S Pauginmuan toh Chingmuankim Shoute ahihleh eimi laa siam ka na ngaihsaang gige ahi. Zogam.com adia ka na interview apan mimal in ka hong kithei uhi. Nna ka hon sepkhawm patna uh ahihleh ka na gelh "Tuunnu Zolei" (Mamuan Khuptong & Chingmuankim Shoute in SIMAS 2007 a asak uh, a video a kibawl man ma a a mp3 ana kithehzaak manta!) laa ka honkhum uapan ahi. Hiai “Tuunnu Zolei” laa kha, Lun Thawmte in a thunon’ kaih a bawl, Sonmual Valte in music bangkim a bawl ahi.
March kha lak in sava neuchik khat ka kiang ah a hongboh a, "Chingmuankim Shoute in khanawn a pasal nei di eive," chiin a honhilh hi. Kare, laa kibawl man nawnlou di eive maw, ka chisim a. Nidang in, laa khum di'n ka na sawlsek a, "Hongelh lechin k'on sak sak di," a honchi zeel hi. Omna mun tuam, innlam paihun kituak kha ngeilou ahihman in ka thilsawm uh a taangtung thei ngeikei.
Huchiin, March kaaltawp veel in khatvei ka fawn a.
“Thil khat k'on ngen aw?"
"Aw. Bang a?
"Laa khat bawl le eivele. Na nungak hunsung a na sak tawpna din."
"Aw, tham e. Nang hon chih ahih in chu."
Huchiin, U Muan (Pauginmuan) ka fawn a, hiaithu ka hilh ta. "A laa thu hon khaak lechin, ka na bawl di uh," a honchi hi.
Laa gelhsa lah a kinei mai kei a, bang lampang gelh di ahi dia, chiin ka buai mahmah. Pathian laa va gelhdia lah "kha" in honpi zou kisa taktak (nai)lou. Gamngaih laa gelhdia lah, i gamngaihna dau gawpta - ei' iit a kaannatna om hetlou ahihdan muchian lotel ta iset kaa. Huchiin, khoveel a tuailai te' lungluutna pen iitna thu mah gelh ahoih e, ka hon chi ta. Article hunkhop ka na gelhta a, gamngaihna thu bang, galbuai lai a a haksatdan bang, gam leh nam vai bang, khotang vai, Zodawn hehpih huai ahihdan bang, leh itna tangthu khawng. Hiai ka gelhsa te' lak ah itna tangthu te mah in mi hiip pen a, simtu te'n kipahpih zaw ua, comment bang tampen ka muhkiikna himawk inchin. Ka journal lui te ka hon pheen a, English poem nalh ka sak leh eipau mah a ka na gelhkhiat sa te ka hon pholhkhia hi. Nidang, chile 2001-2 veel in ka khua uah Pu L Nengkhothang' kiang ah pupa laa tuamtuam ka na dongsek a, aman a hon sa daldal zeel hi. Huaite kha ke'n ana gelhkhe zeel. Lungleen laa a hon sakkhat ah, "Chikleh sawlbang bang diam aw, lia lungzen aw," chih omkha hiveen, huai a "lungzen" thumal pen nalh ka na sak gige ahihtoh, huai pansan in iitna laa ka hon remkhawm panta hi. Hiai Pu Nengkhothang' lasak, a khonung in Pu Zamzachin' laibu bawl, "Paite Tanchin" ah "Loulam La/Huihnung La" chi a tuangkha ahihdan ka hon musuah hi.
Bangziak a hiaiteng hon gelh ka hia, i chi maithei. Kei-leh-kei hong ki-pump puak ka hikei a, himahleh igam ah itna laa gelh leh itna tangthu gelh te'n ana thuak gige uh, mite'n a muhdan uh leh a koihdan uh, thei lotel ka hihman a hong kigenchian ka hi. Itna tangthu gelhte bang, i lailam khanna dia a thilhih uh phawkpih lou in, "a zei" i hisak ua, huaimah bang in, itna laa gelhte "mi lungleng, hopeless romantic, vuallel" i hisak uhi. Album a kibawl chiang bang in, Pathian laa phuak te, a min uh taaklat zel himahleh, zawl laa phuakte' min taaklat ahingei kholkei. Mite'n hon nuihzabawl na di phet uh, chi a aphuak te'n a min uh taaklang ngamlou le ahimaithei. Himahleh, ken bel hiai ka chi: ipau-ihaam khansakna di'n tamseem in zawl / saanneem / itna / lungleen / lawm ngaih laa phuak touzeel ni. Angmalas, Emty Shoute, P Suan, ST Hauzel, DK Khuptong chih te khawng a phu bang uh theihpihna leh pahtawina piaktuak uh ka sa.
Laa kha, kei' theihna kia in daihlou ahihman in U Jon Naulak in naaktak in a hon huh hi. Gelhzoh ahih in U Muan ka SMS suk a, aman Chiengkon a H Kailalmuon akaih ana bawlsak hi.
A kaih bawlzoh hita, a track le kibawlzou ta, fawn tungtawn a bang a paidan kingai sak ta. Huchihlai in, "Lungzen s- I" a i geenvak, "zawl laa vs Pathian laa" kaal a buaina in a honnawk piansim hi. Hiaiziak in maw, i nam pumpi'n iitna laa mawitak mai nei di lai i chaan mai di, chiin ka kidong tuaituai hial hi. Atawp in, "Hiai laa ahihleh i soft power khansakna'ng peetmah a bawl ahi," chiin ka hong haanchiam thak uhi.
April 17, 2009 4.30 pm in U Muan in, "Laa ka khumlel uh," chiin a hon SMS keuh hi. Ama' kiang a a khum uh ahi. Ka fawn a, U Kim' kiang ah, "U Kim, va pai biambiam chi aw?" ka chihleh, "Hi, va pai biambiam keivoi. Ka thumang thou maw," chiin a hondawng hi. "Thumang tak na hi, kisuanlah huai rumrum zezen aka!" ka chi a.
Huchiin, hiai "Lungzen" laa khumzoh a hong hita.
Video le bawlngaal ka lunggulh uhi. Lawmnu lah April 23 a a kiteenna adia pumbuai hita. Nitaak khat khawng a inn uah -- alawm-avual, a innveng leh inndongta teng a omkhawm nuainuai lai un -- video camera, a stand toh light sytem toh bang toh va kipoluut luailuai maile eive, U Muan toh ka kichi ua, hilele haihuai deuh a hongbat ziak in ka tawpkiik thak uhi. Buaina te le tuam thei lozeen a!
Hiai "Lungzen" laa ka gelhthu a kigenkhak chiah, mite' hon dot masak pen hiai ahi: "Kua na phuahkhumna a?" Kuamah ka phuahkhumna ahikei. Ngaih Anglai OST a "Toupa Hun Tawmnou" phuahtu Evan Lang Do Khup, A-I-D-S natna vei a sih diing ngaak a om ahi zenzen kei, a suangtuahna apan hiai laa ahon gelhkhiat ahi. Iitna thugelh, iitna tangthu phuahtawm khawng a kigelh theih leh bangdia iitna laa gelh theilou tuan di, chi utdan keichu.
Chingmuankim Shoute in 2007 a, huaile hun sawttak nung a hilai, “Tuunnu Zolei” laa ahon sakkhaak cheuh bawn mite’n hichituk a kipahpih ua - Delhi a mi khenkhat te’n a a kipolhlimna ua ana laampih theih uh laa bang hi a, Hiangtam Lamka te bang in a laam kidemna khat a dia ana zang ua, i gintaak louhlouh khawng in a fawn ua ana play kauhkauh uh hisaam inchin – hiaibang a eimi nungak aw hoihnei, a aw paammaih lua hilou hiam, chihna ziak a hiai “Lungzen” laa piankhiat sak chu ahideuh ve. Huaichiah, i soft power khansakna'ng.
Sumsuahna dia bawl ahihlouh ziak in, a video a hong om chiah (a omdi leh) phalna la selou a teisawn, laaksawn leh kipiaksawn phal ahi aw. Ahia, ngetnop khat k'on nei. Mabaan ah hiaibang a athawn a hawmkhiat dia bawl hilou, i laa te, kuaman aguuk in teisawn nawnkei le. Hiai itna laa ahihleh Chingmuankim Shoute in ama' utthu a Pauginmuan toh a honsak ahikei. Nget leh zot a a omziak ahi. Zawl laa sak sia hi a ngai a, mohsa ut i om zenzen leh a sa te mohsa lou in, a gelhtu, kei hon mohsa zaw un. Period.
Lungzen Preview Peetmah
{youtube}FMpEY3-IJ8I{/youtube}
S Pauginmuan & Chingmuankim Shoute
Lungzen
Written by Haumuanlun Samte
Music by S Pauginmuan
Tune by H Kailalmuon
[W A R N I N G: Hiai "Lungzen" laa ahihleh lungleen laa peetmah ahi. A ngaikhate'n khat vei ngaihna a nalh pahlou, i ngaihngaih leh hongnalh dedeuh a chi uh. Saap laa, rap, rock leh metal lam ngainate adia chu "Lungzen" ah ngaih di omlou didan ahi.]
No comments:
Post a Comment