Delimitation leh Zomite

[Delhi Zomi Nam Ni Discussion Report]

Delimitation huihkhi in Zomi te nasatak in a honzeel suak. A kikheel nung in. I theih toh kiton in a tung diing teng ana tung khinta. Delimitation Commision in hun sawttak mai, nouneel tak a asui khit un, Working Paper hon suahkhia uhi. Huai ah, phaizang bial apan constituency thum kiam diing a, singtang ah constituency thum punbeh diing, chih ahi. 2001 census ah singtang bial khenkhat ah population nasatak in khang a, hiai pansan in phaizang mi te’n Delimitation exercise dou daal uhi.

“All political parties of Manipur” in 2001 census a dikkei, census bawlthak nawnma Delimitation a pai theikei diing, chiin Guwahati High Cout ah heek uhi. Huchiin, Supreme Court leh Center level tanpha hontun ua, atawp in January 14, 2008 in Presidential Ordinance hongsuak hi. Tua in Manipur, Assam, Nagaland, Arunachal Pradesh leh Jarkhand te ah 2026 tan constituency lepthak ahi kei diing, chi hi.

Delimitation Commission in tua Working Paper a bawlna uah, i gam, i Vangsel Zolei, nasatak in a hon sukha hi. Lamka khopi i chih, Churachandpur North, East leh West a phelkhap in om a, Thanlon vuiliam in a om. Atom a geen in, Zomi te kigawmkhawmna khuampi, khetsiat a om diing chihna ahimai. Tu in hiai Delimitation pen Meitei te’ doudalna ziak lel in a paisuak theikei. A vangphat huai. A vangsiat huai. Ahihleh, muangtak a ihmut suk nawnmai diing ahi diam leh? Zomi Students Federation Delhi Cell in hiaithu a kikupkhawmna nasatak in February 23, 2008 in JNU a Zomi Nam Ni uapna hun ah sai hi. Heutupa Thangkhanlal Ngaihte leh H Khamkhansuan te’n hiaihun honpi uhi. “Eimi te’n mi a kinungdelh gige,” Thangkhanlal Ngaihte in chi. “Mite’ thilsawmsa ei’ deihdan toh kituaklou a i paukhiat chiang in ei a gilou kisuak.”

Heutupa Thangzalun Khuptong in classified information mipi paikhawmte mai ah simna nei hi. A thutuun bel tam i gelhkei diing. Phaizang mite’n hiai delimitation a doudaalna ziak uh leh phualpi solkaal lam apan thusuak te ahitaangpi hi. “Delimitation chu, tu dinmun a kichaivawt hita mai,” chiin khin hi. Heutupa Khamkhansuan in, “Ei Zomi te’n hiai delimitation apan i ki-etthak diing uh thil tampi om ahi. Policy bangmah a kinei kei a, thil himhim i phuutchiang in meikang-phelhmit-policy i zang uh,” chi hi. “Issue khatpeuh a om chiang in, information interlinkage a kithuzaaktuah a om ngeikei. A theite’n amau a kitheih ua, midang te’ theihdia puangzaak lou in, a koihdap mai zeel uh,” chiin geen. “I nam sukha thei thil a om peuhmah chiang in athei te’n mi te hilhsawn in, i website te leh lam chi tuamtuam tungtawn in kithuzaak tuahni,” chi hi.

Heutupa Thangkhanlal in networking lam i chauhdan uh naaktak in geen a, plan hoihtak ineih uh poimoh ahihdan geentel. “Hiai delimitation, ei a dia wake-up call a i zat diing uh ahi,” chi hi. Delhi ah, ministry teng ah eimi te i omsuak phialta ua, hiaite zatdan siam a poimoh dan a geen baan ah, i zeeldim thubawl a, “Meitei te suheh khaleng” chih lauhna lungsim put pen paih hunta ahihdan geen. “I MLA te question kia hilou a, interrogate hun ahita,” chi hi.Heutupa Thanghnun in, “Eilawi, mite’ policy sualden a, en policy bawl ngeilou ihi,” chi. “Hichibang thu [delimitation] a saikei di chih a constitution a om ahihkei leh Zomi Council in panla theilou ahidiam?” chiin dotna bawl. “Hiai i lawmte’ proposal, Zomi te a din avalh haksa mahmah a, huaiziak in, hiai in Zomite’ lak ah kithutuahna leh kigawmkhawmna hontun heen,” chi a, “Delhi mun a om te’n leeng i panlak dan i khen diing uh ahi. Innlam te’ sai dia kheet gige diing i uhia?” chiin a thugeen khin hi.

Heutupa Ginkhanthang in, awlawl in hongen diahdiah: “2001 apat a hiai process ana paita ahi a, i MLA leh apex body te’n ana theilou diing un ka gingkei. Theilou ahih uleh le apoikei, theilou ahimai dua. Proposal thu a consultation bang ana om ahih a, eimi heutu te’n ana AW ahi duam?” chi hi. Baan ah, heutu te leh nautaang kaal ah gap lianpi om hi’n aman geen hi.

Hiai kikupkhawmna hun a kigeen kha point tamtak chiamteh diing a om. Khatna ah, dinna kichiantak neih leh laak diing. Pom thei hia, pom theilou. “Ka gam uh hiaibang a khenzaak a a omdiing pen ka deihkei uh” chih pawlpi’n a theidia kilawm te kiang ah a taaklat diing ahi. Nihna ah, Zomi Council relevance kiam abang. Zomi sung a namneu chih in amau deihdan, atuamchiat in, taangkou pih uhi. Hiaibang a tribe chih a kipei suausuau pen ahoihkei. Tribe-based politics mah a kiiknawn i bang. Common approach bawlngai hilou hiam? Thumna ah, saupi en in kalsuan ta le. I khonung buai lalat louhna diing un a hunlai in census bang ngai poimoh ni. Atawpna din, hiai delimitation ahihleh, ei’ buai ngai hetlou in a hongveng thei a, heutu te’n Pathian kiang ah kipahthu tamtak a geen diing uh a om. Nam pumpi mualphouna, thangpaihna leh keekzaakna diing dinmun akipan Meitei te’n a hon hotdam ziak un.

[Siamsin Bulletin]