27th Siamsin Annual Conference-cum-DIAFEST 2007
November 8, 2007 ni in Raisina Mual leh akiim a phaizang tung a kiphah zihziah khopi thupi takmai, meipi'n abawm liiliai a. Tua meipi te tung ah, Zo phualva' mul etlawm takmai zang in Siamsin Khangthubu gelhthak in a ana omta hi. Hiai ni ngeei in ahi Siamsin Zaampi ging 60 vei in khoveel kawl kilchih a thotsuak. Hiai ni ngeei in ahi mipi 2000 veel diing paikhawm te' kikou husa in phualpi khopi a thotsuak. Hiai ni ngeei in ahi atul theilou, i gou manpha Zogam zai-oih siam te'n kipahna leh lungzuanna khitui a nuul uh.
Ziingkaal a kipan in Phalbi huihvot hongnung hiauhiau mahleh mite' sung tawng a 'phuurna tak' bel a meekgawm zou tuankei. Ziing daitui in a telhsiang liklek bangmai in i lungsim te a thak mahmah mai. Gari neu hi in alian hitaleh, Airforce Auditorium, Subroto Park ah a hong kitholh luut zungzung ua, a etlawm nampuan a kivan, siamsin lia-leh-taang te, nupi-papi, ateek-akhang, aneu-alian, a hong kumkhe sauhsauh uhi. Auditorium kiim a louhing dipdip leh paak te'n mit a hiip mahmah a, kongpi bul a lian deuhmai a "Nokia," "Airtel," "Lux," leh "Bru" te' puankhai te'n mite' ana vaidawn uhi.
Daak 10.30 a gingta. Auditorium sung ah mi a dim khinta. Daak 11.00 geih a honggin in, lia-leh-taang bangzah hiam in, Suktuah Laam, Zo tawndaan leh tulai tumging helh khawm a bawl, nalh deuhmai leh thupi mahmah, lahna honnei uhi. A taktak himai. Huchiin, Siamsin Conference leh DIAFEST 2007 pat a hong hita.
Pu Biaklun Shoute, Co-ordinator, Siamsin Conference-cum-DIAFEST, in comperes te, Lia Mercy Vungthianmuang leh Tg Thangzasiam, meellahna honnei a, tuakhit in Pastor Khamkhanchin, EBCC Delhi in Pathian kiang ah hun te laankhia hi. Siamsinpawlpi Laapi sakna mipi'n kinei dumdum a,huchiin President Grace D. Nemching, SSPP JHQ Delhi, in zei deuhmai in mipi te vaidawnna honnei. "Pawlpi adia kipang naaklua inchin, mi'n 'Na blood group bang a?' honchih uleh 'SSPP' khawng ki chi kha," a chih in mipite' kipahna di tak geenkha.
Pawlpi kum 60 achin lawm diing in phuurtak in i kisa ua, himahleh, hiaibang hun zangthei diing a maa ana latu, gim leh tawl khawksa lou a eite a dia lampi ana sialtu, phamsa heutu te hiaihun in i phawk mahmah. Amau te suunna Pu N Vumsuan in hon makaih hi. A kha uh khawl tawldam heen.
President Siamnunlian Valte, SSPP GHQ, in a hun honla a, hiaihun thupi a sakdaan pulaakna honnei hi. Siamsinna lam a i gam-leh-nam adia hahpan seem diing in mipi te chial. "Employee i hihna apan a employer i hih sawm diing ahi," chiin siamsin te chouna bawl. Agriculture, Industry leh IT development lam ngaihsak a nei a mabaan kalsuan diing ahihdan geentel hi.
Lametna bulphuhtu - ZOKIDS te'n siam takmai a, "Aw, nang tuailai" laa honsak letlet patchiang un, mipi te'n paakta in khut bet in bet khum mai uhi. Tuazoh in "Zomi te' Jim Reeves" Pu LL Muana in, "I'd rather have Jesus" hon awi huahhuah a, nupi-papi te a limsaang dek ngaal uh. Ama vual a kipan, SSPP JHQ Delhi Adviser, Pu Chinsum Naulak in a khut a honzaak khiat patchian, mipi te'n nuamsa mahmah ta uh ahi, chih a kithei mai.
SSPP Delhi adia kipezou gige, innteekpi, Nu Chingi, video editing leh camera lam a hon buaipih gige, Pa K Thangpi leh John Lal Guite, leh, musician Tg P Thanlian te kiang ah Kipahpihna Thilpiak kipia hi.
"Nuam na sa uhia? Hiailak sang a Zogam nuam zawlai maw," chiin Tg Muanlal in hongeen a, nungak nou te kikou nainai ua, aman zei deuhmai leh siam takmai in "Zogam nuam" laa honsa hi. Trahtrah mai.
Pu Lalthanghlun Guite, Chairman, Stangding Committee, SSPP GHQ, hongding a, a meel pii daan leh stage tung a thunun zohdaan himhim in mipi te a zoukhin. SSPP te i thupi taakdaan uh, houchik lah bang, lah thupi kuai mahmah in hongeen a, "Hiai zahta a honpi tu Pathian ka phat ahi," chi hi. Mipi te'n khut kibeeng dumdum.
Tu in Tg Sang Valte in a laa phuah, "Hometown," keyboard ging hianhian a zuikhawm in honsa a, i vaangkhopi puksia in, a paallun teng sawlbang vulta mahleh, ei a hi gige, ngainat huai gige ahihdaan te hon taaklang hi. Avangkim a comperes te' a hong houlimna te un mipi te sulim mahmah hi.
Muana Ngaihte hongding khia a, huchiin gam a hong lum mahmah. "Pasian anei minam a hampha" chiin a hon awi hiahhiah a, mipi te'n khutbet in kizui leplep hi.
Pupa' khanggui zopna in, SSPP Delhi cultural troupe te'n, tha tamtak seeng ana sin uh, nam laam chi tuamtuam lahna honnei ua, i tawndaan leh i laam te thupidaan athak in hon taaklang uhi.
Tuazoh in Khual Zahtaakhuai, Pu GK Pillai, Secretary, Ministry of Commerce & Industry, Govt of India, puandum piakna om. Aman a thugeenna ah, koimun peuh ah om lehang leeng i tawndan te mangngilh ngeilouh ahoihdaan taaklang a, Manipur dinmun in hoihlam nawt tuanlou hi'n geen. "Delhi khawng leh India gam mun tuamtuam ah siamsin mi tamtak na hong paikhia ua, hiai ahihleh kipahna lam sang in khasiat huai thil ahizaw. Lamka bangchi tuk a puuksia hiam chih a hon taaklang," chi hi. Mipi paikhawm 2000 veel diing te mai ah, "You have to restore Lamka to its original glories and greatness," (Nidang a Lamka' paaklutna leh thupina te na tun ding kiiknawn diing uh ahi) chia a geen in mipi te' zou mahmah hi. "Behiang, Border Trading Post ahihtheihna diing in phualpi solkaal in Kawlgam vaihawmtu te phu a, himahleh amau lam a kipan dawnna mumal muh hinailou," chi hi. Aman Kawlgam vaihawmtu te apan dawnna hoihtak a kimuh chiang a hiailam a kipan panlaakna pat hingaal diing in haanlung chiam hi.
ZOKIDS te'n a laa uh khat honsa nawn ua, huchiin Siamsin Cultural Fusion (SICFU) 2007 a hong kipan ta. A etlawm mahmah Dumpuan zeemnou (Phamta Pumzanang Guite' laa apan) kepbitna, tawisaangna leh phoulaakna diing ngiimna a sai ahi. SICFU Co-ordinators te Tg Lianthansang Tonsing, Lia Chingbiaklian leh Lia Nancy Tonsing ahi uh. Amau i nampuan te puahpha in, kicheina piching leh hun awl a silhtheih diing in design ua, tua te lia-leh-taang duangzen taktak te'n lahna mipi mai ah honnei ngiahngiah uhi. A nung a tumging luang hanhan leeng a "Zo" mahmah. Puan zeem te a etlawm un a mawi mahmah mai a, a mi te toh kilawm khawm chet di'n athuam siam uhi. Make-up bang leeng international level a te himai. SSPP khawmpi ahi chih theisa kelkul lou te a di'n bel, "Maizeen! Korean/Chinese model te hia?" chih a baihsam viau di.
Khual Zahtaakhuai Pu Lt Gen ZU Shah, Deputy Chief of Army staff, Paite puandum silhsak ahihzoh in hun honla cheuh hi. Manipur kiltawng a teeng mite a awlmoh daan geen a, gaalmuanna gam a hong hihtheihna di'n army te'n panla tou zeel diing, chi hi. Theihdia hoih khat bel, aman Singngat vangkhua, "Border Model Town" ahihtheihna dia nnasep patna di'n December 14, 2005 in suangphuum va hongkhia hi.
S Pauginmuan' min a hong kiloh khiat phet in nungaak te a hong au pah suupsuup ngaalmai uh. "Sakmel Etlawm" honsa a, zeideuh mai in hong kisawi a, a nung a Zogam.com t-shirt silh a laam numei nih te toh - fuhna gam himai!
Tu in suun ann neek honghun ta a, kongtual lam ah mipi te kipawt khia in, louhing dipdip tung ah, ann kinei nainai hi.
Hun nihna hong kipan ta. Diamond Jubilee daak khetna, Ex-President Delhi JHQ omkha teng leh GHQ a heutu te’n honnei ua, huaizoh in P. Thanlian in "Like It" laa honsa hi. Mi sulim siam mahmah, Pu Ricky L Guite, Chairman, DIAFEST hongding a, Diamond Jubilee Festival countdown thu, tomkim tak in leh phuurhuai deuhmai in hongeen. "Delhi te, k'on eng ua, na thilhih daan te uh k'on enton uh," chi hi.
Tua khit in Lia Mercy Vungthianmuang in "Zombie" laa, a taktak bangmai in honsa bangzaw aw, camera vaak in amai a salpuak zotzot mai. Lia Chingngaihlun leh a lawm in "Zogam ah tuitam mahleh" chihlaa in hon sunzom nawn ua, huaikhit in SSPP Delhi Football team te meellahna neih in om hi. A muanhuai un a siammeel thei mahmah uh.
Pu LT Juan Tonsing, Finance Secretary, SSPP Foundation Trust, in Foundation Trust toh kisai mipi theih ding leh a progress report tomkim tak a hongeen zoh in, GHQ heutu te meellahna neih in om hi.
Mipi te ngaaklah peenpeen SIMAS a hong kipanta a, hiai SIMAS awards hawmna kaal ah SSPP JHQ Delhi Education Dept. in Meritorious Awards, siamsin vual tungtuang bangzah hiam kiang ah, piakkhiatna nei hi. Hiai Siamsin Conference hun zatdaan, ZogamOnline.com in live in internet tungtawn in ana khahkhe ziahziah hi.
Musical Fiesta nuam takmai in honzui nawn a, tua te lak a laa kisa, chiamteh tham deuh te: Mangese "Zuu," Munga "Sinlai Luahtu," Mamuan Khuptong feat. Chingmuankim Shoute "Tuunnu Zolei" (Haumuanlun Samte’ gelh), Tungnung "Sound of love," Instrument of Peace "Israel mite na pibang in," Minthang "Ningzu-khuaizu toh," Gurus Family “The Realist Killaz,” Dosti 0.4 “Between angels and insects,” Singtangmite "A, Aw, B, Ch." Vai nungak, Lia Alka leh Mawmawi in "Ngaih Lungmuang sa" honsak hialhial chiang un, mipi te'n Lia Alka kipahpihlua in, khuai vaitung hileh kilawm hial in paakpia in va bawm luailuai mai uhi.
Huchiin, Htp Ginlalmuan, Vice President, SSPP JHQ Delhi in Kipahthu genna honnei a, Evan Thawngkhanlian in thumna toh hunkhaak hi.
Kongpi ah mipi te nui seusau in hong kizui khe dialdial ua, a meel ua pan "lungkimna" leh "deihkhoplouhna" kiziikkhawm muhtheih in om hi. Ka gei ah nungak nou khat in, "Tukum kaan a Conference nuam leh thupi ka zatkhaak lam ka thei naikei," a chi a, paamdeuh ah tangval khat in, "Zaan khovaak in omleh hoih di hia!" a chi vengveng hial hi. Pu Phungchinthang in, “Gi a neilou zalenna gam a India, Myanmar, Bangladesh a Zomite honkai khawm ding in siamsil (art) ginglawm (music) leh thu-leh-la (literature) mah hi diing a hihdaan haihvuallouh in tutung khawmpi apan a kilang thei,” chi hi. Gaal ah mite’ lem kilaakna vaak a eeng ziipziap zeel a, a kawm ah khat-le-khat, kipahpih a ngaina tak a ki chibai tuah a om te ka muthei hi. “27th Siamsin Annual Conference-cum-DIAFEST 2007” puankhai awl a a laakkhiat uh ka en a.
Huchiin tua puankhai mangpha ka khaakta.
No comments:
Post a Comment