deuh diam maw. Abang-abang hileh, ka geensawm pentak chuh, numei-pasal kaal a kingaihna, chihdaan deuh ahi.

Ehem! Tleirawl tuung a kipan ngaihzawng i na nei a, a na deih vetlou te lah mi chituam himhim ka chi mai a. huaikha i itpen, i na deihpen te toh kiteen sese di chihna omlou, chih daandeuh khawng a kigeen ka na za mun mahmah a. Hon deihsaktu te'n lah "laisim lai a ngaihzawng neih hoihlou" chi lampang ngen in hon thuhilh sek ua. Kei kia hilou, mi tengteng le. Ahia, mihing lungsim a om pen va daal theihmawk hilou hi. Omdaan bel, laisim phot diing, sepna neih zohchiah numei bang a tam vele, theh a hong kitheh luut thoh di ahi uh, chih kha i nu-le-pa te uh ngaihdaan ahi. Mi tengteng' nu-le-pa te'n ka chihna ahi.

Dotna piangthei khat: ahihleh sepna neikei ta le la?

I khotang uah neizou leh zoulou kaal a kikhoukhiakna uangsim ta a bang hi. Anei leh anei kiteeng, apil leh apil kigawm, chihkha muh di hongtam mahmah ta. Tamtou zeel lai di. A ning kil a te kha ki heem khiakhia daan hidi hiveh aw.

Tu'n ah pasal khat leh numei khat kingai ta. Ki iit peetmah uh chihlai ni. Hun hongpai zeel, a pasal peen in sepna guitung tak bang hon mu zoulou. A huchih chiah a numei nu lah akum hongching ta ahihchiang in a sungte'n a pasal di hon zonsak ta uh. Huai a bangchi? Pasal officer khat toh hong kiteeng daih ta uh. Khat pa a di'n thuakhak sim maithei. Chi niilnial thahah le.
Huaiziak in, pasal bangmah hilou te a dia kha khosuahna di om mahmah lou, bangsim maimah ta hi.

Huaiziak in, tu i tleirawl lai, i tuailai lai, i graduate khiat taktak ma khawng in hoihdeuh in iitna lampi a na sialkhawl le bang a chidia, chihpeuh ka lungsim ah a hongom zenzen ka chi. Denchiang in i kum a hong upa dia, i lungsim a hong piching deuhdeuh dia, thil teng i hon theihkim chiang in a hong buaihuai thei dia. Geentaak louh, i hong graduate dia, sepna bang muthei chiah khollou, ngaihzawng lah nei ngam chiah lou, nei lele kiteenpih ngam chiahlou... Ngamlouhna ngen a kidim ta di inchin.

Huchi ahihziak in, i lungsim a hongpil kiaukuai ma in, thil i hih didi ana hihkhawl le a hoih diam? Damsung lamsuk-lamtou i paina a hon sulim gige diing deih chibang i teelna lam ah, chidaan kaihchu.