David in Victoria muh in

Posh Spice ka muh tung apan kumtawn a amah toh omkhawm gige ut ding ka hihdan ka theichiang
David Beckham

Khovel a nupa' minthang pen te' itna tangthu hong kipatkhiat dan ahi. Hiai thugelh ahihleh February 2005 in Tongluang tanchinbu ah tuangta hi. David Beckham in “My Side” kichi laibu agelh apan eukhiat ahi a, Readers Digest a kipan February 2004 a ka lehkhiat ahi a, eipau a thugelh, ka gelh masakna pen hi’n ka thei. Himahleh, ka gelhlai in, kizahpih man in mintak ka na zang kei a, Geowhiz Samte ka na kichi. Valentines Day bang hongtung nawn dekta ahihchiah, hiai ah i taaklang thak reengreend di chu. Itna sung a om nailou, omdek geigei, omlel, om nawnlou leh a zong kiiknawn te’ a di’n. Simnuam.

Ka zi deihthoh tak in football striker laibu khat apan in kei honna tengkhia a, ken leng ami sang zatamlai ah amah chibang ka na teel hi.

November 1996 ahi a, Georgia a hotel khat ah ka tung hi. World Cup a pantheihna dia etkhiatna kimawlna Georgia toh ka neihma zaan uh ahi a, ka hotel lupna pindan a tukawm in TV a music channel khat ka en hi. Huai ah Spice Girls te' video thak a honglang a. Amau gamkeu lak ah zei leh nalh deuh tak in laam ua, Posh in catsuit vom a duang etlawm takmai tung a honbaat zaw aw, ka mit in numei a muhkhaak teng lak a numei lamdang pen ahi, ka chi hial. Hiai TV mai a kipan ka mit ka suankhe thei nawn himhim kei. Spice Girls te tuma lam in leng ka na mumu ta a - kua e a mukha nailou? - mahleh, huaizaan a ka muhdan a tuamriau hi. Mi'n, “Alak uah kua na deihpen a?" chia hondot khak chiang un, "Posh eikei dia, huai a khe paindan fuhnu kha," chiin ka na dawngzeel hi.

Huaizaan apan amah ka itna lungtang a hong dawnkhe ta. Amah toh tangtawn a omkhawm det ka ut hi. Ahia, hiai ka ngaihtuahna bangchia taangtung sak theidiing ka hia? Kei ka hihleh Manchester United a ball peek naraan maimai, naupang chik ka hi a, ka career kipan dek panlel ahi hi. Amah ahihleh Spice Girls a mi ahi a, pop charts a khatna a pang, tanchinbu teng leh niteng simthu tuamtuam a a tanchin uleh a limte uh tuang gige, mi minthang tak ahi. Amau i va chihchiang in hiai nuaisimlei - khangthak te' khovel a mi thupi pen ahi ua, tu'n kei hiai ah amau te’ lak a khat deih in ka om hi.

Bangchia panla diing ka hia? Laithon gelhmai ding ka diam?

"Itluat Posh Spice, kei n'on theih ka gingkei. Ahia kei nang ngai a duangvul in ka na omden a, lametna lianpi toh kimuh ka ut mahmah. Na siang hongbeel thei hileng, kipaak in ka ma a vanngei ka ging." Hiai baan gelh didan tuan ka theikei.

Kha khat nung in London ah kimawl diing in ka hoh ua, kua hiam in Spice Girls te minih leng mipi kimawl ente' lak a tel uh ahi, chih hongen kha hi. Kua pen ahi d'ua? Posh a teldeh aw? Kei hi ka kimawlna ka phuur mahmah ta mawk hi. Kimawl khit in khawlbuk lam zuan in ka pai a, ka manager khat uh Simon Fuller toh Victoria(!!) kihou a om ka mu a. Huchiin Simon in kou geel kimeellah tuahna honbawl hi.

Thakhat thu in khawlbuuk sung a honglum hee-huu a, ka tal ah kho-ul mal hongluang suk tialtial hi'n ka thei hi. Victoria va houpih ut law mahleng ka paukhiat diing chiang in ka dang honghul a, ka lungsim apan thumal hongpawt khete ka lei a tunma un a lampi uah a mangthang manzel uhi.

"Hello, David ka hi."

Hiaiteng ka geenthei haamhaam.

Kimawl lai in volley bangmai a leengnalh in goal ka khum a, Victoria in leng nalh ana sa mahmah di'n ka gingta a, himahleh aman ana phawkphak tuakkei. Mitbelh ana bunlou ahihdan ka theikhia; mitbelh lou a lah muhbat vual diing ahi kei a. Omdan bel, kimawlna mun ah bangthil teng a tung a, chih Victoria in ana ngaihsak law lawmlawm lou dan ahi. Ka team teng un amau lim hon kilaakpih ua, huai ah kuahiam khat in, Victoria kiang ah, tuma a football peeksiam leh laar te’ tuanna laibu apan a lim ana tepkhiat pen kei ka hihdan a hilh hi. Mahleh, huai ka lim a laakpen in ka kinep bang in ka lampi diing a hon honsak chi tuankei.

"Victoria ka hi" chi'n hondawng a, huaiteng himai.

Aban gending dang ka ngaihtuah khethei nawnkei. A number nget ka sawm dia, ahihkei tawp lehleng banghiam khat beek ka geendiing. Himahleh, bangmah ka genkei. Ahon paisan a, hun manphatak ka mansuah mai ve.

Huainung in innmun a ka kimawlna uah kinepphak hetlouh in Victoria a honghoh a, a khekol gaak trittret leh a khakhi paun-aak, siing deuhmai toh, a kilawmkhawm ngeimai. Bang pentak le gending ahia chih a theihhuai kei. Hiai ahi hun remchang. Nang na hi ka it, Victoria, ka sinlai luahtu ngei, chih ut in ka lungtang a kisai litlit a, himahleh, mi kuahiam kammal li lel a i na houpih taakkhat kiang ah hiaibang thute va genphut chih thil hithei ahikei zeel.

Kei leng tuivot dawn di'n ka paiphei a, ka dawnkhit in Victoria keilam zuan a hongpai phei ka mu hi. Tamai aw! Bang ka gen dia? Huchiin awl in ka hong houlim tou ua, ka hongpau touhtouh uleh a tawp ut zosaam omlou in ka houlimna uh a hongpai fuh mahmah hi.

Victoria in numeite' pindan a va lutzual di'n hon paisan a, huaikaal in hiai hun manpha mansuah louh sawm in kei hi ka na buaigu mahmah hi. Hun poimoh tak, 'tu ahihkeh hingei nawnlou diing' hun ah ka ding hi. Ahong paikiik in huaizaan annne a pawtkhe di'n ka chial a, mahleh aman poi sakmel tak in London a akiik ngaidiing ahihdan honhilh hi. Ka phone number honngen a, a sukmang khakding hiam, a hon phone nawn sawmlouh khaak diing lau in ke'n ama' aa ka lehnget zaw hi.

"Ii, hilou, Victoria, nang' aa honpia in."

Huchiin a bag sung a honmai rokrok a, huaiziing a Manchester a a hong leenna boarding card hon lakhia a, a nu-leh-pa te' inn number honpia hi. Tua card neuchik tutan in leng ka keemden lai hi. Inn ka tun in a hon number piak lehkha neu chikchik guk vaal veel a gelh teltul in pindan tuamtuam ah ka nusia hi. Kivenna daan in.

A ziingchiang ziing dak 11 in ka phone a, a sanggam nu'n honna dawng hi. "Gym ah a hohlel a, a hongpai chiah hon houpih kiik di'n ka na gensawn di," honchi hi.

A hon hepkhiatna mamai eive maw, chiin ka ngaihtuah hi; asanggamnu honna dawngsak a, amah omlou daan a kigensak in. Ka khuttum sa vitvit in tuanglai tupsuk ekh ka ut a, mahleh ka kideek haamhaam hi. Huchiin lupna tung a tu in phone hi ka entop tamai hi. Bangtan ka ngaak a ngai dia? Daakkaal lang? Daakkaal khat? Kaalkhat pailiam mah a bang.

Atawp in phone a hongging khong a.

"David? Victoria ka hi."

Huchiin zaan nitaklam a ka thugen baan uh ka sunzom tou uhi. Atawp in, "Tu zaan bang na hihdia?" chiin ka dongkual veel a, "Manchester a om chu ka hi a, na mantheih di leh k'ong hohsak di," ka chi a, manthei diing ahihdan honhilh hi. Ka lungsim chu nui eita na ve.

Daakkaal nga khawng nung in car sawpna ah ka vatai hi. Amasa pen in ka car a hoihthei bang pen in alat angai. Ka BWM M3 car thak liklek ka silsuang suatsuat a, huchiin ka nu kiang ah ka va hoh masa hi. Ka nu’n mun poimoh deuhmai khat a hohsawm ka hihdaan honna theingei dia, himahlah hiai Spice Girls “tungtang thu” hi nengkha chik leng a theih ka gingkei. Ken le chu hilhsawm nai tuanlou. Ka kihahsiang a, a nalhthei pen diing chiin t-shirt ngou ka silh a, jacket puang silh in, Versace jean ka teeng hi. Ka hinkhua a dia show poimoh pen a dia kichei mah ka bang zezen hi. Huchiin tua ka geen, mi laarnu ka chihkha, ka phone a, kimuhna diing mun fuh khat ka sehkhol uhi. Ka nih ua ka theihhoih mahmah na mun uh, giahna hotel luunlou khat kong a bus khawlna mun ah kimuh ka sawm uhi.

Ama hongtun ma in amun ka na tungkhin a, sawtlou nung in car puang hiu-hiau in hong kitholh zarzar hi. A kiang ah ka va tuluut duunmai a, ka zum peetmah.

Huai apan ka hong taikhia ua, a kua zosaam in koimun tak manoh a taisawm ka hi ua, chih a thei ka om uh. Mahleh, ka nih ua hunnuam ka zatkhop theihna diing mun uh zuannuam ka hituak uhi. Kuamah sukbuai theihlouhna diing mun thoveng ka zon uh a ngai. Ziakbel, Spice Girls te thilhih peuhmah te - a hihma nangawn un leng tanchinbu teng ah a tuangsuak pahsek hi. Huaiziak mah in, a manager pa un amau leh a tangval te uh ana zumpih thei mahmah hi.Hiai tungtaang ah ka ngaihdan toh kituak mun fuh deuhmai khat ka thei hi. Mi om veekveek louhna mun Chinese restaurant khat manoh in ka hongtai suak ta uhi.

Amun ah kuamah ana omkei. Hiai ahi munfuh peen.

"Hehpih in Coke khat leh Diet Coke n'on pethei diam," ka chi a, restaurant neitu nu'n kua ka hi ua, chih honthei sekei. "Ann nelou in dawn di na la theikei di uh," chia hondawng guapmai chu, huai mun apan ka pawtkhiat maimah uh a ngai hi. Tu'n Victoria in ama' deihteelna mun a gentei a hunta. "Ka lawmnu ki’ah va hohle eivele," honchi a, huchiin a lawmnu' kiang lam zuan in ka hong taikhia uhi.

A lawmnu ahihleh Melanie Chisholm ana hi a, khovel a milar khat theihbeh nawn diing ka hihman in vaangpha ka kisa sim hi. Ahia, kei-leh-kei koi a va kipeiluut kha ka maizen a? Zum leh zah khuallou in Spice Girl khat toh ka pawtkhawm a, tu in Spice Girl dang khat kiang ah ka paidek nawn sawnsawn uh. Nungak khat toh a kiheel masakna ah vaalnou khat in hiai saang a zumhuai zaw, hun a tuakthei nawn tuan diam?

Amun ka tun un pindan tuam ah honluut san ua, kei ka hihleh lengla khawlna pindan ah hon nuse top ua, ka hi hiau-huau zezen hi. A omlouh kal un tutdan chikim phial in ka na tukual man a, a hongkiik un ka tutdan ka na khengman nawn tel hi. Kei kia zakta ka kisakleh Victoria ngei leng a zakta tei thou hi'n ka thei. Kimeltheih tuahna hoihtak a bawl nailouh mahbang in tutna kiltuak ah ka tu liauluai uhi. Lawmta tegeel a hong houlimlim ua, kei hi ka na tutei top a, a thugen uh ka na ngai maimai hi. A khenchiah nuicheuh zeel. Nuih za kholkei lele. Huaimun a ka om sung un kam khat lelleng ka paukhiat lam ka theikei.

Aziing ni'n amau, Spice Girls te US ah tour in a pai ua, Victoria in New York atun chiang ua huaimun apan hon houpih di'n honchiam hi.

Tutung ka kiheelna ubel a patna ahihtoh deihbang in a kulmuut zou taktak kei. Mahleh, hiai sang a fuhzaw thei di'n bel ka ging tuankei hi. Ka omdaan kha, "muhtung a it pahngaal" a chihte uh hiale? Ii, hilou, huaisang in leng hiai 'thil' a tung rangzaw hi'n ka thei.

Huaimah bang in thil khempeuh leeng a huchi gaivek. 1996-97 hunsung in Manchester United in League ah vualzohna ka la ua, Professional Footballers' Association in kei "Young Player of the Year" hihna hon khusak hi. Mahleh, kei' ngaih in bel a vualtung tuang taktak pen ahihleh ka mobile phone company te ahidaih hi. Victoria ka haichilh gawpta a, America a hon omsan zawkmah toh, daakkaal sawt pipi ka kihouhou ua, ka phone bill bang lauhuai hialkhop in a tamthei trektrok khopmai. Ahia, hiai pen ka sumseenna teng lak a seenna taakpeen hi’n ka ngaihtuah zaw hi.

Kong khat a i ngaihtuah chiang in a hou mahmah. Hiai numei lamdang takmai, ka tanchin teng leh ka ngaihtuahna te ka hilh gaivek a, aman leng ama' aa hongeen te gin omtak in ka ngaihkhiat sak ngiitngeet zeel hi.

Mobile company gentaklouh paakzuak ten leng kei a hon phattuam pih mahmah uhi. Niteng in rose paak sandup, namtui hiuhiau Victoria ka thon gige hi. A hongtun kaal ngaklah in ka omthei nawn mahmah kei.

Ka nihvei kiheelna zaan uh leng amasa pen mah bang in a fuh deenduun khol hetkei. Hiaihun in hotel kong khat a car khawlna mun ah ka kimu ua, mundang ah ka pawtkhe sekei uhi. Huaimun a ding in ka kihou mai ua, huchiin, amasakna pen di'n ka hong kitawptuah chenchen ta uhi. Huaizaan a hun ka zatzoh un, kumkhat sung vingveng ka na deih, ka lunggeel hong taangtung ta hi'n ka ngaihtuah hi.

Ka kaal simthu uh kipatnung kha guk veel hong pailiam nung in, hotel lui leh nuamtak khat ah kaaltawp hun thoveng tak in k'on zangkhia uhi. Ka hotel pindan uapan diil dum diidiai khat a kigaalmuh thei a, akiim a munte a etlawm mahmah hi. Nitaklam ann ka neeklai un tung suunni tumkuan in tua diil honsal paak ziizia a, ka Victoria meel etlawm takmai hon taanvaak singseng a, huihvot hongnung hiauhiau te'n a sam honmuut liing dialdial uhi. Khuuk khat a ama a khuukdin in, "Ka iit Victoria, damsung a na pasal di'n n’on kiteenpih diam?" chiin ka dong hi. Vaangphat huaitak in "Hi," chiin hondawng hi. Hiaithu hongeen ka zaak a ka kipahna daan geensiam a haksa. Ka sapum hiangzaam teng a meivaaktha hongluang sungsung hi'n ka thei hial hi.

1997-98 a United' hunzeek dsan tam ka theihpih kei. Huaisawng teng Victoria toh ka kingaih mahmah lai uh ahi a, ka lungsung ah amah kia a om hi. Huaiziak mah in huai kum in vualtung tuanna pahtawina khat mahleng ka ngahkei. Ka pona sim a, mahleh Victoria ziak liauliau in puakdaan siam ka sawm teitei hi. Ahia, ka vangphatna teng in bel a hon nuse saamkei. United ah kihel tamkei mahleh World Cup kimawlna ah England Team ah ka pangkha himhim hi.
England vs Argentina hi kibeihna nashe mahmah ana hi gige a, World Cup a France mawltual a ka hong kibeihna ngei uh leng a dangte a banglou tuankei. Hiai kimawlna a di'n ka phuur peetmah a, ka ngaaklah mahmah hi. Ka tung a bangthil hongtung diing hiam chih bel ka theihpha himhim kei. Mawltual a ka kimawl lai un, Diego Simeone in honraap in hon kikou khum a, ka sam ah honlai hi. Ke'n leng ka thukkiik leh thukhentu'n kei a hon hawlpawt hi. Tua kimawlna ka lel ua, huchiin ka vuallelhna ziak uh a mohteng khuksak in ka om hi.Huaizaan ahihleh ka hinkhua a dia zaan hoihlou pen hi'n ka thei hi. Ka kipahna diing bel thilkhat omden mahleh, hehna-mangbatna-lungliapna-lungzuanna in ka pumdim hi. Vuallel a England kimawlmi te Saint-Etienne a ka leenkiik ni un ka mobile ah Victoria apan message khat ana om a, huaibel a kinthei bang peen a amah houpih dia a hon ngetna ahi.

Ken leng ka houpih pah a, "Geen di khat k'on nei," honchi hi.

"Bang eita, boihte?"

"Nau i paita."

Tu in ka lunglipana teng kipahna a hongsuak ta.