Zan nitak sawt kitusim ahidia, tuzing kithou hak mahmah veh aw. Tuzing va chih dia le suun hita, eh, suun le hilou, nitaklam hidaihta! Nitaaklam daak 1 khawng in i hongthou khe kiangkiang a, nidang a innlam a zingthou phet, thumna nei a, "Aw Toupa, tu ziingkaal khovak..." chih dandeuh te a geentheih nawn himhim kei. Akhenchiang a,"tu ziingkaal" chia thuumna va kinei kha teitei naak!
Thoukhia, kihahsiang, neekdi zong. Zaan nitak a singpi dawnbang omhiam, chia i et leh a beel a na geep gemgom, singpitee dim a omzomah. Huchia fridge hongsuk in bread tamlou om hiven, baksuk pah ziau lel. Innkong a va pawt a bawngnawi valei a singpi bawlthak di, chihbang chu peih huailou himai. Tui toh sang mehkhop khawng le uthuai zotham. Sang sialpeh guapguap kawm in news i honsim a, huaile a main paper etsang a, HT City e, Times City e, a huai lampang deuh te'n mit ana la masa haam hiveh aw.
Thoukhia, kihahsiang, neekdi zong. Zaan nitak a singpi dawnbang omhiam, chia i et leh a beel a na geep gemgom, singpitee dim a omzomah. Huchia fridge hongsuk in bread tamlou om hiven, baksuk pah ziau lel. Innkong a va pawt a bawngnawi valei a singpi bawlthak di, chihbang chu peih huailou himai. Tui toh sang mehkhop khawng le uthuai zotham. Sang sialpeh guapguap kawm in news i honsim a, huaile a main paper etsang a, HT City e, Times City e, a huai lampang deuh te'n mit ana la masa haam hiveh aw.
News simkhin, annhuan ngaita. Zaan nitak a neekna nung silsiang hongngai ta. Kare, zaantaak in kisil kha maileh hoihdi hia... Silsiang suatsuat in, huchia ann honhuan ta. Ann chu buaihuai lou. Cooker a phiitsak ziaulel. A meh di! Bangmeh di? Buaihuai nawn geet telmai. Bangmeh huandi eideh aw, chih ngaihtuahna a le mahni leh mahni kipei hai theihthok aka mole. Daal, dailuah, havai, allu, tomato, aktui - hiaiteng huankual dan lampi ngaihtuah nawn di himai. Bash!
A hongmin tak a, thuukpah in baksuk pah hnuurhnuur mai. Lim leh limlou omlou, annkam a lim naak lechu, a vang hukna'ng bangmai a henluut suk nuulnuul zeel. Khamkhop neekkhit a kuang te heemkhia. Sil nailou. Awl a sildia kheet.
Khualah lumveen, chi, tuivot bottle khat khawng dawnsuk kulkulh. Huaikhit fan kipei vutvut pen off geih in innphiat hahhah. Innzuut. Fan on nawn. A zoh, dongniin omhiam, chia en. Jean khekor te khat a koihna apat lakhia, a niin de aw, a siang de aw, chia en vungvung. "Aah, hiaizaw ngaihdam theihlai, a sianglai ve" chi a koihluut nawn. Mahni dong khawng chu mahni thu mah hiven maw. Hon sawpsak di lah kinei nailou ahihchiah ngaihdam haat thu a paidi hizeel mai.
Hihdi teng kihihkhin ta hiveen, banghih taak di ahihde aw, chia ki ngaihtuah panta. Ihmut lah peihhuai nai deuhlou, pawtkhiat dia lah khualum lua, laisim dia lah peihhuai lou zeel, nungak heel di, chilelah call center ngen a seem ahihchiang ua ihmu di uh... Abang-abang hileh innveng te'h ka va daakphei zual, chi in va hohphei ta. Chihleh Korean movies ana en uh, va entei. Lakloh lua, paikhe thei mahmah lou, a tawp a chu khua hongmial manta.
Inn ah paiphei nawn in, annhuan kipat dia lah baihlai ahihchiah, chi, inn a le om peih tuanlou, pawtkhe nawn. Hohna dek te inn ana kikalh, a dang paiphei nawn. Huaile ana kikalh zeel. Atawp a chu cyber cafe ah vahoh. Tulai cyber cafe te le abang thuthei ahi ua, identity proof mi ngeen chhen ua. Min bang chu dik kigelh ngei selou. Phone number lah i meltheih te' aa khawng gelhsuk geihrer. House number la chu A267 khawng chisuk lel.
Amasa peen ah Orkut hong in, window dang a Yahoo Messenger. A zoh Gmail, Yahoomail. Scrap, offline, mail check, chih te hihkhin a reply ziahziah. Lawmte online a omleh houpih cheuh. Huaikawm a, YahooGroups luut, SSPPNet sim zualzual. Simkhit a Zogam.net en, HCN Live ngaikhe ziahziah. Nuam e, innlam news update changkaang lota. A zoh Zogam.com, ZogamOnline.com, misual.com... baan et in favorite bloggers khenkhat te' blogpost te sim cheuh nawn. Huaikawm a chatting hih zungzung. Kirang mahmah eive, aak ann tu kibang mai molee.
Cyber apan pawtkhia, huai apan meh lei dia pai. Mehlei di thei zoulou in, eimi te' sa minsa zuak khawng va lei suk. A bawl baihlam pen himai lou hia, sa minsa nanaana chu!
Ziing a annkhing te toh sa minsa zialkhawm nawn ekhgiap. Ann neekhit a music ngaih kipan ta. Laangaih te bangchu thupi theithou. Alternative, Heavy te ngen ngai puak borbor. Innveng te'n bengseng a sa duam, chih te bangchu kikhual vetlou himai. A ngaihkia hileh, laam a laampih zomah lai ivoi.
Khualum lua ahihchia veng dang a pawt khawng a pawtpeih lou, lawmpa toh ann nekhin kuva haidia kizui khe suk ta. Kuva haikhit a nungak va heel. Va chiak zialzial. Card khawng kimawl. Huai apan painawn in mundang ah va luut nawn. Huai ah le midang ana om uh. Va chiak nawn zialzial. Daak 12 bang hong gingthei ta ahihchiah chi, innlam zuan a paita.
Inn tunphet a kihahsiang in, huaizoh la ngaih kipan nawnta. Tutung chu ahi burbur te hilou, a om hiauhiau te. Dan Seals, Glenn Frey, Gary Allan, Don Williams, Air Supply... lunglen bang huaidek zezen.
Saapla tuamtuam ngaikhe khin in Deih Anglai Vol. VIII i honngai panta chu, i lungsim hon zou eina ve. Lungsim le hilou, i kha tan pha. Amak khat chu hiai eive, saapla te sang mah a le eimi laa te'n i kha honlawng theizaw hiveh aw. Zaansawt nung a, room ah eikia om a, tunglam a ceiling fan kipei vuuvuu enkawm a lum hang a, i Zomi zawlla kulmuut tak i hon ngaihleh aw... hunlui te ngaihna bang hongpuang huaihuai mai ka chi.
Zaan lah dai deuhdeuh veen, eilah kilungleen deuhdeuh veen, a khenchiah zaw ngaihtuahna a paisau thei telmai. Hichia hunzat touhtouh mai a le i mabaan ah bang hongtung di ahia le? Ah, kingaih tuahtuah sang in, bangmah ngaihtuahlou a, carefree tak a ut dandan a ommah nuampen maw, chi in light i off a, i hong ihmu suk dirdir a.
Hiai himai khoveel i chih. Bangmah thupi omlou. Bangmah a hou le om tuanlou. I om daandaan a om di himai.
[Lungsim suangtuahna apan gelh maimai hi e. Thil tuah taktak hisaam kei. Ngep de le]
No comments:
Post a Comment