Ngaihtuahna a hongluut khenkhat k'on gelhdia. Kei' gelh di banglou tak in tutung in hiai ah, lei mihingte, Pathian in honiit daan leh deihthoh daan k'on gelh himhim. Kei ana muhdaan maimai ahi.
Laisiangthou i etleh John 3:16 ah Pathian in khoveel a iit mahmah ziak in a tapa tang neihsun ei te a di'n a honpia, chih i mu hi. Genesis bung 1 na i simleh Pathian in lei leh a sung a thilsiam te a bawldaan i mu a, huai te a bawlkhit a a et chiang in etlawm a sathei mahmah hi. Huai thilsiam teng lak a a mit sutai peen leh a kipahna peen ahihleh lei mihing, eite ahi. Eite bel amah kibatpih a honsiam ihi hi.
Huchi ahi a, Pa' deihlam a i omchiang in amah Van tung ah bangzah ta a kipaak in ana nui dia, chih a ngaihtuah theihmai hi. Huchi lou a, a deihdaan lou lam a i omchiang in bangzah ta in a lungsim ana dia le?
Ngaihsut tuak tak ahi.
Ei' hinkhua mah ah leeng enle hang. Mihing te hi a taangpi in phat ngaina lou i omkei uhi. Mikhat i deihdaan leh i lungluut daan a a hong om chiang in tua mi pen i ngaina a, i kipahpih hi. Baan ah, ei hon ngaina mahmah mi i haw ngeikei. Hon ngaina lou hiam, honna heek hiam ahihkeh hon geense te ahihleh i mihing lungsim toh i ngaina lawmlawm kei zeel hi.
Mi te'n i hihna hon kipahpih a, i thilhihna te bang hon phatsak chiang un i lungsung ah kipahna geenvuallouh hong luangluut thei hi. Blog ahihziak in k'ong ki mimal geen sim dia. Laigelh ka na lungluut a, i laigelh te bang mi'n hon simsak chiang un nuam mahmah hi. Huaimai hilou a, "a hoihlua" chi lampang a honkup chiang bang un tha ki eeng ngah mahmah mawk hi.
Tongluang, Lamka Post, Zopatong, The Sangai Express, Imphal Free Press, YouTheJournalist.com, SSPPNet, Zogam.com, ZogamOnline.com, Zoram.com, ka blog - vaphualization.blogspot.com leh Siamsin Bulletin te ah thu ka na gelhthei zeel hi. Tua te feedback hoih pipi i zaak chiang in mabaan a i kalsuan nawnna di tha honpe mahmah hi. Huchilou a, simtaak kei, hiam hong kichihsak chiah i lungsim koilai hiamkhat honsun kha bang hi. Ahihkeileh, geentehna in, thapai zeen a i bawl, Siamsin Bulletin bang, mi'n simngel khollou a kholak a a paihthaang uhiam, van tuunna hiam, ahihkeh tutna dia thothaap peuh a honzat sakmai chiang ua nuam hetlou bang omzeel.
Laigelh lam kia hilou thildang himhim ah leeng. I khutsuak khatpeuh bang a khonung chiang a ki enchim thei mahmah lou. Mite'n honna theihpih vakkei mahle uleng eikia khawng in i ngaihtuahna ah ki nui hiuhiau theimawk hi.
Huchi ahi a, lei mihing te bangleeng Pathian in van a kipan a zahngaihna maimit a honna suanden diing hi a... A deihlouh lam a i gamtat chiang in bangzah ta in a lungsim ana dia? Amah taisan a khoveel nopna a i bualliam maimah chiang in a khitui taak bangzah ana taakkhe dia? A deihdaan lam a i om a, amah i pahtawi chiang in bel kipaak mahmah diing hi. A biakinn huangsung a luut a amah phatna laa te khawng bang i sakchiang in ana nui hiuhiau mai diam?
No comments:
Post a Comment