Xui lalat!

Tulai Vai laa khat nalh sa-a-sa mawk hiveng aw. RACE OST Atif Aslam in a sak, Pehli Nazar Mein ahi. A kaih chituam, a music changkang, asa pa' aw hoih. Nalh ka saklam thei in ka lawm Vaite khat in, a hon bluetooth hi. Huchia a laa ka neihnung zek in, ka lawmte khat in a hon fawn a, " Huai Vai laa nalh i sak pen maw, Korean laa eive. A kaih a laaksawn uh. Serial khat a om. Ka fawn apat direct a ka na record na ngaih utleh," a honchi hi. Ka ngai ngei a, huai Korean laa toh Vai laa pen a music paidan, accoustic gindan, a kaih leh bangkim ana kibang vek mawk!

Ka fawn apat Vai laa chu ka delete rang khermai. Vai te'n le Korea te' aa laaksawnna chaang ana thei eive uale maw. Huchia lasawn ua, a film ua laa dia zang ua, gamsung pumpi a min a minthan pih zomah uh.

Huchibang in i ngaihsang mahmah unau Mizo te'n le tumlam gamte' aa a lasawn sek uh. Eilawi la? Kua te' aa ale i laaksawn? Sonu Nigam? Vanlalsailova? Hehe. Nuihzat huai. Mizo te' khawng eng a eng ngaihsang, a hih dandan uh enton. Vai laa khawng lasawn nguingui, sa nguatnguat. Mi i etton lele a sangdeuh te mah etton di eive.

Huchidan a chu, keile Mizo laa ngaina lou ka hihlouh pi. Ngaisang peetmah ka hi. Adiak a Michael M. Sailo bang, saap rapper te toh a kikim a koihhial dan ka hi. Miss Zomi 2008 zan a asak, leenkhop laa a remix dan mahmah bang, thupi salua ka hi -- khanglui vai leh khangthak vai a zopdan kha. Mahleh Gloria Chiinlianniang in ataktak a, "Unau khat hihang" chih a sak toh, tehvual ka sakei hithet zeel. Eimi leh eilaa kaan zaw omkei maw. Midang te i ngaihsaanna in ei a te a nenniam tuanlouh diing ahi.

SIMAS 2008 video bang i etleh thupi lawtel. SSPP Standing Committee Chairman pu in Lianlunching laa saklai a khutkawi ana muut; Zogam writer khat in khawllou a akhut ana zaaksuak den; S Chingnu laa saklai a Delhi YPA Prez leh Secy., Zomi laigelh siam minthang mahmah leh khangthak te'n kipahpihna paak pia a va bawm luailuai; V Siampu' laa sak in zoulaw mahmah a mikhat, ama ah khupboh a vakap top. Hiai in bangzah ta a i laa te thupi a mipi te'n kipahpih hiam chih a muhtheih hi.

Zomi Nam Ni lopna khawng ah midang te i chial deuhveel ua, bangpi ahituan sam ua le. Thil i hih masak diing om hi'n ka thei. I chialte khawng in ahihleh platform a neilian lawtel ta ua, ei a te domsang photni. Mi thupi Haumang leh SN Thanga te bang dainawl a khiinkhiat mai din a pammaih lawtel uh. Damhoihching, Chingthianngai, TG Lian, Nengzachin leh adg. dg. te bang khatvei dingsak thaklai ni.

Duhthusaam gencheuh le. Music system fuh deuhmai in hon tuamveel henla, huai ah, eimi laa, a kaih changkang deuh, a thu gil deuh, a music nalh deuhmai khat, repeat mode in kikoih henla, 20 vei khawng i ngaihsuak nung a le i zaakchim theihlouh di bang omleh -- a uthuai ngeimai. Chikchiang in a hong om dia?

Khangthak Benjamin, Mimin, Pauginmuan, Chingmuankim, Vungthiankim, Lalboi, Muanlal, Rabbi, The Banguri, Rig Vedaz, na za uhia?

En le i mel kibatpih, a movie uh i haichilh Korean lamte laa paidan khawng XUI LALAT le eivele.